Romans 3 - Ma Zhiklè

¹ Kos ndo Juif a fena ndo ngiɗè a mè? Nʼngél ngwon kala mè?

² Amba te skwi tsaɗ tsaɗ. Nshèlèkuraʼa: Zhiklè a mva ta ma nengaʼa a ri a ndohi Juif.

³ Kos man ndohi ngiɗè ta ca a ndav ɓai, ta slaha ta gedassa nlèɓèslè Zhiklè ɗè?

⁴ Arsa ka ɓai: Aman Zhiklè nzuraʼa, a ndohi tèlèba ndohi ncèkèlma, ara ɗèlèwèr Zhiklè a gaɗa: A géɗ man ta ngècè ngi-zuraʼa te ma ngaya; a ka gi a ngulaʼa, aman ta versl ma a ka.

⁵ Aman skwi man nga ga zuraʼa ɓai, a ngredè ngi-zuraʼa Bi Zhiklè auda, kos nga da gèɗè kè? Aman Bi Zhiklè a gi ndav a géɗ nga, kos Bi Zhiklè zura ka ɓi ɗè? I gèɗ ma sata ara ndohai.

⁶ Aʼai! Man Zhiklè nzura ka ɓai, a slaha man a gi kita herkeda ɗè?

⁷ Aman ncèkèlma ga a ngredè ma Zhiklè nzuraʼa auda holholaʼa, a nʼnjèl na, ar ta gay kita ara man i ndo mali èhèmè?

⁸ Ar ta gèɗèʼa: ngo-gokoy skwi man ambaɓai, aman skwi mbelaʼa a shinè te pa! —ara ndohi ngiɗè man ta tsa nga derngasl. Aman Zhiklè a phomde ta ndohi arsa, amba a vava.

Ndo nzura a azɓai

⁹ Kos kè? Nga ndohi Juif, nga fen ta ɗè? Azɓi fèt! A matsa nga ngrede ma, ara man ndohi Juif a ndohi Grec cèw ba ta tʼhwaɗ malai,

¹⁰ ara man te ɗèlèwèr Zhiklè mwindèʼa: Ndo nzuraʼa azɓai, ko staɗ ba.

¹¹ Ndo azɓai, man maya na a zhè, ndo azɓai, man a jhèɗè civèɗ Zhiklè.

¹² Ta zlak ta tèlèba, ta gedas ta tèlèba, ndo man a gi skwi man amba azɓai, ko staɗ ba.

¹³ Vèvèɗ daʼai tengaʼa nara gi dzavi mwina fuwangaʼa. Nèʼèn tengaʼa, nèʼèn ncèkèlma.

¹⁴ Ma tengaʼa, nara dèrè zhü-zhok. Ma tengaʼa ma ndérɗè ndo.

¹⁵ Ta wosla te sak aman ta dè a ta keɗ ndo.

¹⁶ A civèɗ tengaʼa, sèi skwi ngedassaʼa, a nlèyè.

¹⁷ Ta sun civèɗ gumi ɓai.

¹⁸ Zlau Zhiklè az a sam ta ɓai.

¹⁹ Aman nga suna: Ma kita Zhiklè a ngaɗa ta ma a ndohi man ta tʼhwaɗ ma kita, aman a pizlèma ta ma a ndohi tèlè. A herkeda tèlèba ntʼhwaɗ kita Zhiklè.

²⁰ Gar haha a njèjèr ma kita Zhiklè, ndo a slaha a ndi a ndo nzuraʼa a sam di Zhiklè azɓai. Te ma kita Zhiklè, ndo a sun mali genè.

²¹ Anai, ko ma kita Zhiklè azɓi ba, ngi-zuraʼa Zhiklè nʼngurdkoɗauda ma a malwuɗi te ma Zhiklè, te ndohi nhadka ma.

²² I gèɗè a géɗ ngi-zuraʼa a sam di Zhiklè, man a shkè te ncè Yèsu Kristi a ndav, a sam ko wawa man a cè a ndav.

²³ A sata tsaɗ tsaɗ azɓai: ta tèlèba ndohi malihai, nʼnjèl Zhiklè, ara man Zhiklè a woyaʼa, az a sam ta ɓai,

²⁴ a ta ngots ngi-zuraʼa te pombi nengaʼa, a géɗ Yèsu Kristi, man skwi mpil gèɗ; a géɗ mizlinè ndohi ka ɓai.

²⁵ Nengaʼa Zhiklè a fu a skwi mpil gèɗ te Pombaz nengaʼa, man nga ngècè te ncè-a-ndav. Zhiklè a woya a ngredè ngi-zuraʼa nengaʼa auda a vna. Te nzhèr skwi nengaʼa dai, a nzuɓ malihi nhalaʼa.

²⁶ Aman a patsna a ngreda ngi-zuraʼa nengaʼa, ara man nengaʼa nzuraʼa; ko wawa man a cè Yèsu a ndav na, nʼnga a ndo nzuraʼa.

²⁷ Anai njégèr va ndohi a géɗ mè? Sama asaɓai. A géɗ skwi mè? A géɗ njèjèr ma kita ɗè? Azɓai! Aman a géɗ ncè-a-ndav.

²⁸ Arsa nga suna, ndo a ngècè ngi-zuraʼa sèi te ncè-a-ndav staɗgenè, a géɗ man a jèjèr ma kita Zhiklè ka ɓai.

²⁹ Bi Zhiklè, sèi Zhiklè ndohi Juif ɗè? Zhiklè ndohi herkeda nte deɓa ba ka ɓi ɗè? Halau, Zhiklè ndohi herkeda nte deɓa ba.

³⁰ Aman Zhiklè staɗgenè, man a ge ta ndohi Juif a ndohi nzuraʼa te ncè-a-ndav, a ndohi nte deɓa ba arsa.

³¹ Kè? A ma ncè-a-ndav, nga gedassa ma kita Zhiklè auda ɗè? Azɓai! Aman nga nzala ma kita Zhiklè.