Ruth 2 - Ma Zhiklè

Ruth a pèr iyam dau te gi dau Boaz

¹ Te va gwoli baki Naomi, ndo ngiɗè a zhè, ndo mèshèlè, te verzi Elimélek, nzlembaɗ na Boaz.

² Pats ngiɗè Ruth, dem Moab, a ngaɗa na Naomi: Vay civèɗ a i dè a gi dau ndo man a nda tsay gumi a gèɗ, a i pèr iyam dau. A nengaʼa a ngaɗa na: Do, dem ga!

³ A nengaʼa a mdo, a pèr iyam dau a verzi ndohi man ta tsi dau. A Zhiklè a nkalda na a gèɗ a gi dau Boaz, te verzi Elimélek.

⁴ Na haha, Boaz a shkè te man a civèd Bethléhem. A ngaɗa ta ndohi ntsi dau: Ndo nzi pèc pè-cèk da nza a nda kinè! A ta mbeɗa na a ma: Ndo nzi pèc pècèk da pshè ka ma!

⁵ A Boaz a ngaɗa na ngul ndohi ntsi dau: Ngwoz haha, ngwoz ngè?

⁶ A ngul ndohi ntsi dau a mʼmbeɗa na a ma: Dem Moab man a shkè deɓa te kokwar Moab a verzi Naomi.

⁷ Nengaʼa a ngaɗa: I woy a i pèr iyam dau a verzi ndohi ntsi dau. A mshkè, daga man a prèk a ngu mizlinè, ha antanta, a nsaka va ɓai.

⁸ A Boaz a ngaɗa na Ruth: Tsenaʼa, dem ga! Ko do a gi dau ndo ngiɗè ɓai, aman a ka pèr iyam dau. Ka jèkeda sam nta ɓai. Nza a va dalahi mizlinè ga!

⁹ Dzodzor gi dau man ta tsi dau te pa, do a verzi tengaʼa. I gaɗa ta ndohi mizlinè ga aman ta lama ka azbai. Aman iyam a dza ka, do a sam duzlak a ka su a sam man ndohi mizlinè ta sia a pa!

¹⁰ A Ruth a ngurɓahai, a mfeda gèɗ a hai, a ngaɗa: Ka tsay gumi aranta èhèmè? Ka gaɗay ma nhènèkèa aranta èhèmè? Iyè, verzi man a ga tsaɗ.

¹¹ Boaz a mʼmbeɗa na a ma: Ta njèy skwi tèlèba man ka gu a sam mam baki ngaya, te deb mʼmetsi baki ngaya, ara man ka jèkeda bab ngaya a mam ngaya a kokwar gwoli ngaya, a ka shkè a sam ndohi man ka sen ta zlèzlèa ɓai.

¹² Ndo nzi pèc pècèk, Zhiklè Israel, man ka shkè a sam na, a ka nzi a hwaɗ kelpasl nengaʼa, da pela ka skwi man ka gau a skwi man amba zuraʼa.

¹³ A nengaʼa a ngaɗa: Ka tsay gumi aranta èhèmè, bi ga. Ka bidyè, ka gaɗayè ma nhènèkèa, i za dem mizlinè ngaya ka ɓai, a i ga ka mizlinè ngiɗè ka ɓai.

¹⁴ Man tidè sam skwi nʼndi ma, Boaz a ngaɗa na: Washkè a ka da ndau skwai, a ka da geda lak a movar! A Ruth a nʼnzahai a tsagi ndohi ntsi dau, a Boaz a ntsaka na movar. A Ruth a nʼndau, a nʼngeza na, a njèkaha.

¹⁵ Aman a nslambaɗa, a mpèr iyam dau zaʼa, Boaz a mfa ta ma a gèɗ a ndohi mizlinè na: Do por dau ko te ndev bak dau ba, kin gaɗa na ɓai!

¹⁶ Va-jèkaha dau a hwaɗ bak staɗ staɗ! Man nda poro, kin da ga na ndzoan a géɗè ɓai!

Ruth a njè na ma Boaz a Naomi

¹⁷ A Ruth a mpor dau ha dakwaɗ. Te debaʼa a nkezla skwi man a mporo, a nʼngotso agoda 20.

¹⁸ A mco, a nda a ngwai, a nʼngra na mam baki na skwi man a poro. A ngeda na skwi nʼndi man a jèkaha va na.

¹⁹ A mam baki na a ngaɗa na; A patsna ka por dau tema, ka gu mizlinè tema? Ndo man a mpaha ka dai, Zhiklè da pshè na ma a ma ma! A Ruth a nʼngra na sam man a gu mizlinè a pa a mam baki na, a ngaɗa: Ndo man i gu mizlinè a sam na, nzlembaɗ na Boaz.

²⁰ A Naomi a ngaɗa na ngwoz kra na: Ndo nzi pèc pècèk da pshè na ma, nengaʼa man a woy ndo, ko ndohi man ta zhè a nshèffè, ko ndohi man nshèffè ta klèng ma. A Naomi a ngaɗa na a vaʼa: Ndo sa, nte va gwoli nga. Nengaʼa a slaha a nsumka nga a deɓa.

²¹ A Ruth, dem Moab, a ngaɗa: Nengaʼa a ngadayè: Nza a va dalahi mizlinè ga, ha ta tsa dau tèlèba ma.

²² Naomi a ngaɗa na Ruth, ngwoz kra na: Dem ga, aman ka dè a verzi dalahi mizlinè nengaʼa, amba. Ta slaha ta ga ka skwi ambaɓiaʼa ara nte gi dau ndo ngiɗè azbai.

²³ A nengaʼa a nʼnza te va dalahi mizlinè Boaz, a mpèr iyam dau, ha ta tsa salawa a dau ba. A nengaʼa a nʼnza a sam mam baki na.