Zacharie 5 - Ma Zhiklè

Ɗèlèwèr man a hai

¹ A i ceda gèɗ a zhiklè zaʼa, a i pu dai: I rka ɗèlèwèr mpaɗaʼa man a hai, ara man kozlar a nhodo.

² A nengaʼa a ngaɗa: Ka rka mè? I mbeɗa na a ma: I rka ɗèlèwèr mpaɗaʼa man a hai, ara kozlar a hèdèʼa, ngur nengaʼa a tsi ri 20, nguzlo-haʼa a tsi ri 10.

³ Nengaʼa a ngaɗayè: Nasa ma mphömdè herkeda tèlèba. Aman nʼnzi a zhè metsarhi tèlèba ta ga kita ta ɓai, ar na. Nʼnzi a zhè, ndohi man ta mbèɗè a nzlembaɗ ga a ncèkèlma, ta ga kita tengaʼa ɓai, ar na.

⁴ Zhiklè bi mbiaʼa a gaɗa: I zlündo a gi ndo metsar, a gi ndo mʼmbèɗè a nzlembaɗ ga a ncèkèlma, a nzi te gi na, a ndeda gi a ma a wof ba a kwa ba.

Ngwoz te kokwi mpèv dau

⁵ Gol Zhiklè man a ngaɗkayè, a mshkè, a ngaɗayè: Ceda gèɗ a zhiklè, war kokwi mpèv dau man a gudoko ka va a dai.

⁶ I gaɗa: Ta gia kè? A nengaʼa a ngaɗayè: Nengaʼa mali tengaʼa te kokwar tèlèba.

⁷ Na haha, kwa a shkè auda a géɗ kokwi mpèv dau, a ngwoz a nza te pa.

⁸ Nengaʼa a ngaɗa: Nasa malai. A nkalda ngwoz a deɓa a kokwi mpèv dau, a nkalda na kwa a gèɗ, a mpizlè a vna.

⁹ Aman i ceda gèɗ a zhiklè, a i pu dai, i rka ngwozi cèw ta shkè, ta hi ara kozlar, kelpasl tengaʼa ara kelpasl mangayak massai. Ta co kokwi mpèv dau a ta zuɓda a zhiklè, a hwaɗ giɗfèk.

¹⁰ I dzhoɗo gol Zhiklè man a ngaɗkayè: Ta da kokwi a ma?

¹¹ Nengaʼa a mbeɗay a ma: Ta woy a ta rama na gi a ngwoz te pa, te kokwar Shinear. Aman ntila ma, ta da vokoɗa a sam nʼnzi na.