Titus 1 - Ma Zhiklè

Mbalai

¹ Paul ɓèl Zhiklè, ndo sak Yèsu Kristi, aman i de ta ndohi man Zhiklè a mpar ta, a civèɗ Zhiklè, a ta cè a ndav, a ta shin ma nzuraʼa man a de nga,

² a ta zhèr nshèffè a mèdèp te ndav. Zhiklè – man a cèkèlma azɓai – a mpasla ta ri nshèffè sa a ndohi halaʼa.

³ Antanta man tiɗè sama ma a nʼngreda auda te njè-ma man a mvayè a rai, ara man Zhiklè, Bi mʼmbel nga a gaɗa,

⁴ a sam Tite, kra ga nzuraʼa te ncè-a-ndav, man nga co cèw ba. Pombai a gumai te Zhiklè, Bab nga, te Kristi Yèsu, Bi mʼmbel nga.

Mizlinè Tite te Crête

⁵ I jèke ka te kokwar Crête, aman ka til njèkèɗi mizlinè, a ka pi ndohi mɓer ndohi Zhiklè a kokwar staɗ staɗ tèlèba, ara man i gaɗa ka:

⁶ Ndo man ma az a gèɗ na ɓai, nguraʼa man ngwoz na staɗgenè, man wuda nengaʼa ta lèɓèslèʼa, a ta gi fali azɓai, a ta rzle va a gèɗ a ndo azɓai.

⁷ Aman ndo mɓer ndohi mizlinè Zhiklè, nengaʼa ara ndo mɓer skwi Zhiklè. Gar haha sèi man ma az a gèɗ na ɓai, ndo man a hér skwi nengaʼa genè ka ɓai, ndo man ndav a va ka ɓai, ndo njèjèr zom ka ɓai, ndo man a woy ma a ndo azɓai, ndo man a gi ri te skwi azɓai.

⁸ Aman ndo man a fi ndo a gai, mandai skwi man amba, a ndav amba, ndo nhér skwi nzuraʼa, a gi skwi man Zhiklè a woyaʼa, a gshè va na,

⁹ a gshè va a ma Zhiklè lèɓèslèʼa, ara man ta njèʼa, ndo man a ngots wuɗai, a slaha a mbid ta ndohi ngiɗè ba a njè-ma man nzlerɗak a te pa ɓai, a njè ta ma a gèɗ a ndohi ntseda na ma a pa, ha te deɓaʼa ta cè ma nengaʼa.

¹⁰ Ndohi man ta rzlè va a gèɗ a ndo, ndohi ntsi tsaval ambalai, ndohi mpi ndo a wai, ta zhè kumba, holholaʼa a sam ndohi Juif.

¹¹ Aman sèi nga tseda ta ma a pa, man ɓai ta gedassa gihi tèlèba a njè-ma tengaʼa ambaɓiaʼa, a njè-ma a géɗ man ta woy skwi te pa.

¹² Ndo nhadka ma staɗ te va tengaʼa a ngaɗa: Ndohi Crête, ndohi ncèkèlma pèc pècèk, skwi dakhi man ta ambaɓai, ndohi golahwaɗ.

¹³ Ma malwuɗi nengaʼa haha, a vava. Gar haha ga ta ndzoan, a nvata, aman ta cè a ndav zuraʼa,

¹⁴ a ta fi zlembaɗ a tsaval ma ndohi Juif, a tsaval ma ndohi man ta woy a ta pèkètede ta auda a civèɗ te ma nzuraʼa, azɓai.

¹⁵ A ndohi mpanaʼa, skwi tèlèba mpana. A ndohi man ta ca a ndav ɓai, skwi tèlèba nlizhèʼa; nhér gèɗ ta a mèzhèɓ ndav ta cèw ba.

¹⁶ Ta gaɗa, nga sun Zhiklè, aman te skwi man ta giaʼa, ta ngwè-dèʼa. Tengaʼa ndohi man ta ndara na Zhiklè, a ta fi gèɗ a ma nengaʼa azɓai, a mizlinè man amba ko staɗ ta slaha a ta gia ɓai.