Romans 16 - Ma Zhiklè

Mbali ndohi tsaɗ tsaɗ

¹ Phébé, demam nga, da pca kinè a géɗ ɓai, nengaʼa ndo ntakaha mpi ndohi Zhiklè te Cenchrées.

² A woy kin cèʼa te Bi Zhiklè, ara man amba aman ndohi Zhiklè ta giaʼa, a kin takaha te skwi tèlèba man a jhèɗèʼa. Aman nengaʼa ba a ntakaha ta ndohi kumba, a nta-kahayè ba.

³ Va-ga ta mbalai a Priscille a Aquilas, ndohi ntakahayè te Yèsu Kristi,

⁴ man ta laya nshèffè tengaʼa ɓai a géɗ ga. Aman i shid gèɗ, i staɗgenè ka ɓai, aman mpi ndohi Zhiklè tèlèba te ndev ndohi nte deɓa.

⁵ Va-ga ta mbalai a mpi ndohi Zhiklè te gi tengaʼa. Va-ga na mbalai a Epainète, ndo man i woya a ndav ga, tsuvom ndohi Kristi te kokwar Asie.

⁶ Va-ga na mbalai a Marie, man a gu mizlinè kumba, a nsu matakwan kumba a géɗ kinè.

⁷ Va-ga na mbalai a Andronicus a Junias, gwoli ga a masli man nga nza a dangi a vna, mbibihiaʼa te va ndohi sak. Ta zhè te Kristi, man i az di ɓai.

⁸ Va-ga na mbalai a Amplias, ndo man i woya a ndav ga te Bi Zhiklè.

⁹ Va-ga na mbalai a Urbain, ndo ntakaha nga te Kristi, a Stachys, ndo man i woya a ndav ga.

¹⁰ Va-ga na mbalai a Apelles, ngul ndo te Kristi. Va-ga ta mbalai a ndohi gi Aristobule.

¹¹ Va-ga na mbalai a Hérodian, gwoli ga. Va-ga ta mbalai a ndohi gi Narcisse te Bi Zhiklè.

¹² Va-ga na mbalai a Tryphène a Tryphose, tengaʼa ta gu mizlinè te Bi Zhiklè. Vaga na mbalai a Perside, nengaʼa man i woya a ndav ga, man a gu mizlinè kumba te Bi Zhiklè.

¹³ Va-ga na mbalai a Rufus, ndo man Zhiklè a ngotskoɗauda, a mam na, nengaʼa nara mam ga ba.

¹⁴ Va-ga na mbalai a Asyncrite, Phlégon, Hermès, Patrobas, Hermas, a nda njèkèɗi kramamhai man ta a nda ta.

¹⁵ Va-ga ta mbalai a Philologue a Julie, Nérée a demam na, a Olympe, a ndohi Zhiklè tèlèba a sam tengaʼa.

¹⁶ Va-gu mbalai, ngiɗè a ngiɗè, ngiɗè a ngiɗè a nkèlèw ri a daʼai ndohi Zhiklè. Mpi ndohi Zhiklè tèlèba te Kristi ta ga kinè mbalai.

¹⁷ Dalahimam ga, i fa kinè ma a gèɗ, aman kin gi maya a géɗ tengaʼa man ta dzakaɓa njè-ma man kin jongo, a ta kezl i ta ndohai, a ta zlakede ta ndohi tsaɗ tsaɗ. Vo-do kinè auda a sam tengaʼa!

¹⁸ Aman tengaʼa ta gi mizlinè Bi nga Kristi ka ɓai, aman mizlinè hwaɗ tengaʼa. Ma tengaʼa ara vongwom; ma tengaʼa man amba a pe ta a wai, man ta hér mali ta azɓai.

¹⁹ Aman labar ma kinè, ara man kin fa na gèɗ a ma Zhiklè, a zlèzlèmè, a ndohi tèlèba ta suna. Gar haha i wuffè a géɗ kinè, i woy aman kin gi maya a sam skwi man amba, a kin kwol skwi man ambaɓai.

²⁰ Zhiklè gumai a da kerɗda Sadan a hwaɗ sak kinè ndul ndul. Pombi Bi nga Yèsu Kristi da zhè a nda kinè!

²¹ Timothée, ndo ntakahayè, a Lucius a Jason a Sosipater, gwoli ga, ta ga kinè mbalai.

²² Iyè, Tertius, man i Windo ma Paul haha, i ga kinè mbalai te Bi Zhiklè.

²³ Gajus, babgi ga, babgi mpi ndohi Zhiklè tèlèba, a ga kinè mbalai. Eraste, ndo mɓer Suli kokwar haha,

²⁴ a Quartus, kramam nga, ta ga kinè mbalai.

²⁵ Ngo-nzolokoy Zhiklè! Nengaʼa a slaha a nva kinè wuɗai, ara ma mbelaʼa man i njè kinè te Yèsu Kristi; skwi man nʼngheda te nhinkaɗ na te nengaʼa,

²⁶ nʼngreda auda a ɗèlèwèr ndohi nhadka ma antanta. Bi Zhiklè man a nzi a mèdèp a goɗ aman ta senda ta ndohi nte deɓa, aman ta cè a ndav a ta fi gèɗèʼa.

²⁷ A Zhiklè man maya na zhè staɗgenè, nʼnjèlè te Yèsu Kristi, te nhinkaɗ na a ndè a ma ma a mèdèp. Amen.