Sophonie 2 - Ma Zhiklè

Ga ndzoan Zhiklè

¹ Va-haya va, va-ɓica va, kinè nder-kèzhè ndohai,

² ga ta ksar kinè ara topok dau, ga ndzoan Ndo nzi pèc pècèk a kala kinè a va ara vogwa, a pats ndzoan Ndo nzi pèc pècèk a gedas kinè.

³ Va-woy Ndo nzi pèc pècèk, kinè te kokwar tèlèba, man kin manda gèɗ a hai, man kin jèjèr ma nkwèr nengaʼa. Va-woy skwi nzuraʼa, va-manda gèɗ u hai, wa ngiɗè ba pats ndzoan Ndo nzi pèc pècèk a da ngats kinè azɓai.

⁴ Gaza a da ndi a hèshèkèɗ. Askalon a da gedas na; ndohi Asdod ta da dzam ta a di pats. Ekron ta zedaussa.

Ndohi Kéreth

⁵ Wobau a géɗ ndohi a ma iyam mbiaʼa, kinè ndohi Kéreth! Ndo nzi pèc pècèk a goɗ a géɗ kinè: Canaan, kokwar ndohi Philistie, i da gedas ka, ndo a nzi a pa asaɓai.

⁶ Herkeda a ma woyam mbiaʼa a da ndi a sam man ndohi mɓer skwai ta wèr skwi a pa, a ta tsi zlazlar tambak a pa.

⁷ Sam a ma woyam mbiaʼa sa, njèkèɗi ndohi Juda ta da ngècèʼa, ta da wèr skwi ta a ma woyam mbiaʼa. A dakwaɗ ta da mènè te gi te kokwar Askalon. Ta pea ta a gèɗ a Ndo nzi pèc pècèk, Zhiklè tengaʼa, azɓai. A da helka ta ndohi a deɓa te ɓèlè.

Moab a Ammon

⁸ I tsenaʼa ara man Moab a livyè, a Ammon a derɗyè, tengaʼa man ta ngwossaha ta ndohi ga a ta fu va a ta gaɗa: kokwar haha mè?

⁹ A géɗ nengaʼa – ara man i zhè—Zhiklè bi mbiaʼa, Zhiklè Israel, a gaɗa – Moab a da ndi lèmèlèmè ara Sodome, a ndohi Ammon lèmèlèmè ara Gomorrhe, sam mbolombolo, sam blèm, a da nde na a hèshèkèɗ a mèdèp. Njèkèɗi ndohi ga ta da helama ta skwi a metsar, a njèkèɗi kokwar-bi ga ta da ndi gi tengaʼa.

¹⁰ Nasa skwi man a da ga ta a géɗ nfi va terigaʼa, a géɗ man ta derɗe ndohi Zhiklè bi mbiaʼa, a ta fi va a géɗ tengaʼa.

¹¹ Ndo nzi pèc pècèk a da gi skwi mwuɗitpa a sam tengaʼa, a da zede zhiklèhi mbèh skwi tengaʼa tèlèba tʼherkeda, a ndohi herkeda a ma woyam tèlèba ta da gurɓèhai a sam nengaʼa, staɗ staɗ tèlèba a sam nʼnzi na.

Ethiopie a Assyrie

¹² Kinè ba, ndohi Ethiopie! Tsakwal ga a da bazl kinè!

¹³ Te deɓaʼa a da gidè ri nengaʼa a civèɗ man a géɗèʼa, a da zede Assyrie, a da gedassa Ninive, a gwor na ara hèshèkèɗ.

¹⁴ Te ndevaʼa rèwè skwai a mènè a pa, skwi dak tsaɗ tsaɗ. A diki tengaʼa, diakihai a matakwas ta da nghé-dè va a pa. Wuzhèm a kuɗi a nvakavar, ngwak a ntamagai.

¹⁵ Nasa kokwar man a wuffè te va nasa, man a nza taraʼa, man a goɗ te ndav na: Iyè, ngar iyè azɓai. Nʼnde na hèshèkèɗ ma, sam man skwi dak a mènè a pa! Ndo man a bizhè a pa, ta pèrè a pa, ta tsi dali ngwèshè.