Zacharie 7 - Ma Zhiklè

Skwi man Zhiklè a jhèɗèʼa

¹ Te mvi bi Darius mafaɗaʼa, a ki 9, mʼmèn 4, ki Kislev, Ndo nzi pèc pècèk a ngaɗa na Zacharie.

² Béthel a nzlündo Sharetser a Réguem-Mélec a ndohi ta, aman ta tsi ri a sam Ndo nzi pèc pècèk.

³ A ta jhèɗè ndohi mvi skwi a Zhiklè te gi Zhiklè bi mbiaʼa, a ndohi nhadka ma: Nga da lèyè a nga jèkeda skwi nʼndai a ki mazlamaʼa, ara man nga gu a mvi a mvai nʼnzi a zhi ɗè?

⁴ Zhiklè bi mbiaʼa a ngaɗayè:

⁵ Gaɗa ta ndohi kokwar tèlèba, a ndohi mvi skwi a Zhiklè: Aman kin jèkeda skwi nʼndai, a kin kuɗai, a ki mazlamaʼa, a ki matsaraɗaʼa, tʼhwaɗ mvi 70 ma, kin gu a géɗ ga ɗè?

⁶ Aman kin ndi skwai a kin si skwai, kin ndu a géɗ kinè ka ɓi ɗè, a kin su a géɗ kinè ka ɓi ɗè?

⁷ Ma haha Ndo nzi pèc pècèk a goɗ te ma ndohi nhadka ma nengaʼa zlèzlèʼa ka ɓi ɗè, aman ndohi ta nza te Jérusalem, te kokwarhi a tsagi nengaʼa dai, a ta nza te pa a gumai, ko te kokwar Négeb a Shéphela, ndo te pa.

⁸ Ndo nzi pèc pècèk a ngaɗa na Zacharie:

⁹ Zhiklè bi mbiaʼa a goɗ ar haha: Va-gu kita zuraʼa, va-gu a ndav amba, a ngiɗè da su ngiɗè te va!

¹⁰ Kin ga ta wuɗi a ngwozi mazihi a wud dikai, a ndohi man verzi ta tsaɗ, a ndohi ntawassa ɓai, a kin hur skwi man ambaɓi ɓai te ndav kinè, ngiɗè a géɗ ngiɗè.

¹¹ Amán babhi kinè ta woy a ta gi arsa ɓai; ta sassaya ndav ta, ta ndè zlembaɗ ta.

¹² Ta sassaya ndav ta ara ɗazkwa, a ta tsena ma kita Zhiklè man a goɗ te ma ndohi nhadka ma nengaʼa te Mèzhèɓ nengaʼa ɓai. A Zhiklè bi mbiaʼa a ngu ndav a géɗ tengaʼa kumba.

¹³ Aman a mboho, tengaʼa ta fa zlembaɗ ɓai, Zhiklè bi mbiaʼa a gaɗa. Lèmèlèmè tengaʼa ta bèhè antanta, a iyè, i fi zlembaɗ azɓai.

¹⁴ A i ksar ta te ndev ndohi herkeda man ta sun ɓai, a herkeda a nʼnde na hèshèkèɗ te deɓ tengaʼa, ndo a shèwèlè te pa azɓai. Ta ngwoda herkeda mbelaʼa aranta a hèshèkèɗ.