Romans 15 - Ma Zhiklè

Va-gu ara man ambaha nslamagi kinè!

¹ Aman nga, man wuɗi nga a zhè, sèi nga takaha ta ndohi man wuɗi ta azɓai te skwi man ta slaha ɓai, a nga nzi ara man ambaha nga genè ka ɓai.

² Ndo staɗ staɗ te ndev nga da nza ara man ambaha nslamagi na, a ngrè a ma ma.

³ Aman Kristi ba a nʼnza, ara man ambaha genè ka ɓai, aman ara man ɗèlèwèr Zhiklè a gaɗa: Ma nderɗe ndo man ndohi ta derɗe ka a vna, kalka a géɗ ga.

⁴ Aman ma man ta Windo halaʼa ta Windo man a njè nga, aman nga zhèr skwia dai. A ɗèlèwèr Zhiklè a bid nga, aman nga nzi te nzhèrè te ndav.

⁵ Aman Zhiklè nzhèr skwia dai, Zhiklè mbid ndo, da va kinè, aman kin hér skwi te ndav kinè, lèmèlèmè ara Yèsu Kristi.

⁶ A kin slébèrdè Zhiklè, Bab Bi nga Yèsu Kristi, a ma staɗ, a ndav staɗ.

Ma mbelaʼa a sam ndohi nte deɓa

⁷ Gar haha ngiɗè da co ngiɗè, lèmèlèmè ara Kristi a ce nga a nʼnjèl Zhiklè.

⁸ Aman i gaɗa: Kristi a gu a ndo ntakaha ta ndohi Juif a géɗ ma nzuraʼa man a Zhiklè, aman a da na va a ma mpesl ri man babhi ta ta ngotso.

⁹ Aman ndohi nte deɓa sèi ta slébèrdè Zhiklè a géɗ man ta sia te va, ara man ɗèlèwèr Zhiklè a gaɗa: Gar haha i woy a i ngrede ka te ndev ndohi nte deɓa, a i sli dimèsh a nzlembaɗ ngaya.

¹⁰ A va zaʼa: Va-wuffa, kin ndohi nte deɓa, a nda ndohi nengaʼa.

¹¹ A va zaʼa: Vo-slubordo Bi Zhiklè, kin ndohi nte deɓa, va-shüd gèɗ a nengaʼa, kin ndohi herkeda tèlèba!

¹² A va zaʼa: Esaie a gaɗa: Zluzlor Isai a di a tsai, a nengaʼa man a di a slèmbèɗè, man a gi bai a géɗ ndohi nte deɓa tèlèba, nengaʼa ndohi nte deɓa ta zhèrè te ndav.

¹³ Aman Bi Zhiklè nzhèrè te ndav, da ndha ndav kinè a mwuffè tèlèba, a gumai te ncè-a-ndav, aman kin ngots nzhèrè te ndav tèlèba a wuɗi Mèzhèɓ nkezlaʼa.

¹⁴ Aman i suna a vava, kinè dalahimam ga, kin woy skwi man amba a vava a ri kinè, a ndav kinè nʼndha a nshin skwi tèlèba. Kin slaha kin slebi a va kinè, ngiɗè a ngiɗè.

¹⁵ Aman ko arsa i ga zlau ɓai, a i winda kinè ma tsaɗ tsaɗ kumba, aman i fa kinè ma a gèɗ te pombi man Zhiklè a mvayè.

¹⁶ Pombi nengaʼa a ngyè a ndo mizlinè Yèsu Kristi te ndev ndohi nte deɓa, a i gi mizlinè Zhiklè te ma mbelaʼa, aman ndohi nte deɓa ta ndi a skwi mvi a Zhiklè, man ambaha Zhiklè, ndohi nkezlaʼa te Mèzhèɓ Zhiklè nkezlaʼa.

¹⁷ Anai i slaha a i jégèr va te Yèsu Kristi a sam di Zhiklè.

¹⁸ I woy a i gèɗè ma azɓai a géɗ skwi man Kristi a gu a iyè. Aman ndohi nte deɓa ta jèjèrèʼa, te ma, te skwi man ta giaʼa,

¹⁹ te wuɗai, te skwi man a ngreda auda ara nrkedai, te wuɗi Mèzhèɓ Zhiklè. A hinè te Jérusalem a sam tèlèba, ha ndikè kokwar Illyrie, i njè ta ma mbelaʼa te Kristi tèlèba.

²⁰ I gu maya man i njè ma mbelaʼa a sam man ta tsena nzlembaɗ Kristi di ɓai, aman i ɗizlè gi a verzi gi ndo ngiɗè azɓai.

²¹ Aman nʼngaʼa ara man ɗèlèwèr Zhiklè a gaɗa: Ndohi man ta njè ta di ɓai, a di ta rkaʼa, a ndohi man ta tsena di ɓai, ta da cinèʼa.

Paul a hérèʼa a ndè Rome

²² A géɗ nasa i ngatsa ri ndè a sam kinè di ɓai.

²³ Aman antanta mizlinè ga te kokwar haha klèng, a mpataka kinè a keɗyè kumba, mvi a zhè a vata.

²⁴ Antanta i woy a i dè a sam kinè, aman i dè a kokwar Espagne. Aman i hur i dè, a i bizhè a sam kinè, a i rka kinè, a kin feday ma. Aman sèi man ndav ga a wuffè a géɗ kinè nshèlèkuraʼa dai, ga i dè a ma ma.

²⁵ Aman antanta i dè a kokwar Jérusalem, a i takaha ta ndohi Zhiklè.

²⁶ Aman ndohi Macédoine a Achaie tèlèba ta ɓüco skwi man ta woy a ta va ta ndohi ntawassaʼa te ndev ndohi Zhiklè te kokwar Jérusalem.

²⁷ Ta gau a ndav amba, te man godèrè Jérusalem ba a zhè a géɗ tengaʼa. Aman ndohi nte deɓa ta ngots skwi ndohi Juif te Mèzhèɓ, amba aman tengaʼa ba ta takaha ta ndohi Juif a skwi man ta ngotso tʼherkeda.

²⁸ Aman i gau arsa, a i va ta skwi man ta tsakala ma, i woy a i jèke kinè, a i dè a ma ma a kokwar Espagne.

²⁹ Aman i suna, a i dè a sam kinè, a mpshè ma Kristi tèlèba.

³⁰ Dalahimam ga, i fa kinè ma a gèɗ, te Bi nga Yèsu Kristi, te mwoy-ndo te Mèzhèɓ, va-takahayè a ngi var te ntsi ri a sam Zhiklè a géɗ ga,

³¹ a i mbél ga te ri ndohi man ta nca a ndav ɓai te kokwar Judée, a mizlinè man i gia a géɗ Jérusalem a gi ambaha ta ndohi Zhiklè,

³² a i slaha a i dè a sam kinè a mwuffè ara Zhiklè man a woyaʼa, a ndav ga ntila langlangaʼa a nda kinè.

³³ Bi Zhiklè gumai da zhè a nda kinè tèlèba! Amen!