Zacharie 4 - Ma Zhiklè

Skwi nfi vogwa, a wof tsna

¹ Gol Zhiklè man a ngaɗkayè, a mshkè zaʼa, a ngaɗayè, ara man a piɗèkwedyè a nzhunè:

² Ka rka mè? I mbeɗa na a ma: I rka skwi nfi vogwa, nʼngaʼa a guro tèlèba, a skwi mɓèl mbar te géɗèʼa, a skwi man vogwa a vècè a pa tsaraɗ, a skwi man mbar a hi a pa tsaraɗ te géɗèʼa.

³ Wof tsna cèw a tsagi nengaʼa, staɗ te civèɗ ri mandai, staɗ te civèɗ ri gula.

⁴ A i gaɗa na gol Zhiklè zaʼa, man a ngaɗkayè: Bi ga, skwi haha skwi mè?

⁵ Gol Zhiklè man a ngaɗkayè, a mbeɗayè a ma, a ngaɗayè: Ka sun skwi haha ɓi ɗè? I gaɗa: Bi ga, i sun ɓai.

Zorobabel

⁶ Nengaʼa a mbedayè a ma: Nengaʼa ma Ndo nzi pèc pècèk a géɗ Zorobabel: A wuɗi ndo ka ɓai, a wuɗi-bi ka ɓai, sèi a Mèzhèɓ ga, Zhiklè bi mbiaʼa a gaɗa.

⁷ Ka za mbiaʼa, ka wa? A sam Zorobabel ka ndi a dalbara. Nengaʼa a da cko kwa ntatak auda, te deɓaʼa tèlèba ta da wuffe: Susai, susai, amba!

⁸ A i tsena ma Ndo nzi pèc pècèk:

⁹ Zorobabel a ri ria a mpau verzi kwa a gi haha, ri nengaʼa a da rufaʼa; a kin da suna, Zhiklè bi mbiaʼa a nzlindkayè a sam kinè.

¹⁰ Tengaʼa man ta rka nhin skwai ara skwi nkèshèʼa, ta da wuffè tèlèba, man ta rka kwa ntatak te ri Zorobabel. Di ntsaraɗa haha, di Ndo nzi pèc pècèk, man a ngél di a géɗ herkeda tèlèba.

¹¹ A i gaɗa na zaʼa: Wof tsnahi cèw te civèɗ ri mandai, te civèɗ ri gula a sam skwi nfi vogwa, mè?

¹² A i gaɗa na macecèwaʼa: A sam wof tsnahi, ri wofhi cèw, a sam man mbar a hakaɗa pa, te géɗèʼa, mè?

¹³ Nengaʼa a ngaɗayè: Ka sun skwi haha ɓi ɗè? I gaɗa: Bi ga, i sun ɓai.

¹⁴ Nengaʼa a ngaɗa: Nasa tengahi cèw, man i bada ta mbar a gèɗ, a ta zlècè a sam Bi Zhiklè herkeda tèlèba.