Romans 4 - Ma Zhiklè

Skwi man Abraham a gau

¹ Nga gèɗè kè a géɗ skwi man Abraham, bab nga, te verzi babab nga, a ngotso.

² Nga gèɗè aranta: Aman agassa Abraham nʼnga a ndo nzuraʼa a sam di Zhiklè a géɗ skwi man a gau, ar a slaha a njégèr va. Aman a sam di Zhiklè a slaha ɓai.

³ Ɗèlèwèr Zhiklè a gaɗ kè? Abraham a nco Zhiklè a ndav na; a géɗ ncè-a-ndav nengaʼa Zhiklè a nfu a ndo nzuraʼa.

⁴ Aman ndo ngiɗè a gi mizlinè, sèi ta va na skwi ntul na, ta va na ambali ka ɓai.

⁵ Aman ndo man a gi skwi ngiɗè azɓai, sèi a cè nengaʼa a ndav man a ge ta ndohi nderɗe Zhiklè a ndohi nzuraʼa, Zhiklè a fi a ndo nzuraʼa, a géɗ ncè-a-ndav nengaʼa.

⁶ Lèmèlèmè ara David a gaɗa: mwuffè a sam ndohi tèlèba, man Zhiklè a ge ta a ndohi nzuraʼa, a géɗ skwi ngiɗè ka ɓai, a gaɗa:

⁷ Mwuffè a sam ndo man mali nengaʼa mpraʼa, man mphömè nengaʼa mpizlèda pa.

⁸ Mwuffè a sam ndo man Bi Zhiklè a ngér mali nengaʼa asaɓai.

⁹ Mwuffè haha a ndohi man ngwon nʼngela genè ɗè, ɗè a ndohi man ngwon nʼngel ɓi ba ɗè? Nga gaɗa: A sam Abraham, Zhiklè a nfu ncè-a-ndav nengaʼa a ngi-zuraʼa nengaʼa.

¹⁰ Ara mè? A géɗ man a ngela ngwon ɗè, ɗè a géɗ man a ngela ngwon ɓi ɗè? A vava: a géɗ man a ngela ngwon ka ɓai, te man a nʼngela ngwon di ɓai.

¹¹ Skwi malwuɗi te nʼngél ngwon nengaʼa a nʼngotso sèi te deɓa, man Zhiklè a nʼngaʼa a ndo nzuraʼa man a nco a ndav ma, a nʼngotso man a ngela ngwon di ɓai. Arsa nʼngaʼa a bab ndohi tèlèba man ta cè a ndav, man ta ngél ngwon ka ɓai. Aman ncè-a-ndav tengaʼa a nge ta a ndohi nzuraʼa.

¹² Lèmèlèmè nʼngaʼa a bab ndohi man ngwon nʼngela, ndohi man ta hér nʼngél ngwon genè ka ɓai, aman ta jèjèr ncè-a-ndav man a zhè halaʼa te Abraham, bab nga, aman a ngela ngwon di ɓai.

Mpesl ri nʼngaʼa te ncè-a-ndav

¹³ Abraham a ndohi te verzi nengaʼa ta ngots mpèsl rai, aman ta ndi a ndohi nʼndi herkeda. Ta ngatsa te ma kita ɓai. Aman ta ngotso a géɗ ncè-a-ndav man a ge ta a ndohi nzuraʼa.

¹⁴ Aman ndohi ngshè va a ma kita ta ngèce skwi Zhiklè, ar ncè-a-ndav skwi ambalai, ma mpèsl ri ba skwi ambalai.

¹⁵ Aman ma kita Zhiklè a cka sèi ndzoan. Aman a sam man ma kita azɓai, ntèwèɗè ma kita ba, azɓai.

¹⁶ Gar haha ngi-zuraʼa a shkè sèi a géɗ ncè-a-ndav. Arsa skwi man ta ngèce te pombai, a ma mpèsl ri da nza a sam ndohi nte verzi Abraham tèlèba, a sam ndohi ntʼhwaɗ ma kita genè ka ɓai, aman a sam tengaʼa ba, man ta co a ndav ara Abraham. Nengaʼa bab nga tèlèba, ara man ta Windo te ɗèlèwèr Zhiklè:

¹⁷ I ge ka a bab ndohi herkeda kumba, a sam di Bi Zhiklè, nengaʼa man ka co a ndav, man a va ta nshèf-fè a ndohi mʼmetsaʼa, a mbaha na skwi man azɓai, a zhè.

¹⁸ A sam man skwi man a zhèrè te ndav azɓai, Abraham a nzhor te ndav genè. Ncè-a-ndav nengaʼa arsa, a nʼngaʼa a bab ndohi herkeda kumba, ara man ta goɗ a sam na: Ndohi nte verzi ngaya ta arsa.

¹⁹ Wuɗi ncè-a-ndav nengaʼa a zhè genè, ko a mpu di a va nengaʼa man nhala ma (a slaha a nyi kra asaɓai, mvi nengaʼa ndul ndul a gi 100; ko Sara ba nhala ma).

²⁰ A mpa gèɗ cèw ɓai, a nco ma mpèsl ri Zhiklè a ndav, a nʼngots wuɗai te ncè-a-ndav, a nslubordo Zhiklè,

²¹ a suna zuraʼa a vava: skwi man Zhiklè a posl ri a géɗèʼa, a slaha a ngiaʼa.

²² Gar haha ncè-a-ndav nengaʼa, Zhiklè a nfu a ngi-zuraʼa nengaʼa.

²³ Ma haha ta Windo a géɗ nengaʼa genè ka ɓai, aman a géɗ nga ba.

²⁴ Zhiklè a da rka nga arsa, aman nga co a ndav, a nslambaɗdekoɗa Yèsu, Bi nga, auda te ndev ndohi mʼmetsaʼa.

²⁵ Nengaʼa man Zhiklè a njèka na a ri a mʼmetsai a géɗ malihi nga, a nslambaɗde-koɗauda, aman nga ndi a ndohi nzuraʼa a sam di Zhiklè.