Romans 9 - Ma Zhiklè

Zhiklè a mpor ndohi Israel

¹ Iyè ndo Kristi, i gèɗ ma nzuraʼa, i cèkèlma azɓai, ara Mèzhèɓ Zhiklè nkezlaʼa man a gi malwuɗi te ndav ga.

² Nlèyè mbiaʼa a keɗyè, ndav ga a mbeɗè pèc pècèk.

³ Ar, i woy a ta phomdyè, a ta kezle nga a Kristi, te di man a kramamhi ga te verzi Israel, gwoli ga.

⁴ Tengaʼa wud Israel. Nʼnjèlè a nderzlè-ma Zhiklè a tengaʼa; ta ngots ma kita, a mizlinè Zhiklè a ma mpèsl rai.

⁵ Bababhi nte verzi tengaʼa. Te tengaʼa Kristi a nshkè, man a gu ara ndo; nengaʼa man a zhè a géɗ skwi tèlèba; nslébèrdè a Zhiklè a mèdèp. Amen.

⁶ Aman i goɗ ara man wuɗi ma Zhiklè azɓi ka ɓai. Aman ndohi tèlèba man ta shkè te Israel, ta ndohi Israel nzuraʼa tèlè ka ɓai.

⁷ Verzi Abraham, wud hwaɗ gi tèlè ka ɓai. Sèi ndo man a shkè te Isaac, ta baha na verzi ngaya,

⁸ ara man: Wudahi Zhiklè, tengaʼa ka ɓai, man ndo a yeka ta, aman sèi wudahi man ta yu te mpèsl rai, tengaʼa verzi Abraham zuraʼa.

⁹ Aman na haha ma mpèsl rai, man a gaɗa: A pats nasa Sara a da ngècè kra nguraʼa.

¹⁰ A sam Rebecca arsa. Nengaʼa a nʼngots kra: Isaac, Bab nga.

¹¹ Aman wudahi ta ye di ɓai, a ta ga skwi man ambaɓai a skwi man amba di ɓai – ara man Zhiklè a hur a woya a ngiaʼa,

¹² a géɗ man ndo a ngu ka ɓai, aman a géɗ man Zhiklè a mbaha ta,

¹³ ta gaɗa na a Rebecca: Tsuvomaʼa a da gi ɓèl ntabawaʼa, ara ɗèlèwèr Zhiklè a gaɗa: I woy Jacob, aman i gi shèwa a Esau.

¹⁴ Kos nga gèɗè kè? Zhiklè nzuraʼa ka ɓi ɗè? Aʼai!

¹⁵ Aman a ngaɗa na Moise: Ndo man i va na pombai, i va na pombai. Ndo man a siyè te va, a siyè te va.

¹⁶ Gar haha a gi azɓai a géɗ man ndo a woyaʼa, a géɗ man ndo a gi a wuɗi na, aman a géɗ Zhiklè man ndo a sia te va.

¹⁷ Aman ɗèlèwèr Zhiklè a ngaɗa na Pharaon: I ge ka, aman i ngrédè wuɗi ga a sam ngaya, aman ta njè nzlembaɗ ga tʼherkeda tèlèba.

¹⁸ Gar haha ndo a sia te va, ara ndav nengaʼa man a woyaʼa, a sassaya ndav ndo, ara man a woyaʼa.

¹⁹ Wa ngiɗè ba, ka gaɗayè: Man ar haha, Zhiklè a ga ta ndzoan a ndohi èhè-mè? Nslaha a nsala na va a di a Zhiklè wa?

²⁰ Ndo ga, ka wa, man ka woy a kin virslè a Zhiklè? Skwi nramaʼa a gaɗa na ndo nroma: Ka gyè ar haha èhèmè, ɗè?

²¹ Ndo nrèm shiɗèf a gi skwi man a woya a rbasl ka ɓi ɗè? A rèm ngiɗè mbelaʼa, a rèm ngiɗè ambalai.

²² Gar haha kin gèɗè a géɗ Zhiklè kè? Zhiklè a woya a ngreda ndzoan a wuɗi nengaʼa auda. Tengaʼa man ta ngrédè ndzoan nengaʼa auda, a zhèr ta genè, ha tiɗè sam man a gedassaʼa;

²³ a nʼngreda nʼnjèl nengaʼa mbiaʼa a sam nga man nga sia te va, man a til nga te va nshèlèkurhiaʼa a nʼnjèl na.

²⁴ Nga tengaʼa man a baha nga te ndev ndohi Juif genè ka ɓai, aman te ndev ndohi nte deɓa ba.

²⁵ Ara man a goɗ te ma Osée: I woy a i baha ta tengaʼa ndohi ga, man halaʼa ndohi ga ka ɓai, a i baha na nshib ga, man halaʼa nshib ga ka ɓai.

²⁶ A sam man ta gaɗa ta: Kinè ndohi ga ka ɓai, ta da baha ta wudahi Zhiklè man a zhè a nshèffè.

²⁷ Esaie a bèhè a géɗ Israel: Ko wudahi Israel ta mènè ara wyak a ma woyam mbiaʼa, sèi njèkèɗiaʼa kèshkata ta da mbél ta.

²⁸ Aman Bi Zhiklè a di a rufa skwi tèlèba man a huro, a géɗ herkeda tsam tsam.

²⁹ Ara man Esaie a goɗ halaʼa: Aman a matsa Zhiklè Bi-wuɗai a jèka nga tser nga zlèzlèa ɓai, ar nga lèmèlèmè ara Sodome a Gomorrhe.

Israel a kwola ma mbelaʼa

³⁰ Kos nga da gaɗ kè? Nga gèɗè aranta: Ndohi nte deɓa man ta woy ngi-zuraʼa ɓai, ta ngots ngi-zuraʼa ma. I gèɗ ma haha a géɗ ngi-zuraʼa man a shkè te ncè-a-ndav.

³¹ Aman ndohi Israel ta hoss ma kita, man a ge ta a ndohi nzuraʼa; aman ta ngotso te nengaʼa ɓai.

³² Ehèmè? A géɗ man ta woya te ncè-a-ndav ka ɓai, aman ta woya a skwi man ta giaʼa. Kwa ntse sak a ntsama ta sak,

³³ ara man ɗèlèwèr Zhiklè a gaɗa: Na haha, i geda kwa ntse sak ndo te Sion, a za man a slafaɗama ta sak. Ko wawa man a cè a ndav na, a ngècè hori a di azɓai.