Sophonie 3 - Ma Zhiklè

Jérusalem ngedas na

¹ Wobau a géɗ kokwar man a gi mèdègèɗ, nlizhèʼa, a gi wuɗai!

² A cinè ma ndo azɓai, a cè azɓai aman ta ngatsa na maya, a pa ndav a Ndo nzi pèc pècèk ɓai, a nherda na va a Zhiklè nengaʼa ɓai.

³ Wud bihi te kokwar nengaʼa, ta ara marizhèlè man ta kuɗkaɗai, ndohi kit a nengaʼa ara nvalavalhi a vaɗ, man ta jèkè skwi a hi a mangoslèm azɓai.

⁴ Ndohi nhadka ma nengaʼa, man ta fu va ta a falihai, ndohi ngi rai; ndohi mvi skwi a Zhiklè nengaʼa ta derɗa skwi nkezlaʼa, ta ngwoda ma kita.

⁵ Ndo nzi pèc pècèk te ndev tengaʼa, zuraʼa, a gi skwi zuraʼa ka ɓi azɓai. A prèk a prèk a bèzlè kita, skwi nhél sam na zhè, aman a ngreda malai.

⁶ I gedassa kokwar-bihai, gi ndohi ngurèʼa te va zlazlar kokwar ta mbeɗ ta, ndo a bizhè a civèɗ tengaʼa azɓai, ndo a shèwèlè te kokwar azɓai, kokwar tengaʼa ndumda ma, ndo a te pa ɓai, ndo a nzi a pa azɓai.

⁷ I gaɗa: Anai ta da gi zlau ga, ta da tsena man i ngatsa ta maya. A skwi man i ga ta ndzoan a pa, ta jèkeda, ta gi asaɓai. Aman ta vasko ngi skwi man ambaɓai.

⁸ Gar haha, va-zhèryè, Ndo nzi pèc pècèk a gaɗa, a pats man i slèmbèɗdè ndo malwuɗai, a i gi kita, a i ɓic ta ndohi herkeda, a i baha ta kokwar-bihai, a i ga ta ndzoan a va, a ndav ga man a dzay worworaʼa, a i gedassa kokwar tèlèba a srak man a ndèr a ndo ara vogwa.

⁹ Te deɓaʼa i da humbaɗda ta tapiɗaf ma ndohai, a i va ta tapiɗaf ma nlizhɓiaʼa, aman ta tèlèba ta tsi ri a nzlembaɗ Ndo nzi pèc pècèk, ta tèlèba ta mbi a mizlinè nengaʼa, a ndav staɗ.

¹⁰ Tʼwud woyam Ethiopie, ndohi ta da shkè a ta vay skwai.

Njèkèɗi ndohai

¹¹ A pats nasa ka ngècè hori a di azɓai a géɗ skwi man ambaɓai man ka gu a sam ga. A pats nasa i preka ta ndohi nfi va ngaya auda te va kinè, a ka grè gèɗ a géɗ za ga nkezlaʼa asaɓai.

¹² Aman i da jèkeda te va kinè ndohi man ta manda gèɗ a hai, ta az a vata ɓai, man ta fu nzlembaɗ Ndo nzi pèc pècèk a skwi mʼmbél ta.

¹³ Njèkèɗi ndohi Israel, skwi mèmè man skwi nzura ka ɓai, ta da gi asaɓai; ta cèkèlma azɓai; ta ngwèdè ndo azɓai. Ta wèr skwi ta, ta mènè a sam skwi ta, ndo a pra ta zlau a va azɓai.

Ndo nzi pèc pècèk, bai a géɗ Israel

¹⁴ Dem Sion, wuff mwuffè! Va-hazlawa a mwuffe, ndohi Israel! Dem Jérusalem, wuffa, gu langlangaʼa a ndav ngaya tèlè-ba!

¹⁵ Ndo nzi pèc pècèk a hela ka ndohi nderɗe ka auda a tsagai, a dzam ta ma-yamhi ngaya. Ndo nzi pèc pècèk, bi Israel, a zhè te ndev kinè, ngedèshè a da ga ka ani asaɓai.

¹⁶ A pats nasa ta da gèɗè te Jérusalem: Sion, ka gu zlau ɓai, skwi ngiɗè da wusheda ka ri a hi asaɓai!

¹⁷ Ndo nzi pèc pècèk, Zhiklè ngaya, a zhè te ndev kinè, nengaʼa ngulaʼa, man a mbél ndo. A wuffè kumba a géɗ ngaya, a woy ka zaʼa, mwuffe na a géɗ ngaya ara pats ngolala.

¹⁸ I cèma ka hori auda a dai, skwi man a phomde ka; i cèma ka skwi man a nzala ka a gèɗ.

¹⁹ Na haha i da zede ta ndohi tèlèba man ta ga ka matakwan – a pats nasa – a i da mbél skwi man vedal, a i ɓica skwi man ta ksaraʼa, a i va ta nʼnjèlè; a ndohi ta slebarde ta tʼherkeda tèlèba.

²⁰ A pats nasa i da hel kinè a deɓa a ngwai, a pats nasa i da ɓic kinè a deɓa. I woy a i va kinè nʼnjèlè, a ndohi herkeda tèlèba ta slèbèrdè kinè, aman i da helka kinè a deɓa te ɓèlè, a sam di ta – Ndo nzi pèc pècèk a gaɗa.