Romans 8 - Ma Zhiklè

Nshèffè te Mèzhèɓ Zhiklè

¹ Anai Zhiklè a phomde ta ndohi man ta te Yèsu Kristi, asaɓai.

² A géɗ man ma kita Mèzhèɓ Zhiklè man a vi nshèffè te Yèsu Kristi, a mpreka ka auda te ma kita mali ma, man a da na ma a mʼmetsai.

³ Skwi man ma kita Zhiklè a slaha a ngia ɓai, te man wuɗi na azɓai a géɗ ndo, Zhiklè a ngau, aman a zlindkoɗi kra nengaʼa a géɗ malai, a nʼngaʼa lèmèlèmè ara ndo. Zhiklè a phomde mali te ndo;

⁴ a nga slaha nga gi skwi man ma kita Zhiklè a jhèdèʼa, man Mèzhèɓ Zhiklè a de nga, man nga jèjèr ntétékè nte va nga azɓai.

⁵ Aman ndohi man ta nzi ara nyakaɗ ta, ta hér ntétékè nte gada va ta. Aman ndohi man Mèzhèɓ Zhiklè a de ta, ta hér skwi Mèzhèɓ.

⁶ Skwi man ndohi ta hérèʼa, a da na ma a mʼmetsai. Skwi man Mèzhèɓ a hérèʼa, a da na ma a nshèffè, a gumai.

⁷ Aman skwi man ndo a hérèʼa ara nyakaɗ na, nengaʼa mayam Zhiklè, a fi gèɗ a ma kita Zhiklè azɓai, a slaha ɓai.

⁸ Aman ndohi man ta jèjèr ntétékè nte va tengaʼa, ta ambaha Zhiklè ɓai.

⁹ Aman kinè, kin nzi aranta azɓai, kin nzi te Mèzhèɓ Zhiklè, te man Mèzhèɓ Kristi a zhè te ndav kinè. Aman ndo man a ngatsa Mèzhèɓ Kristi ɓai, nengaʼa ndo Kristi ka ɓai.

¹⁰ Aman Kristi a zhè te ndav kinè, ko va kinè mʼmetsa a géɗ malai, aman Mèzhèɓ a mva kinè nshèffè a géɗ man kin gaʼa a ndohi nzuraʼa.

¹¹ Aman Mèzhèɓ Zhiklè man a slambaɗdeko Yèsu auda te ndev ndohi mʼmetsai a zhè te ndav kinè, Zhiklè man a slambaɗdeko Yèsu auda te ndev ndohi mʼmetsaʼa a da vi nshèffè a va kinè man tʼhwaɗ mʼmetsai, te Mèzhèɓ nengaʼa man a nzi te ndav kinè.

¹² Gar haha dalahimam ga, skwi halaʼa a slaha nga ɓai, nga jèjèr ntétékè nte va nga ndèzl azɓai.

¹³ Aman kin jèjèr ntétékè nte va kinè, kin da metsi kinè. Aman kin gedassa ntétékè nte va kinè a Mèzhèɓ, kin da nzi a nshèffè.

¹⁴ Ndohi tèlèba man Mèzhèɓ Zhiklè a de ta, tengaʼa wud Zhiklè.

¹⁵ Aman kin ngatsa Mèzhèɓ man a ga kinè ɓèlè ɓai, a kin gi zlau. Aman kin ngotso Mèzhèɓ man a ndeda kinè a wudahi Zhiklè man kin baha na Zhiklè: Abba, Bab nga!

¹⁶ Mèzhèɓ Zhiklè a ri na a gi malwuɗi a Mèzhèɓ te ndav nga, aman nga wudahi Zhiklè.

¹⁷ Aman nga wudahi na, nga ndohi man, ta ngècè skwi Zhiklè a nda Kristi; aman nga si matakwan a nda nengaʼa antanta, nga da ngècè nʼnjèlè nengaʼa te deɓaʼa.

¹⁸ Aman i huro, aman nga lèmdè matakwan man nga sia a géɗ herkeda haha, a nʼnjèlè te deɓaʼa te zhiklè te géɗèʼa man a zhèr nga, matakwan sa ara skwi ambalai.

¹⁹ Aman skwi man Zhiklè a gu tèlèba a zhèrèʼa, aman nʼnjèl wudahi Zhiklè a gedkaɗauda.

²⁰ Aman skwi tèlèba a nʼnde na a skwa ambalai (a géɗ man nengaʼa a woya ka ɓai, a géɗ man Zhiklè a woyaʼa).

