Romans 5 - Ma Zhiklè

Skwi man a shkè auda te ngi-zura a

¹ Aman anai nga gaʼa a ndohi nzuraʼa te ncè-a-ndav, nga ngots gumi Zhiklè, te Bi nga Yèsu Kristi.

² Te Yèsu, a ncè-a-ndav, nga ngots civèɗ pombi haha. Nga-wuffokoya, a nga zhèr nʼnjèl Zhiklè te ndav, man a di a shkè, man Zhiklè a da va nga.

³ A va zaʼa: Nga-wuffokoya a géɗ skwi mwuɗitpa, te man nga suna, skwi mwuɗitpa a gi aman nga zhèr skwia dai.

⁴ A géɗ man nga zhèr skwia dai, nga nzi taraʼa; a géɗ man nga nzi taraʼa, nga zhèrè te ndav.

⁵ Nzhèrè te ndav a pa nga hori a di azɓai, te man mwoy-ndo Zhiklè a zhè te ndav nga te Mèzhèɓ nengaʼa nkezlaʼa man a mva nga.

⁶ Aman Kristi a mʼmets na a géɗ nga, te va man wuɗi nga az di ɓai; tiɗè sama ma, Kristi a mʼmets na a géɗ ndohi man wuɗi ta azɓai.

⁷ A géɗ ndo nzuraʼa, ndo a woya a nvi nshèffe azɓai. A géɗ ndo man amba, ar a slaha a mvi nshèffè genè.

⁸ Aman Zhiklè a ngreda mwoy-ndo nengaʼa a sam nga, te man Kristi a mʼmets na a géɗ nga, aman nga ndohi malihi dai.

⁹ Holholaʼa a da ɓir nga a sam ndzoan Zhiklè, te man antanta nga gaʼa a ndohi nzuraʼa te Pombaz nengaʼa.

¹⁰ Aman Zhiklè a mʼmenda gumi a hai te mʼmetsi kra nengaʼa, te va man nga mayamhi Zhiklè dai, holholaʼa antanta, man gèɗ nga mpela ma, nga da mbel nga te nshèffe nengaʼa.

¹¹ Aman klèng di ka ɓai. Aman nga wuffè a géɗ Zhiklè te Bi nga Yèsu Kristi, te nengaʼa nga ngots skwi mʼmindè gumi a hai.

A dam a Kristi

¹² Gar haha ara man a géɗ ndo staɗ malai a mshkè a herkeda, a mʼmetsai a mshkè a géɗ malai, mʼmetsai a zlèzlèmè a géɗ ndohi tèlèba, a géɗ man ta tèlèba ta gu malai.

¹³ Aman malai a zhè tʼherkeda, ga ma kita Zhiklè a shkè. Aman a sam man ma kita Zhiklè azɓai, ta fa na gèɗ a mali azɓai.

¹⁴ Mʼmetsai a ngu bai, a hün te Adam, ha nda na ma a Moise, a géɗ ndohi tèlèba, a géɗ tengaʼa ba, man ta ga mali ièmèlèmè ara Adam ɓai. Adam nara ndo man a di a shkè dai.

¹⁵ Aman pombi man Zhiklè a mvau, a lèmdè a mali azɓai. A géɗ mali ndo staɗ, ndohi kumba ta bazl ta; aman pombi Zhiklè a zlèzlèmè holholaʼa a géɗ pombi ndo staɗ, Yèsu Kristi, man ndohi kumba ta ngotso.

¹⁶ Mba skwi man Zhiklè a vau, a géɗ skwi ngedassaʼa a géɗ mali ndo staɗ. Aman kita mali ndo staɗ a dè a sam mphomdaʼa. Aman pombai a takaha ta ndohi malihi kumba, a ta ndi a ndohi nzuraʼa.

¹⁷ Aman a géɗ mali ndo staɗ, mʼmetsi a gi bai, mba bi tengaʼa man ta ngècè pombi mbiaʼa te nshèffè ta, a ngi-zura Zhiklè, a géɗ ndo staɗ, Yèsu Kristi.

¹⁸ Ara man mali ndo staɗ a de ta ndohi tèlèba a sam mphomdaʼa, ngi skwi nzuraʼa ndo staɗ ba, ngi-zuraʼa man a vi nshèffè a ndohi tèlèba.

¹⁹ Ara man a géɗ ndo staɗ, man a gu mèdègèɗ, ndohi kumba ta gaʼa a ndohi malihai, a gèɗ ndo staɗ, man a fa na gèɗ, ndohi kumba ta ngècè ngi-zuraʼa.

²⁰ Aman ma kita Zhiklè a gu aman malai a ngredè auda holholaʼa. A sam man malai nʼngreda auda holholaʼa, pombi ba nʼngreda a fenaʼa.

²¹ Aman Ièmèlèmè ara malai a gu bai a mʼmetsai, lèmèlèmè pombi ba a da gi bai a ngi-zuraʼa a nshèffe a mèdèp, te Yèsu Kristi, Bi nga.