Romans 6 - Ma Zhiklè

Mʼmetsa a sam malai, a nshèffè te Kristi

¹ Kos nga gèɗè kè? Sèi nga gi mali a ma ma, a pombi Zhiklè a ngredè auda holholaʼa ɗè?

² Aʼai! Nga, man nga mets nga a sam mali ma, nga slaha nga gi mali a ma ma ɗè?

³ Kin sun ɓi ɗè, ko wawa man ta ga na baptême a nzlembaɗ Yèsu Kristi, ta humda a mʼmetsi nengaʼa.

⁴ Gar haha te baptême, nara man ta re nga a vèvèɗ a nda nengaʼa. Aman lèmèlèmè ara Kristi a nslambaɗkaɗauda te va ndohi mʼmetsaʼa, a sam nʼnjèl Bab na, lèmèlèmè nga, sèi nga dè te nshèffè mɓuaʼa.

⁵ Aman nga metsa a nda nengaʼa, nga slambaɗkaɗauda lèmèlèmè a nda nengaʼa.

⁶ Aman nga suna, nshèffè nga nzlèzlèa ngezlala a Yèsu, aman mali nga a ndev na, a nga gi ɓèl mali a ma ma asaɓai.

⁷ Ndo mʼmetsaʼa anai a gi mali asaɓai.

⁸ Aman nga mets nga a Kristi, nga co a ndav nga, nga da nzi a nshèffè a nda nengaʼa.

⁹ Aman nga suna, Kristi a nslambaɗkaɗauda te va ndohi mʼmetsaʼa, anai a metsi a gi bi a gèɗ nengaʼa asaɓai.

¹⁰ Mʼmetsi nengaʼa man a mets na a gèɗ malai, sak staɗgenè, te deɓaʼa klèng, nshèffè nengaʼa man a nzi a vna, man a Zhiklè.

¹¹ Gar haha kinè ba, va-rka va kinè ara man a mets na a sam mali ma, a kin nzi a nshèffè man a Zhiklè te Yèsu Kristi.

¹² Gar haha malai da gu bi te va kinè, man a di a metsi na, asaɓai, a kin dzodzor ntétékè nengaʼa ɓai!

¹³ Kin pa na nfèfèn va kinè a malai a ngi skwi ambaɓiaʼa a vna ɓai! Aman va-vau va kinè a Bi Zhiklè a ri kinè, ara ndohi mʼmetsaʼa, man antanta ta zhè a nshèffè. Va-pa na nfèfèn va kinè a Zhiklè a ngi skwi nzuraʼa a vna.

¹⁴ Malai a slaha a nda gi bi kinè asaɓai, te man kinè tʼhwaɗ ma kita Zhiklè ka ɓai, aman kinè tʼhwaɗ pombai.

Ngi skwi nzuraʼa

¹⁵ Kos ani kè? Aman nga tʼhwaɗ ma kita ɓai, nga tʼhwaɗ pombi ma, nga gi mali za ɗè?

¹⁶ Azɓai! Kin sun ɓi ɗè, a sam ndo man kin fi gèɗ a ma nengaʼa, kin gi ɓèl nengaʼa. Gar malai, man adè a mʼmetsai, gar nfi gèɗ man a dè a ngi-zuraʼa.

¹⁷ Aman nga shid gèɗa Zhiklè, kinè man ɓèlèlihi mali te va nasa, kin fu gèɗ a ndav tèlè a ma man ta njè kinè.

¹⁸ Kin pra te ri mali ma, a kin ga a ɓèlèlihi skwi nzuraʼa.

¹⁹ I gèɗ ma ara ndohai man ta gèɗèʼa. Lèmèlèmè ara man kin vau nfèfèn va kinè a ɓèlèlihi skwi nlizhèa, skwi ambaɓiaʼa, man ta gi mphömè a vna, lèmèlèmè antanta va-vau nfèfèn va kinè a ɓèlèlihi ngi-zuraʼa, a nshèffè nkezlaʼa.

²⁰ Te va man kinè ɓèlèlihi malai, skwi nzuraʼa az a sam kinè ɓai, kin ngats mè?

²¹ Skwi mar antanta kin gi hori a géɗèʼa. Aman nʼndikèma nengaʼa, mʼmetsai.

²² Aman antanta, kin pra te mali ma, a kin gi ɓèlèlihi Zhiklè, skwi ntul kinè, nshèffè nkezlaʼa. Nʼndikèma nengaʼa, nshèffè a mèdèp.

²³ Skwi ntul malai, mʼmetsai. Aman skwi man nga ngècè te ri Bi Zhiklè, ambalai, nshèffè a mèdèp te Kristi Yèsu, Bi nga.