Zacharie 3 - Ma Zhiklè

Josué, ndo mvi skwi a Zhiklè mbiaʼa

¹ Te deɓaʼa a ngrayè, ara man Josuè, ndo mvi skwi a Zhiklè mbiaʼa, a nzlatsa a sam gol Ndo nzi pèc pècèk. Sadan a nzlatsa na a tsagai, te civèɗ ri mandai, a mpinèʼa.

² Aman gol Ndo nzi pèc pècèk a ngaɗa na Sadan: Ndo nzi pèc pècèk, da ga ka ndzoan, Sadan! A vava, Ndo nzi pèc pècèk man a ngotsko Jérusalem auda, da ga ka ndzoan! Nengaʼa shègwa man a mphkoɗauda te va vogwa ka ɓi ɗè?

³ Josuè, man a nzlatsa a sam gol Ndo nzi pèc pècèk, a maslaka nlizhèʼa a va.

⁴ Gola a ngaɗa ta golahi ntakaha a sam na: Va-suɗa na maslaka nlizhèʼa auda a va! A ngaɗa na: Na haha, i ca ka mali auda a va. Va-va na maslaka ngolala a va!

⁵ Va-paɗa na géɗ a maslaka mpa-naʼa! A ta paɗa na gèɗ a maslaka mpa-naʼa, a ta va na maslaka ngiɗè a va. Gol Ndo nzi pèc pècèk a nzlatsa a pa.

⁶ Gol Ndo nzi pèc pècèk a ngra na Josuè a vava, a ngaɗa:

⁷ Zhiklè bi mbiaʼa a gaɗa: Aman ka woy a ka dè a civèɗ ga, a ka da gi skwi tèlèba man i gaɗa ka, ka da kwèr gi ga a ka gi kita ndohi ga, a i ge ka a ndo nshèlèkuraʼa te va ndohi haha.

⁸ Josué, ndo mvi skwi a Zhiklè mbiaʼa, fu zlembaɗ! Kinè a gwoli man a tsagi ngaya, kinè ndohi malwuɗihai. Na haha, i woya a i cko ɓèl ga, ‘skwi man a fcè’.

⁹ Na haha, kwa man i fedahi a sam Josué, di a pa tsaraɗ. Na haha iyè i windè skwi a pa, Zhiklè bi mbiaʼa a gaɗa. I cè mali herkeda haha auda a pats staɗ.

¹⁰ A pats nasa, ngiɗè a da baha na ngiɗè a gorombi na, a skwi nʼndai, Zhiklè bi mbiaʼa a gaɗa.