Ruth 4 - Ma Zhiklè

Boaz a ntamagi kokwar

¹ Boaz a mdo a ntamagi kokwar, a nʼnzahi a pa. A ndo man a slaha a ncè Ruth, man Boaz a nslefu a matsa, a mbeza a pa. A Boaz a mbaha na: Ɗakwa, mandai ga, washkèdai, nza a haha! A nengaʼa a mshkè, a nʼnzahai.

² A nengaʼa a mdo a mbaha ta ndohi kokwar nhalahiaʼa kula, a ngaɗa ta: Va-nzahi a haha! A ta nzahai.

³ A Boaz a ngaɗa na ndo man a slaha a ncè Ruth: Naomi, man a mshkè ngwi te kokwar Moab, a woya a prè gi dau Elimélek, gwoli nga.

⁴ A i huro, i woy a i ngreda ka ma haha: Suma, a sam di ndohi nhalaʼa te va ndohi ga, man ta nzi a haha. Aman ka woy a ka shumaʼa, suma! Aman ka woya ɓai, ngrayè, a i suna! Ndo man a slaha a nshumaʼa, sèi ka – iyè sèi te deɓaʼa. A nengaʼa a ngaɗa: I woy a i shumaʼa.

⁵ A Boaz a ngaɗa: A pats man ka da shum gi dau Naomi, ka cè Ruth, dem Moab, ngwoz kra Naomi man a mets na, a vaʼa, a ndè winko na di baki na man a mets na auda a nʼndi gi na.

⁶ A ndo man a slaha a ncèʼa, a ngaɗa: Aman aranta, i slaha a i shuma ɓai. Skwi man i gaɗa i shumaʼa, sum ar ka mènè! Iyè, i slaha a i shuma asaɓai. I gi zlau i da gedassa skwi nʼndi gi ga a vna.

⁷ Halaʼa ndohi Israel ta gu arsa: a sam man ta shum skwai, a sam man ta humbaɗa skwai, staɗ a nsuɗko kotokoroh na auda te sak, a va na ndo ngiɗè a skwi malwudai. Nasa skwi malwuɗi te Israel.

⁸ Aman ndo man a slaha a ncè Ruth a ngwoz, a ngaɗa na Boaz: Sum ar ka! – a nsuɗko kotokoroh na auda te sak.

⁹ Boaz a ngaɗa ta ndohi nhalaʼa, a ngaɗa ta ndohi tèlèba: A patsna kinè ndohi malwuɗihai, ara man i shum kolongwi Elimélek a kolongwi Maklon a Kiljon tèlèba te ri Naomi.

¹⁰ A i co Ruth, dem Moab, ngwoz Maklon a ngwoz mazai, aman a ndè winko na di baki na man a mets na auda, a nzlembaɗ nengaʼa a zi azbai te va kramamhi na, te va ndohi kokwar na. Kinè ndohi malwuɗihai a patsna.

¹¹ A ndohi tèlèba man ta zhè a ntamagi kokwar, a ndohi nhalaʼa, ta gaɗa: Nga ndohi malwuɗihai! Ndo nzi pèc pècèk da ga a ngwoz man a dè a gi ngaya lèmèlèmè ara man a gu a Rachel a Lea, man ta pu verzi Israel. Ga a ndo mbiaʼa te Ephrata, a ndohi do slubordo nzlembaɗ ngaya te Bethléhem!

¹² Gi ngaya da gu ara gi Perets, man Tamar a ya na Juda, a nda ndohi te verzi ngaya man Ndo nzi pèc pècèk a da va ka tʼhwaɗ dali ngwoz haha.

Boaz a nco Ruth a ngwoz na

¹³ A Boaz a nco Ruth, a Ruth a nʼnda a ngwoz na. Aman a mʼmana a vna, Ndo nzi pèc pècèk a ntakaha, a nʼngots kra, a nyu kra nguraʼa.

¹⁴ A ngwozi ta gaɗa na Naomi: Nga shid gèɗ a Ndo nzi pèc pècèk man a mva ka ndo nsuma ka skwi ngaya a deɓa. Sei ta slébèrdè nzlembaɗ nengaʼa te Israel!

¹⁵ Nengaʼa a nda fa ka gèɗ a gai, ka da mbelè a ndavaʼa, aman ka hala ma. Ngwoz kra ngaya man a woy ka, man a fena wud ngurhi ngaya tsaraɗ, nengaʼa a myau.

¹⁶ A Naomi a nco kra, a nhumbateda a ndav, a ngshèʼa.

¹⁷ A ngwozi a ntamagi nengaʼa ta va na nzlembaɗ nengaʼa, a ta gaɗa: Naomi a nyu kra. A ta baha na Obed. Nengaʼa bab Isai, bab David.

Ndohi te verzi Perets

¹⁸ Na haha ndohi nte verzi Perets: Perets a myau Hetsron.

¹⁹ Hetsron a myau Ram. Ram a myau Amminadab.

²⁰ Amminadab a myau Nakshon. Nakshon a myau Salmon.

²¹ Salmon a myau Boaz. Boaz a myau Obed.

²² Obed a myau Isai; Isai a myau David.