Ruth 1 - Ma Zhiklè

Ara man Ruth a shkè a kokwar Bethléhem

¹ Te ndev man ndohi kita ta kwor skwi tèlèba, a mi a ngu a kokwar. A ndo ngiɗè te kokwar Bethléhem te Juda a ntsokol va na a ngwoz na a wudahi nengaʼa cèw, aman a nda nzi a kokwar Moab ara mbrok.

² Nzlembaɗ ndo matsa Elimélek, nzlembaɗ ngwoz na Naomi, nzlembaɗ wudahi na Maklon a Kiljon – ndohi Ephrate te Bethléhem te Juda. A to do a kokwar Moab, a ta nza a pa.

³ A Elimélek, baki Naomi, a mʼmets na, a njèkeda ngwoz na a wudahi na cèw.

⁴ A wudahi ta hul ngwozi te va dalahi Moab, staɗ nzlembaɗ na Orpa, ngiɗè nzlembaɗ na Ruth. A ta nza a pa mvi kula.

⁵ Te deɓaʼa, ko Maklon a Kiljon, ta bazl ta cèw ba. A Naomi, te deb mʼmetsi baki na a wudahi na cèw, a nʼnza a géɗ na.

⁶ A nengaʼa a nslambaɗa a nda ngwozi wud na, a ta jèkeda kokwar Moab, te man Naomi a ntsena, Ndo nzi pèc pècèk a ntakaha ta ndohi na, a ta ngots skwi nʼndi ma.

⁷ Aranta a njèkeda sam man a nza a pa, a ngwozi wud na ta dzodzora. A civèd ndè a deɓa a kokwar Juda,

⁸ Naomi a ngaɗa ta ngwozi wud na: Anai va-men kinè a deɓa a ngwai, ngiɗè a gi bab na ngiɗè a gi bab na. Ndo nzi pèc pècèk da va kinè pombai ara man kin gu a sam ga a ndohi ga man ta bazl ta.

⁹ Ndo nzi pèc pècèk da va kinè baki ngiɗè, aman staɗ staɗ te ndev kinè a ngècè skwi na. A nhumbate ta a ndav. A ta hüno a ta kuɗai.

¹⁰ A ta gaɗa na: Aʼai, nga woy a nga dè a verzi ngaya, a nga dè a sam gwoli ngaya.

¹¹ Aman Naomi a ngaɗa: Va-men kinè a deɓa a ngwai, dalahi ga! Kin woy a kin dè a verzi ga èhèmè? I da ngècè kra za a nda gi a baki kinè ɗè?

¹² Va-men kinè a deɓa a ngwai, dalahi ga, vo-do! I hala ma, i slaha a i dè ngwoz asaɓai. Ko man i huro a i gaɗa: i da ngècè kra dai – aman a vad haha i dè ngwoz a gi ndo ngiɗè, a i ngècè kra,

¹³ kin woy a kin zhè-rèʼa, ha a ngra ma dè? Kin woy a kin nzi a gai a kin dè ngwoz di azɓi dè? Aʼai dalahi ga! Ndav ga a kuɗi a vata a géɗ kinè. Ndo nzi pèc pècèk a ngay matakwan.

¹⁴ A ta hüno a ta kuɗi holholaʼa. A Orpa a nhumbateda mam baki na a ndav, a mdo na a deɓa. Aman Ruth a ngso va a Naomi.

¹⁵ A Naomi a ngaɗa na:, Na haha, ngwoz kramam baki ngaya a mʼmena a deɓa a sam gwoli na, a sam zhiklèhi na. Anai ka ba, men gay a deɓa a verzi ngwoz kramam baki ngaya!

¹⁶ A Ruth a ngaɗa na: Ka didèy a gèɗ ɓai, aman i jèke ka, a i min ga a deɓa. A sam man ka dè a pa, i ba i woya man i dè a pa. A sam man ka nzi a pa, i ba i woya man i nzi a pa. Ndohi ngaya, ndohi ga. Zhiklè ngaya, Zhiklè ga.

¹⁷ A sam man ka da metsi ngaya a pa, i ba i da metsi a pa, a i woya aman ta riyè a vèvèɗ a pa. Ndo nzi pèc pècèk da gay ara man a woyaʼa – aman sèi mʼmetsai a da kezla nga.

¹⁸ Aman Naomi a rkaʼa, a tavassa na gèɗ genè, aman a dè a verzi nengaʼa, a ngaɗa na asaɓai.

¹⁹ A to do cèw a vna, ha ta ndikè a kokwar Bethléhem. Aman ta shkè a kokwar Bethléhem, te kokwar tèlèba ta wuffè a géɗ tengaʼa, a ngwozihi ta slefiaʼa: Na haha, Naomi ka ɓi ɗè?

²⁰ Aman nengaʼa a ngaɗa ta: Kin bahay Naomi asaɓai! Va-bahayè Mara, te man Zhiklè Bi wuɗai a mfahay matakwan nzhurtüktükoʼa.

²¹ I do te ngwai, skwi ga a zhè; Ndo nzi pèc pècèk a nckay a deɓa adai. Kin bahay Naomi èhèmè? Va-bahay Mara, te man Bi Zhiklè a ngay matakwan kumba.

²² Aranta Naomi a mʼmenkaɗa deɓa a ngwai te kokwar Moab, ta a Ruth, dem Moab, ngwoz kra na. Aman ta ndikè a kokwar Bethléhem, ndohi kokwar ta te va ntsi dau.