Romans 7 - Ma Zhiklè

Ma kita Zhiklè, nlèmdaʼa a ma ncè ngwoz

¹ Kin sun bi ɗè, dalahimam ga (i gaɗa kinè, ndohi man kin sun ma kita Zhiklè), ma kita Zhiklè a gi bai a gèɗ ndo, man mʼmets di ɓai.

² A géɗ ma kita, ngwoz a slaha a njekeda baki azɓai, ha baki na a mʼmets na. Aman baki nengaʼa mʼmets na ma, ngwoz mpra ma te ma kita a géɗ baki na.

³ Gar haha, aman baki nengaʼa a zhè a nshèffè dai, a ngwoz a dè a gi baki ngiɗè, nengaʼa ngwoz mphomaʼa. Aman baki nengaʼa mʼmets na ma, nengaʼa mpra ma te ma kita, a ta baha na ngwoz mphomaʼa asaɓai, aman a dè a gi baki ngiɗè.

⁴ Lèmèlèmè kinè, dalahimam ga, kin mets kinè a ma kita Zhiklè te Yèsu Kristi. Kinè a ndo ngiɗè, a nengaʼa man a slambaɗkaɗauda te va ndohi mʼmetsaʼa, aman nga gi mizlinè man ambaha Zhiklè.

⁵ Aman nga nza a nshèffè ara nyakaɗ nga dai, ma kita a mpoko na gèɗ auda a ntétékè te va nga, a nga gu mizlinè mʼmetsai.

⁶ Aman antanta Zhiklè a mpre nga auda ma te ma kita nengaʼa, a nga mets nga a sam skwi man a dzaw nga hi ma, a nga gi mizlinè Zhiklè te Mèzhèɓ mɓuaʼa, a nga jèjèr ma mʼmovaʼa asaɓai.

Malai man a zhè te ndav ndo

⁷ Kos ani nga gaɗ kè? Ma kita mali ɗè? Azɓai! Aman ma kita a ngra nga malai. Aman agassa ma kita ka ɓai, ar i sun ntétékè ɓai.

⁸ Aman malai a hinè te verzi ma nkwèr tsaɗ tsaɗ, a yi ntétékè tsaɗ tsaɗ te ndav ga. Aman ma kita Zhiklè azɓai, mali a shinè azɓai.

⁹ Pats ngiɗè ma kita Zhiklè az a sam ga ɓai. Nshkè ma nkwèr Zhiklè, malai a dzodzorkoɗa te deɓa,

¹⁰ a iyè, i mets ga. Ma nkwèr Zhiklè man Zhiklè a vayè, aman i nzi a nshèffè, a dyè a mʼmetsai.

¹¹ Malai man a ngots civèɗ a sam ma nkwèr Zhiklè, a mbeɗyè a hai, a nkeɗyè a ma nengaʼa.

¹² Gar haha ma kita Zhiklè nkezlaʼa, ma nkwèr Zhiklè nkezlaʼa, ta amba, nzuraʼa, cèw ba.

¹³ Skwi man amba haha, a dyè a mʼmetsi ɗè? Azɓai! Aman malai a ndyè a mʼmetsai. A géɗ ma nkwer Zhiklè man amba, mali a ngedkaɗ na auda ara mali ma.

¹⁴ Nga suna, ma kita Zhiklè, ma Mèzhèɓ; aman iyè, ara nyakaɗ ga i ɓel malai.

¹⁵ Aman i sun skwi man i gia ɓai. Aman skwi man i woy a i giaʼa, i gi azɓai. Skwi man i woy i gia ɓai, i gia genè.

¹⁶ Aman i gi skwi man i woy i gia ɓai, kala man i co ma kita Zhiklè, ara man i gaɗa ma kita amba.

¹⁷ Aman iyè a ngu ka ɓai, aman malai man a zhè te ndav ga.

¹⁸ I suna, skwi man amba azɓai te ndav ga, te va ga. Woyo, i woya genè; aman wuɗi ga azɓai, a i gi skwi man amba.

¹⁹ Skwi man amba man i woy i giaʼa, i gi azɓai. Aman skwi man ambaɓai man i woy i gia ɓai, i giaʼa.

²⁰ Aman i gi skwi man i woy a i gia ɓai, iyè a ngu ka ɓai, aman malai nte ndav ga a ngau.

²¹ I ngotso ar haha: Aman i woy a i gi skwi man amba, skwi man ambaɓai a zhè a sam ga.

²² Ma kita Zhiklè te ndav ga a woy a ngi skwi man amba;

²³ aman i rka ma kita ngiɗè tsaɗ te nfèfèn va ga, man a gi var te nhér gèɗ ga, a ngiyè a ɓèlè a ma kita malai, man a zhè te va ga malai.

²⁴ Wobayè! Nda priyè auda te mʼmetsi sa wa?

²⁵ Sèi Zhiklè te Yèsu Kristi, Bi nga! I shid gèɗ a Zhiklè! Aman iyè, anai a nhér gèɗ ga i jèjèr ma kita Zhiklè, te va ga i jèjèr ma kita malai.