Zacharie 2 - Ma Zhiklè

Ndo, a teɓa nliv skwai

¹ A i ceda gèɗ a zhiklè, a i pu dai: Na haha, ndo ngiɗè a teɓa nlivè skwai te ri na.

² A i gaɗa: Ka dè ma? Nengaʼa a mbeɗay a ma: I dè a i livè Jérusalem: ngur nengaʼa a da gi ngama, nguzlöhaʼa a da gi ngama.

³ A nasa nasa man gol Ndo nzi pèc pècèk man a ngaɗkayè, a mshkè, gol ngiɗè ba a mshkè a ta zli gèɗ a vna.

⁴ Gol sa a ngaɗa na: Hau a ka da gaɗa na ndo ngata: Jérusalem da nza a dalbara, zlazlar nengaʼa azɓai, te man ndohi a skwi man ta da nzi a pa kumba.

⁵ Iyè, a ri ga, i tèuda a pa ara zlazlar a vogwa, a nʼnjèl ga te ndevaʼa, Ndo nzi pèc pècèk a gaɗa.

Sion, sam mpshè ma

⁶ Ndo nzi pèc pècèk a gaɗa: Va-hakaɗai, va-hakaɗai, va-jèkeda kokwar man a géɗèʼa; aman i ɓic kinè te verzi herkeda faɗ, Ndo nzi pèc pècèk a gaɗa.

⁷ Kinè ndohi Sion te Babylone, va-mbelkaɗ kinè auda te pa!

⁸ Aman Zhiklè bi mbiaʼa a goɗ a géɗ ndohi man ta helama kinè skwi kinè: Ndo man a nlama kinè, a ntarayè ri a dai,

⁹ na haha, i cè ri a zhiklè, i tsiaʼa; a ɓèlèlihi tengaʼa ta helama ta skwi ta. A kin da suna, Zhiklè bi mbiaʼa a nzlindkayè.

¹⁰ Kokwar Sion, wuffa, gu langlangaʼa! Na haha i shkè a i nzi a ndev kinè, Ndo nzi pèc pècèk a gaɗa.

¹¹ A pats nasa ndohi herkeda kumba ta da gshè va a Ndo nzi pèc pècèk, a ta ndi a ndohi na. A nengaʼa a da nzi a ndev tengaʼa. A ka da suna, Zhiklè bi mbiaʼa a nzlindkayè.

¹² Ndo nzi pèc pècèk a da gi Juda a skwi na, te herkeda nkezlaʼa, a nda ngècè Jérusalem auda zaʼa.

¹³ Herkeda tèlèba da nza tètè a sam di Ndo nzi pèc pècèk! Aman anai a slèmbèɗè a sam nʼnzi na nkezlaʼa.