Titus 3 - Ma Zhiklè

Ngi skwi man amba

¹ Fa ta ma a gèɗ, aman ta manda gèɗ ta a hai a sam bihai a gomnahai, a ta fi gèɗ a ma tengaʼa, a ta gi mizlinè man amba tèlèba,

² ta dérɗè ndo azɓai, ta gi ndav azɓai, ta woy va ta, ta ngreda ndav nlüɓekwaʼa auda a sam ndohi tèlèba.

³ Aman nga ba halaʼa maya nga azɓai, nga fi gèɗ a ma ndo azɓai, nga zlak nga, nga gu ɓèl skwi haha a ntétékè tsaɗ tsaɗ, a nga gu ndzoan a srak, ngiɗè a woy ngiɗè ɓai, ndohi ngiɗè ta ga nga shèwa, a nga ba nga gu shèwa a ndohi ngiɗè.

⁴ Aman a pats man pombi Zhiklè, Bi mʼmbel nga, a mwoy ndo nengaʼa a ngudko va a dai,

⁵ Zhiklè a mʼmbel nga, a géɗ skwi nzuraʼa man nga gu ka ɓai, aman a géɗ man ndo a sia te va. A mʼmbel nga, a mpan nga, a nye nga mɓuaʼa a wuɗi Mèzhèɓ Zhiklè nkezlaʼa,

⁶ man a va nga a ndav nga a vata te Yèsu Kristi, Bi mʼmbel nga.

⁷ Aman te pombi nengaʼa nga ngots ngi-zuraʼa, nga gaʼa a ndohi nʼndi nshèffe a mèdèp, te nzhèrè te ndav.

⁸ Ma haha ma nzuraʼa a vava. I woy a ka njè ma haha a wuɗai, aman ta ngats ta ndohi man ta co Zhiklè a ndav te ngi skwi man amba. Na haha amba, a takaha ndo.

⁹ Kazla ngay auda a sam mvirslè ambalai, a géɗ verzi nzlembaɗ ndo, ndzoan a mbèzl va a géɗ ma kita. Ta takaha ta ndohi azɓai, skwi ambalai.

¹⁰ Ndo man a kezli gèɗ ndohi Zhiklè, ngatsa na maya sak staɗ, man cèw, te deɓaʼa va-ckoɗauda te ndev kinè.

¹¹ Ka suna, ndo man a gi arsa, ngedassa klèng, a phomda va na a ri na.

Ma te ndav Paul a sam Tite

¹² Aman i zlinda ka Artémas, man ɓai Tychique, sèi ka shkè a sam ga tsam tsam a kokwar Nicopolis, aman i huro, i nzi a pa a via.

¹³ Zénas, ndo njèngè ma kita, a Apollos, va-va ta skwi a rai a ta ndi a civèɗ.

¹⁴ A woy ndohi nga ba da slebau, da gu mizlinè man amba, a ta takaha ta ndohi ngiɗè a vna, a skwi mbelaʼa a shkè auda te ncè-a-ndav tengaʼa.

Mpshè ma

¹⁵ Ndohi tèlèba, man ta zhè a sam ga, ta ga ka mbalai. Ga ta mbalai a ndohi tèlèba, man ta woy nga te ncè-a-ndav. Pombai da zhè a nda kinè tèlèba!