²¹ Aman nga zhèrè te ndav, a da shkè auda te skwi man a gedassaʼa, man a dzawaʼa, a ngècè nʼnjèlè a var a man mpraʼa wudahi Zhiklè.

²² Nga suna, skwi tèlèba, ha antanta, a ɗish va, ara ngwoz man a yi kra.

²³ Aman nengaʼa genè ka ɓai; aman nga ba, tsuvomhiaʼa man nga ngots Mèzhèɓ Zhiklè, nga ɗishèʼa, a nga zhèrè ha pats man Zhiklè a ge nga a wud na, a mpra va nga tèlèba ma.

²⁴ Aman nga mbel nga ma; aman te nzhèr skwia dai. Skwi man nga rka ma, nengaʼa skwi man nga zhèrè asaɓai. Aman skwi man ndo a rka ma, a zhèrè za ɗè?

²⁵ Aman nga zhèr skwi te ndav, man nga rka a di di ɓai, nga nza a nga zhèrè genè.

²⁶ Lèmèlèmè Mèzhèɓ a takaha nga, te man wuɗi nga azɓai. Nga sun ntsi ri ara man ambaha Zhiklè ɓai, aman Mèzhèɓ Zhiklè a ri na a tsi rai te di man a nga, a kuɗi te ndav nga.

²⁷ Aman Zhiklè man a wuzhè ndav ndo, a sun skwi man Mèzhèɓ Zhiklè a woyaʼa, te man nengaʼa a nza ta a deɓa a ndohi nkezlaʼa, ara man Zhiklè a woyaʼa.

Nʼngul ndohai

²⁸ Aman nga suna, skwi tèlèba ta mbi a ma a ngi amba a sam tengaʼa man ta woy Zhiklè a ndav ta, a sam tengaʼa man Zhiklè a mpar ta, ara man a huro halaʼa.

²⁹ Zhiklè a sen ta ndohi na, aman ta az di ɓai, a mpau saba tengaʼa nshèlèkuraʼa, aman ta gi lèmèlèmè ara kra nengaʼa, a nengaʼa a gi a tsuvomaʼa te va kramamhi kumba.

³⁰ Ndohi man a mpau saha tengaʼa aranta, a mbaha ta. Ndohi man a mbaha ta, a ge ta a ndohi nzuraʼa. Ndohi man a nge ta a ndohi nzuraʼa, a mva ta nʼnjèl na.

³¹ Nga da gèɗè a va kè? Aman Zhiklè a zhè a nda nga, nda Sala nga va a di wa?

³² Nengaʼa a ntsotskava kra nengaʼa ɓai, aman a mvau a géɗ nga tèlèba, a da va nga skwi tèlèba a nda nengaʼa azɓi ɗè?

³³ Nwoya man a pin ta ndohi man Zhiklè a mpar ta wa? Zhiklè, nengaʼa a nge ta a ndohi nzuraʼa.

³⁴ Nslaha a mbèzlè kita wa? Kristi, nengaʼa man a mets na – zaʼa – man a slambaɗkaɗauda te ndev ndohi mʼmetsaʼa, man a nzi te civèɗ ri mandi Zhiklè, a nza nga a deɓa.

³⁵ Nslaha a nkezle nga te mwoy-ndo Kristi mè? Matakwan a zlau ɗè, ɗè man ta paraha nga ɗè, ɗè mi ɗè, ɗè nʼnzi adi ɗè, ɗè skwi mwuɗitpa ɗè, ɗè kafahi gwèsh ɗè?

³⁶ Ara man ɗèlèwèr Zhiklè a gaɗa: A géɗ ngaya ta keɗ nga pèc pècèk, ta pe nga a tambakihi man ta zlama ta daʼai.

³⁷ Aman te skwi haha tèlèba nga gi a ngulaʼa, a fena ndohi nʼngul skwi tèlèba, te Yèsu man a woy nga a ndav na.

³⁸ I sun a vava, ko mʼmetsai, ko nshèffe, ko golahi Zhiklè, ko bihai, ko skwi man a zhè a géɗ herkeda antanta, ko skwi man a di a shkè, ko wuɗihai,

³⁹ ko skwi nte géɗèʼa, ko skwi nte godok, ko skwi mèmè a slaha man a nkezle nga te mwoy-ndo Zhiklè ɓai, man a zhè te Kristi Yèsu, Bi nga.