Zacharie 14 - Ma Zhiklè

Zhiklè a gi var te di man a Jérusalem

¹ Na haha, pats Ndo nzi pèc pècèk a shkè, ta da kezli skwi ɓèlè te ndev kinè.

² A i ɓic ta ndohi herkeda tèlèba, a ta gi var a Jérusalem, a ta duma kokwar; ta hil skwi te gai, a ta kala ta va a ngwozai. Rèta ndohi kokwar ta hel ta a ɓèlè, a kokwar ngiɗè; njèkèɗi ndohi ta nzi a kokwar dai.

³ Te deɓaʼa Ndo nzi pèc pècèk a da gi var a ndohi kokwar matsa, ara man a gu var pats ngiɗè.

⁴ A pats nasa sak nengaʼa a da zlècè a géɗ za Oliviers, mari a zhè a tsagi Jérusalem, te civèɗ mvèng pats. A za Oliviers a da cizl na zuraʼa, te civèɗ mvèng pats, te civèɗ nkèl pats, slrats mbiaʼa te ndevaʼa. A civèɗ ngiɗè a herda va na a deɓa a géɗèʼa, a civèɗ ngiɗè a herda va na a deɓa a duk-waɗ.

⁵ Va-hu a slrats za, aman slrats za a ndikè a Atsel. A kin hi kinè ara man kin hau, aman herkeda a ngudzau, te va man bi Ozias, bi Juda. Ndo nzi pèc pècèk, Zhiklè ga, a di a shkè a nda ndohi nengaʼa nkezla tèlèba.

Ndo nzi pèc pècèk a gi bai

⁶ A pats nasa, pats a hél sam asaɓai, sèi mtasl.

⁷ Pats nasa, pats azɓai, vaɗ azɓai, a dakwaɗ sam a hélè.

⁸ A pats nasa iyam nshèffè a hakaɗauda te Jérusalem, rèta ngiɗè a hi a woyam te civèɗ mvèng pats, rèta ngiɗè a hi a woyam te civèɗ nkèl pats. A gi arsa, ko a via, ko a ngwar.

⁹ Te deɓaʼa Ndo nzi pèc pècèk a gi bai a géɗ herkeda tèlèba. A pats nasa Ndo nzi pèc pècèk bi staɗgenè, nzlembaɗ nengaʼa staɗgenè.

¹⁰ Kokwar tèlèba a ndi a dalbara, a hinè te Guéba, ha ndè Rimmon, te tsagi Jérusalem. Kokwar a nzi falawaʼa a samaʼa, a hinè a ntamagi Benjamin, a tsoko gèɗ auda a ntamagi zlèzlèʼa, a ntamagi man ta derzla gèɗ a pa, a sam gi ngurèʼa Hananeel a ndè a klok bai.

¹¹ A ta nzi a pa, ma mphomaʼa a te pa ɓai, a Jérusalem a nzi a gumai.

¹² Na haha ara man Ndo nzi pèc pècèk a da bazl ta ndohi tèlèba, man ta gi var a Jérusalem: A gi a zluèɗ va tengaʼa a husl na, a di tʼuda. Di tengaʼa a huslka na auda te godobok dai. Nèʼèn tengaʼa a husl na auda te ma.

¹³ A pats nasa Ndo nzi pèc pècèk a pa ta zlau a gèɗ kumba. Staɗ staɗ tèlèba, ngiɗè a gshè ri ngiɗè, ngiɗè a gshè ri ngiɗè. Ngiɗè a cè ri a zhiklè a woya a ntsi ngiɗè.

¹⁴ Juda ba a da gi var a Jérusalem. A ndohi herkeda tèlèba ta ɓickoɗi skwi mèshèlè a tsagai, guro a verzhègenè a maslaka kumba kumba.

¹⁵ Matakwan a ga ta plèshihai, kɗèhihai, zlugumihai, a skwi ndzham ndohi var tèlèba arsa.

Jérusalem, sam ntsi rai

¹⁶ Njèkèɗi ndohi herkeda tèlèba man ta gu var a Jérusalem, a mvi a mvai ta da shkè, aman ta tsi ri a Bi Zhiklè, Zhiklè bi mbiaʼa, a ta gi ngolala te godzovok.

¹⁷ Verzi ndohi herkeda man ta dè Jérusalem azɓai, man ta tsi ri a Bi Zhiklè, Zhiklè bi mbiaʼa azɓai, iyam a gi a kokwar tengaʼa azɓai.

¹⁸ Aman ndohi te verzi Egypte ta dè a pa azɓai, a ta shkè azɓai, matakwan man Ndo nzi pèc pècèk a ga ta ndohi herkeda man ta dè a pa azɓai, a ngi ngolala te godzovok, a ga ta lèmèlèmè arsa.

¹⁹ Nasa matakwan man a da ga ta ndohi Egypte, man ta dè a ta gi ngolala te godzovok azɓai, lèmèlèmè ara ndzoan a géɗ ndohi herkeda tèlèba.

²⁰ A pats nasa ta windè a deɓ ngurlèlèi plèshihai: ‘nkezlaʼa a sam Ndo nzi pèc pècèk’. A shiɗèfi ambalai te gi Ndo nzi pèc pècèk, ta va na skwi te pa a Zhiklè, a sam mvi skwi a Zhiklè.

²¹ Shiɗèfi te Jérusalem, te Juda tèlèba, skwi nkezlaʼa a sam Zhiklè bi mbiaʼa. Ta tèlèba man ta zli skwi a Zhiklè, ta shkè, ta cèʼa, a ta ti skwi man ta va na Zhiklè te pa. A pats nasa, ndo a da gi gani te gi Zhiklè bi mbiaʼa asaɓai.