Romans 14 - Ma Zhiklè

Kin fa na mali a géâ kramamhi kinè ɓai!

¹ Ndo man wuɗi ncè-a-ndav azɓai, va-takaha, va-nza na a deɓa, kin dzakaɓama na gèɗ ɓai!

² Ndo ngiɗè a hérèʼa a slaha a ndi skwi tèlèba – ndo ngiɗè man wuɗi te ndav na ɓai a ndi zluèɗ azɓai.

³ Ndo man a ndiaʼa, da paraha ndo man a ndi azɓi ɓai. A ndo man a ndi azɓai, da fa na mali a gèɗ ndo man a ndiaʼa ɓai. Zhiklè a nco nengaʼa.

⁴ Ka wa, man ka fa na mali a gèɗ ɓèl ndo ngiɗè? Nengaʼa gar a zlècè, gar a kèlèhai, nasa ma bi na. A di a zlècè, te man Bi Zhiklè a slaha a nzlatseda.

⁵ Ndo ngiɗè a nhur pats staɗ a fena pats ngiɗè—ngiɗè a nhur patshi lèmèlèmè tèlèba. Ko wawa da sun skwi man a hérèʼa a vava.

⁶ Ndo man a pèr patshi a mpèrè, a giaʼa a sam di Bi Zhiklè. Ndo man a ndi skwai, a ndiaʼa a sam di Bi Zhiklè, a shid gèɗ a Bi Zhiklè te nengaʼa. Ndo man a ndi skwi azɓai, a ndi azɓai a sam di Bi Zhiklè, a shid gèɗ a Bi Zhiklè lèmèlèmè.

⁷ Aman ko staɗ azɓai te ndev nga, man a nzi a nshèffè a géɗ va nengaʼa genè. Ko staɗ azɓai, man a metsi na a géɗ va nengaʼa genè.

⁸ Aman nga nzi a nshèffè, nga nzi a nshèffè a géɗ Bi Zhiklè.

⁹ Aman Kristi a mʼmets na, a nslambaɗkaɗauda a nshèffè zaʼa, a géɗ man a gi bai a géɗ ndohi mʼmetsaʼa a ndohi man ta shèffè cèw ba.

¹⁰ Aman ka wa, man ka fa na malai a gèɗ kramam ngaya, a ka kwola kramam ngaya.

¹¹ Nga tèlèba ta da zlatsede nga a sam nʼnzi kita Zhiklè. Aman ɗèlèwèr Zhiklè a gaɗa: Gurmbèzhihi tèlèba sèi ta da gurɓè a sam ga ndèzl, a nèʼènhi tèlèba ta ngredè Bi Zhiklè.

¹² Gar haha sèi ndo staɗ staɗ tèlèba a da ngrédè skwi man a gau, a malwuɗi va na.

Kin slafaɗama na sak a kramam kinè ɓai!

¹³ Gar haha sèi nga jèkeda nfi mali a gèɗ ndo ngiɗè. Staɗ staɗ da gu maya, da ga a gadda a kwa ntsi sak kramam nengaʼa ɓai, aman kramam nengaʼa a kèlèhi a pa.

¹⁴ I sun a vava te Bi Yèsu: Skwi nlizhèʼa man nlizhèʼa te va na, azɓai. Sèi ndo man a rka ara nlizhèʼa, a nengaʼa nlizhèʼa.

¹⁵ Aman kramam ngaya a kuɗi te ndav na a géɗ skwi nʼndi ngaya, ara man ka woy kramam ngaya ɓi ma. Ka da dzamdauda a skwi nʼndi ngaya ɓai! Kristi a mʼmets na a géɗ nengaʼa.

¹⁶ Gar haha vagu aman ta derɗe skwi kinè man amba ɓai.

¹⁷ Aman kokwar Bi Zhiklè nʼndi skwai, nsi skwai ka ɓai, aman ngi-zuraʼa a gumai a mwuffè te Mèzhèɓ Zhiklè nkezlaʼa.

¹⁸ Ndo man a takaha Kristi te pa, nengaʼa ambaha Bi Zhiklè, a ndohi ta woyaʼa.

¹⁹ Gar haha ngo-dzodzorokoy skwi man a tsi gumai, a skwi man a gi aman ndo a grè a ma ma.

²⁰ Kin gedassa mizlinè Zhiklè a géɗ skwi nʼndi ɓai. A vava skwi tèlèba mpana, te va na, nlizhè ɓai. Aman a ndo man a ndiaʼa, a gi aman ndo ngiɗè a kèlèhai, ambaɓai.

²¹ Dara ka ndi zluèɗ azɓai, a ka si zom azɓai, a ka gu skwi azɓai, man a gi gadda aman kramam ngaya a kèlèhi a pa.

²² Ɓür ncè-a-ndav man ka ngotso a sam di Bi Zhiklè. Mwuffè a zhè a sam ndo man a gi skwi te mèzhèɓ ndav amba.

²³ Aman ndo man a pi gèɗ cèw, a ndiaʼa genè, kita Zhiklè a ngso, te man skwi man a gau, a ngau te ncè-a-ndav ka ɓai. Skwi man a gi a ncè-a-ndav azɓai, nengaʼa malai.