Zacharie 12 - Ma Zhiklè

Jérusalem, sam ngedeng-gedengaʼa

¹ Ma Ndo nzi pèc pècèk a géɗ Israel. Ndo nzi pèc pècèk, man a wuzhè giɗfèk, a gu herkeda, a vi mèzhèɓ a ndav ndo, a goɗ ar haha:

² Na haha, i gi kokwar Jérusalem a kokwi man skwi ndzakaɓama ta gèɗ a ndohi tèlèba ma a tsagi na, te pa. Na zhè a géɗ Juda ba, a pats man ta ɓica va a var a ma kokwar Jérusalem.

³ A pats nasa i gi Jérusalem a godokwom mbiaʼa, a ndohi herkeda tèlèba man ta woy a ta mbèlè auda, a cizlèma ta rai, a ndohi tèlèba ta da ɓicè va a géɗèʼa.

⁴ A pats nasa i pra ta zlau a va plèshi tèlèba; ndohi man a deɓ plèsh, i zeda ta maya ta, Ndo nzi pèc pècèk a gaɗa. Aman i pi di a maya a ndohi Juda. Plèshi ndohi herkeda tèlèba i ge ta a man-dazlai.

⁵ Te deɓaʼa ndohi te verzi Juda ta gèɗè a va ta: Ndohi Jérusalem ta ngècè wuɗai te ri Ndo nzi pèc pècèk, Zhiklè tengaʼa.

⁶ A pats nasa i ge ta ndohi Juda ara skwi nvècè vogwa ntsamaʼa, ara skwi ntiv vogwa te va pandar, a ta nde ta ndohi herkeda te civèɗ ri mandai, te civèɗ ri gula, tèlèba a ma. Aman Jérusalem a da nzi a samaʼa.

⁷ Nshèlèkuraʼa Ndo nzi pèc pècèk a da mbel ta ndohi gi Juda; a ndohi gi David a ndohi gi Jérusalem ta fi va asaɓai, a ta gèɗè asaɓai: nga fena Juda.

⁸ A pats nasa Ndo nzi pèc pècèk a da ɓer ta ndohi Jérusalem, a ndo man wuɗi na azɓai te va tengaʼa a gi lèmèlèmè ara David. A ndohi gi David lèmèlèmè ara Zhiklè; gol Zhiklè tsuvom tengaʼa.

⁹ A pats nasa i woya a i gi maya a i gedassa ndohi herkeda tèlèba, man ta gi var a Jérusalem.

¹⁰ A i bèdè mèzhèɓ pombai a mèzhèɓ ntsi rai a hai a géɗ ndohi gi David, a géɗ ndohi Jérusalem, a ta pi di a nengaʼa man ta tuzo, a ta kuɗiaʼa, ara man ta kuɗi kra nstaɗaʼa. Ta kuɗi tsek-tsekaʼa, ara man ta kuɗi tsuvom kra.

¹¹ A pats nasa wobau a zhè te kokwar Jérusalem, ara wobau Hadadrimmon a dal Megiddon.

¹² Herkeda tèlèba a gi wobau, gi staɗ staɗ tèlèba. Ndohi te verzi David a géɗ ta, a ngwozi ta a géɗ ta. Ndohi te verzi Nathan a géɗ ta, a ngwozi ta a géɗ ta.

¹³ Ndohi te verzi Lévi a géɗ ta, a ngwozi ta a géɗ ta. Ndohi te verzi Shimei a géɗ ta, a ngwozi ta a géɗ ta.

¹⁴ Gwoli ndohi ngiɗè tèlèba, ndohi te verzi ngiɗè ngiɗè tèlèba, a gèɗ ta, a ngwozi ta a géɗ ta.