Romans 2 - Ma Zhiklè

Kita Zhiklè nzuraʼa

¹ Gar haha ka ndo, ko wawa man ka bèzlè mali a gèɗ ndohi ngiɗè, ka slaha ka tsoko gèɗ ngaya auda a sam kita azɓai. Aman te skwi man ka bazla na mali a gèɗ ndo ngiɗè, ka phomde va ngaya a ri ngaya, te man ka ba, ka gia lèmèlèmè ara man ka ga na ma a gèɗ.

² Aman nga suna, kita Zhiklè nzuraʼa a vava a géɗ tengaʼa man ta gi mali arsa.

³ Ka ndo, man ka bèzlè mali a gèɗ ndo ngiɗè, a ka gi lèmèlèmè ara nengaʼa: ka hur ka da mbél ngaya a sam kita Zhiklè ɗè?

⁴ Pombi nengaʼa mbiaʼa, nzhèr skwi nengaʼa dai, a ndav nengaʼa man a slèmbèɗè tsam tsam azɓai, ka kwola ka ɓi ɗè? Ka sun ɓi ɗè, pombi Zhiklè a zhèr ka, aman ka da ngwèdè ndav.

⁵ Aman ka sassaya ndav ngaya, a ka ngwèdè ndav ngaya azɓai, ka hèy ndzoan a géɗ ngaya, ha pats ndzoan, aman kita nzuraʼa man a Zhiklè a da gudko va a dai,

⁶ aman a da va na ndo staɗ staɗ ara skwi nengaʼa man a gau:

⁷ Nshèffè a mèdèp a sam ndohi man ta nza taraʼa te mizlinè man amba, a ta zhèr I nslébèrdè, a nʼnjèlè, a skwi man a gédèshè azɓai.

⁸ Aman ndohi man ta Sala na va a gèɗ, man ta fa na gèɗ a ma nzuraʼa azɓai, aman ta jèjèr ma man az zura ɓai, a phomde ta, a ga ta ndzoan.

⁹ Matakwan a zlau a sam ndohi tèlèba, man ta gi skwi man ambaɓai: nshèlèkuraʼa a sam ndohi Juif, te deɓaʼa a sam ndohi man Juif ka ɓi ba.

¹⁰ Nslébèrdè a nʼnjèlè a gumai a sam ndohi man ta gi skwi man amba: nshèlèkuraʼa a sam ndohi Juif, te deɓaʼa a sam ndohi man Juif ka ɓi ba.

¹¹ Aman Zhiklè a pèr ndo mpèrè azɓai.

¹² Ndohi man ma kita Zhiklè az a sam ta ɓai, a ta gu malai, ta gedas ta genè, a ta ngècè kita, ko ma kita Zhiklè az a sam ta ɓai. A ndohi man ma kita Zhiklè a zhè a sam ta, a ta gu malai, ta ngècè kita a ma kita Zhiklè.

¹³ Ndohi ta ndi a ndohi nzuraʼa a sam di Zhiklè, a géɗ man ta cinè ma kita Zhiklè ka ɓai, aman a géɗ man ta fi gèɗèʼa.

¹⁴ Aman ndohi herkeda, man ta ngatsa ma kita Zhiklè ɓai, a ta dzodzor ma kita Zhiklè, ara man ndav tengaʼa a ngra ta, ko ta ngatsa ma kita Zhiklè ɓai, ndav tengaʼa kala ma kita tengaʼa;

¹⁵ ta ngreda mizlinè ma kita auda, man mwindèa te ndav ta. Ndav tengaʼa, a nhér gèɗ tengaʼa, a ngreda ta arsa; a sam ngiɗè a pin ta, a sam ngiɗè a jèke ta,

¹⁶ a pats man Zhiklè a gi kita te Yèsu Kristi, a géɗ skwi nʼnghedaʼa te ndav ndohai, ara ma mbelaʼa man i njèʼa.

Ndohi Juif, a ma kita Zhiklè

¹⁷ Aman ka, ka ndo Juif, a ka gshè va a ma kita Zhiklè, a ka jégèr va a géɗ Bi Zhiklè.

¹⁸ Ka sun skwi man a woyaʼa, te man ta slebda ka ma kita Zhiklè, a ka slaha ka ɗél skwi tèlèba, a ka wèr skwi man amba a skwi man ambaɓai.

¹⁹ Ka fi va, a ka gaɗa, i ndo ncè ta ma ndohi mandazlai, skwi nhél sam ndohi nte ruva,

²⁰ ka ndo nslebda ta ndohi man ta sun skwi di ɓai, ka ndo njènga ta ndohi man ta sun maya di ɓai, a géɗ man te ma kita ka rka skwi man a shindè maya a ma nzuraʼa.

²¹ Anai ka slebda ta a ndohi ngiɗè, a ka slebi ar ka azɓi ɗè? Ka njè ta ndohi ngiɗè: kin gu metsar ɓai! — a ka gia ar ka ɗè?

²² Ka gaɗa: kin gu mphömè ɓai, a ka gi mphömè ar ka ɗè? Vrai a ndara ka, a ka gi vri a metsar genè ɗè?

²³ Ka jégèr va a géɗ ma kita Zhiklè, ka tawaɗaha ma kita, a ka derɗe Bi Zhiklè.

²⁴ Ara man ɗèlèwèr Zhiklè a gaɗa: Ndohi ngiɗè te va ndohi herkeda ta derɗe nzlembaɗ Zhiklè a géɗ kinè.

²⁵ Nʼngél ngwon amba, aman ka jèjèr ma kita Zhiklè. Aman ka jèjèr ma kita Zhiklè azɓai, ka ndo man ngwon nʼngela, ka lèmèlèmè ara ndo man ngwon nʼngel ɓi ma.

²⁶ Ndo man ngwon nʼngel ɓai, a jèjèr ma kita Zhiklè, a sam di Zhiklè lèmèlèmè ara ndo man ngwon nʼngela ka ɓi ɗè?

²⁷ A nengaʼa man daga nyakaɗ na ngwon nʼngel ɓai, aman a jèjèr ma kita Zhiklè tèlèba, a ndi a ndo mbèzlè kita a géɗ ngaya, ka man ka ngots ma kita a ma nʼngél ngwon, a ka gi malai ara ma kita Zhiklè a gaɗa.

²⁸ Nengaʼa ndo Juif man ta rka a deɓaʼa genè ka ɓai. Nengaʼa nʼngél ngwon man ndohi ta ngu genè ka ɓai.

²⁹ Aman nengaʼa ndo Juif nzuraʼa, man ndo Juif te ndav. Nengaʼa nʼngél ngwon nzuraʼa, man ndav ntila, man ndo a ngoɗ ka ɓai, aman Mèzhèɓ Zhiklè a ngau. Ndo arsa a ngècè nʼnjèlè a sam ndohi ka ɓai, aman a sam Zhiklè.