Titus 2 - Ma Zhiklè

Njè-ma Zhiklè man nzlerɗak a te pa ɓai

¹ Aman ka, goɗ skwi ara njè-ma man nzlerɗak a te pa ɓai!

² Gaɗa ta ndohi nhalaʼa, aman ta hér skwi man ta giaʼa, aman ta nzi lèɓèslèa, a maya, a ncè-a-ndav nzuraʼa, te mwoy-ndo a ndav, a ta zhèr skwia dai.

³ Gaɗa ta ngwozi nhalaʼa, aman ta nzi ara ndohi Zhiklè nzuraʼa: ta jèjèr madzagi azɓai, ta ɓèlèlihi zom ka ɓai, aman ta senda ta ndohi skwi man amba,

⁴ a ta njè ta dalahi ngwozai, aman ta woy baki ta, ta woy wudahi ta, a ndav amba,

⁵ a ta hér skwi nzuraʼa, a maya, mizlinè te gai ambaha ta, a ta fi gèɗ a ma baki ta. Man ta da gi arsa, ndohi ngiɗè ta dérɗè ma Zhiklè azɓai.

⁶ Lèmèlèmè golahai: fa ta ma a gèɗ, aman ta hér skwi nzuraʼa.

⁷ Gau skwi tèlèba, amba, aman ta slaha a ta pi di a ka, a ta lèmdè va ta a ka.

⁸ A ma man ncèkèl-ma a te pa ɓai, nlèɓèslèa, man nzlerɗak a te pa ɓai, a nzuraʼa. A ndo mayam agi horai, a ngècè ma ambaɓiaʼa a géɗ nga azɓai.

⁹ A woy ɓèlèlihai ta fi gèɗ a babgihi ta, te skwi tèlèba, a babgihi ta ta wuffè a géɗ tengaʼa. Ɓèlèlihi ta menda ta ma a gèɗ azɓai,

¹⁰ ta ngwèdè ri azɓai, aman ta lèɓèslè a sam tèlèba, aman ta slébèrdè ma Zhiklè Bi mʼmbel nga te skwi tèlèba.

¹¹ Aman pombi mʼmbel ndo te Bi Zhiklè a ngudoko ta va a dai a ndohi tèlèba,

¹² a ngatsa nga maya, aman nga jèkeda skwi man ambaha Zhiklè ɓai, a ntétékè herkeda, a nga nzi a nshèffè a géɗ herkeda haha, a nga hér skwi nzuraʼa, a maya, a nga gi zlau Zhiklè;

¹³ a wuffedè ndav nga, a nga zhèr pats man Bi mʼmbel nga Yèsu Kristi a ngudko va a di a nʼnjèl Zhiklè mbiaʼa.

¹⁴ Yèsu, man a vau va na a géɗ nga, aman a preka nga auda te mali tèlèba, a pènè ndav ndohi nengaʼa, a ta gi gazawa a géɗ mizlinè man amba.

¹⁵ Gaɗa ta ma haha, a ka fa ta a gèɗ. Ndo da rka ka ara ndo ambali ɓai!