Zacharie 11 - Ma Zhiklè

¹ Liban, winè ntamagi ngaya, a vogwa da ndeda wof tsna ngaya a ma!

² Tèngètè, kuɗau! Aman wof tsna, vogwa a ndeda ma, mbibihiaʼa ta gedassa ma. Gagaɗhai, va-kuɗau! Aman nhèyèwof ta ngelda ma.

³ Tsenaʼa! Ndohi nwèr skwai ta kuɗai, aman nʼnjèl tengaʼa ngedas na. Tsenaʼa! Marizhèlèhai ta kuɗai, aman nʼnjèl Jourdain ngedas na.

Tsaval ndo mɓer skwai

⁴ Ndo nzi pèc pècèk, Zhiklè ga, a goɗ ar haha: Do a ka ɓer skwi man ta zli daiaʼa,

⁵ man bab nsum ta a zliaʼa, kita azɓai. Tengaʼa man ta pre ta ma, ta gaɗa: Susai a Zhiklè! I ndo mèshèlè! A tambakihi ta si ndohi nwar ta te va azɓai.

⁶ Ndohi herkeda ta siyè te va ani asaɓai, Ndo nzi pèc pècèk a gaɗa. Aman i jèke ta ndohai, staɗ staɗ tèlèba, a ri a ndo nwar ta, a ri a bi ta, a ta gedassa herkeda, a i mbél ta te ri tengaʼa azɓai.

⁷ A i war tambakihi man ta woy a ta zli daiaʼa. I hui gadhi cèw. Staɗ i baha na ‘pombai’, ngiɗè i baha na ‘nhumdè va’. A i war ta tambakihi a vna.

⁸ A i dzam ta ndohi nwèr tambakihi makar auda te mi-zlinè, a ki staɗ. I ngeza a sam ta, a tengaʼa ba ta ngeza a sam ga.

⁹ I gaɗa: I woya a i war kinè asaɓai. Skwi man a mʼmetsai, da mets na. Skwi man a zi na, da ze na! Njèkèɗiaʼa, ta ndi va ta.

¹⁰ A i co gada ‘pombai’, a i paslaʼa, a i pra nderzlè-ma man i derzla a nda ndohi herkeda tèlèba.

¹¹ Mpraʼa a pats nasa. A ndohi nwèr tambakihai man ta pu di a iyè, ta suna, ma Ndo nzi pèc pècèk a ngau.

¹² I gaɗa ta: Aman ambaha kinè, va-vay skwi ntul ga! Aman ambaha kinè ɓai, va-jèkeda! A ta pelay suli gurso 30.

¹³ Ndo nzi pèc pècèk a ngaɗayè: Wusheda na va skwi mèshèlè! Skwi ntul ngaya mbiaʼa, man ta pel ka a vna! A i hul gurso 30, a i wusheda na va skwi mèshèlè te gi Ndo nzi pèc pècèk.

¹⁴ A i pasla gada macecèwaʼa ‘nhumdè va’, a i kezla ta gèɗ a Juda a Israel.

¹⁵ Te deɓa Ndo nzi pèc pècèk a ngaɗayè: Co gada fali ndo nwèr skwi zaʼa!

¹⁶ Na haha i da baha na ndo nwèr skwai te kokwar haha: a hèsh tambak man a ze na azɓai, a helka ta tambakihi man ta zlak ta azɓai, a va ta zungwa a sam skwi man sak mpasla azɓai, a wara na di a skwi man skwa a dza na, azɓai. A ndi zluèɗ ngraʼa, a pelasla ta kotèkwèr tengaʼa aussa.

Nhodko ma a géɗ ndo mɓer skwai

¹⁷ Wobau a géɗ ndo nwèr skwi man ambaɓai, man a jèke ta tambakihi a pa! Tsakwal a da tizhè riaʼa, a di ri mandi na. Ri nengaʼa da gwor na, di ri mandi nengaʼa da ngezl na!