Romans 12 - Ma Zhiklè

Nshèffè, a mvi skwi a Zhiklè

¹ Dalahimam ga, anai i bid kinè a géɗ man ndo a si Zhiklè te va: va-vau va kinè a skwi man kin va na Zhiklè, man nshèffè te pa, nkezlaʼa, ambaha Zhiklè. Nasa mizlinè Zhiklè nzuraʼa!

² Kin gu lèmèlèmè ara ndohi herkeda sata ɓai, aman va-gu aman nhér gèɗ kinè a gi a mɓuaʼa, aman kin slaha a kin ɗèl skwi man Zhiklè a woyaʼa, ara skwi man amba a skwi mbelaʼa a skwi njèlèlèʼa.

³ Aman te pombi man Zhiklè a mvayè, i gaɗa kinè staɗ staɗ tèlèba, aman kin gra gèɗ kinè ɓai, a kin gaɗa: I mbiaʼa, i fenaʼa. Aman staɗ staɗ da nza a maya maya, staɗ staɗ te skwi man Zhiklè a mva na te ncè-a-ndav.

⁴ Aman lèmèlèmè ara man nga ngots nfèfèn va kumba te va staɗ, aman nfèfèn va tèlèba ta gi mizlinè nstaɗgenè ka ɓai,

⁵ ara man nga kumba, va staɗ te Kristi. Aman te va nga, nfèfèn va tsaɗ tsaɗ, ngiɗè ngiɗè.

⁶ Maya nga tsaɗ tsaɗ, ara man pombi Zhiklè a mva nga. Ndo man a ngats mizlinè nhèɗè ma, da gu te ncè-a-ndav, ara man a ngotso.

⁷ Ndo man a ngatsa mizlinè Zhiklè, da gu mizlinè Zhiklè. Ndo man a jènga ta ndohai, da gu mizlinè njèngè.

⁸ Ndo man a slaha a ngatsa na maya a ndo, da ngatsa na maya a ndo. Ndo man a vi skwi a ndo, da vau a ndav amba. Ndo man a gi bai, da gau a maya maya. Ndo man ndo a sia te va, da gu a mwuffe.

Nʼngatsa ta maya a ndohi Zhiklè

⁹ Va-woy ndo a vava, a nʼngwèdè ndo ka ɓai! Va-gu shèwa a skwi man ambaɓai, va-zleɓ a va a skwi man amba!

¹⁰ Va-woy kramam kinè, ngiɗè a ngiɗè, ngiɗè a ngiɗè, a ndav tèlè! Va-lèɓèslè a va kinè, ngiɗè a sam ngiɗè, ngiɗè a sam ngiɗè!

¹¹ Te skwi man sèi kin gia ndèzl, kin gu wudar te pa ɓai! Mèzhèɓ kinè da vatsa ara vogwa. Va-gu mizlinè Bi Zhiklè!

¹² Va-wuffa te nzhèrè te ndav, vo-zhor skwi a dai te matakwan, va-tsu rai, kin ndeva ɓai!

¹³ Va-takaha ta ndohi Zhiklè te skwi tengaʼa mwuɗitpa. Va-feda ndo a gai.

¹⁴ Ndohi man ta paraha kinè, va-pshè ta ma! Va-pshè ta ma, kin phomde ta ɓai!

¹⁵ Va-wuffa a nda tengaʼa man ta wuf-fè, va-kuɗau a nda tengaʼa man ta kuɗai.

¹⁶ Va-hur skwi a ndav staɗ. Kin woy mizlinè mbia genè ɓai, aman va-woy mizlinè nkèshè ba. Kin hur te ndav kinè a ri kinè ɓai a kin gaɗa: Nga ndohi maya.

¹⁷ Ndo man a ga kinè skwi ambaɓiaʼa, kin pela na a skwi ambaɓia ɓai! Va-gau skwi man amba a ndohi tèlèba.

¹⁸ Man a gai, va-nza a gumai a nda ndohi tèlèba.

¹⁹ Dalahimam ga, kin pulko di man a kinè auda a ri kinè ɓai, aman va-jèka na a ri a Zhiklè. Aman a sam ngiɗè ɗèlèwèr Zhiklè a gaɗa: Mpil gèɗ, iyè mpilèʼa. I woy a i pela na di man a ndo. Bai Zhiklè a gaɗa. A sam ngiɗè a gaɗa:

²⁰ Aman mi a keɗe ndo mayam ngaya, va na skwi nʼndai! Aman iyam a dza na, va na iyam nsai! Aman ka gi arsa, hori a da keɗda pa.

²¹ Skwi ambaɓiaʼa da gu ngul ngaya ɓai – gu ngul skwi man ambaɓai a skwi man amba!