Romans 11 - Ma Zhiklè

Njèkèɗiaʼa ndohi Israel man ta mbel ta

¹ Anai i gaɗa: Zhiklè a nkwol ta ndohi nengaʼa ɗè? Aʼai! Aman i ba i ndo Israel, te verzi Abraham, te gwoli Benjamin.

² Zhiklè a nkwol ndohi nengaʼa man a par ta halaʼa ɓai. Aman kin sun ɓi ɗè, ɗèlèwèr Zhiklè a goɗ a géɗ Elie – ara man Elie a ntsu ri a sam Zhiklè a géɗ Israel, a ngaɗa:

³ Bai, ta bazl ta ndohi nhadka ma ngaya, ta mbeɗda samhi mvi skwi a Zhiklè a hai. Njèkè iyè staɗgenè, a ta wov a ta keɗyè.

⁴ Aman Zhiklè a mʼmbeɗa na a ma kè? I ngots a sam ga ndohi 7.000, man ta gurɓahi a sam Baal ɓai.

⁵ Lèmèlèmè a patsna ba, njèkèɗiaʼa a zhè man Zhiklè a mpar ta te pombi nengaʼa.

⁶ A géɗ pombi na, a géɗ skwi man ta gia ka ɓai. Man ɓai, pombi nara pombi ka ɓai.

⁷ Kos nga gèɗè ma kè? Skwi man Israel a woyaʼa, a nʼngatsa ɓai, aman ndohi mparaʼa ta ngotso, a ndav ndohi ngiɗè ta gwora.

⁸ Ara man ɗèlèwèr Zhiklè a gaɗa: Zhiklè a mva ta Mèzhèɓ nzhunè, a mva ta dai, man ta rka di ɓai, zlembaɗ man ta tsena a vna ɓai, ha mshkè na ma mpatsna.

⁹ David a gaɗa: Gau aman skwi nʼndi tengaʼa da ngwoda ta va a gèɗ, da slafaɗama ta sak, da ngots skwi ntul ta.

¹⁰ Ndede ta a mandazlai, aman ta rka di ɓai, a ka guɓda ta deɓ tengaʼa a hi pèc pècèk!

Skwi mʼmbel ndohi nte deɓa

¹¹ Gar haha i gèɗè aranta: Skwi a slafaɗama ta sak, aman ta da kèlèhi ɗè? Azɓai! Aman a géɗ man ta kalahai, ndohi nte deɓa ta ngots skwi mʼmbel ta, aman a da poka ta gèɗ auda a srak a ndohi Israel.

¹² Aman a géɗ man ta kalahai, ndohi herkeda ta ngots skwi mèshèlè; a skwi man a gedas ta a ngu a skwi mèshèlè ndohi nte deɓa, holholaʼa arsa, aman ta da co a ndav tèlèba.

¹³ Aman i gaɗa kinè, ndohi nte deɓa: A géɗ man i ndo sak ndohi nte deɓa, i jégèr va a géɗ mizlinè ga.

¹⁴ A i hérè ara man i poko ta gèɗ auda a srak a gwoli ga, aman i da mbel ta staɗ staɗ te vaʼa.

¹⁵ Aman a géɗ man Zhiklè a nkwol ta, herkeda a nʼngots skwi mʼmenda gumi a hai; aman Zhiklè a ce ta zaʼa, nara nshèffè te ndev ndohi mʼmetsaʼa ka ɓi ɗè?

¹⁶ Aman tsagi ngiɗè te va mɓelaslasla nkezla, mɓelaslasla tèlèba nkezla. Aman zluzloraʼa nkezla, lèmèlèmè ri wof ba nkezla.

¹⁷ Wof te gi lak, ta ngelaha rihiaʼa, tengaʼa ndohi Juif. Ka man Juif ka ɓai, ka ara ri wof tʼhèshèkèɗ, man ta kala na ma nte gi lak. Ka ngots ar haha skwi zluzlor tengaʼa, a iyam wof nengaʼa.

¹⁸ Gar haha ka fu va a géɗ ri wof man ta ngela te gi lak ɓai! Aman ka gi arsa, sèi ka suna, ka nva na skwi a zluzlor ka ɓai, aman zluzlor a nva ka skwai.

¹⁹ Antanta ka gaɗa: Ta ngela ri wof, aman ta da kalyè a samaʼa.

²⁰ Amba, ta ngelaʼa a géɗ man ta ca a ndav ɓai; aman ka, ka zhè a géɗ ncè-a-ndav ngaya. Ka fu va ɓai, aman gu zlau!

²¹ Aman Zhiklè a jèkè ri wof géɗagèɗ azɓai, a da jèke ka azɓi ba.

²² Gar haha sèi ka pi di a pombi Zhiklè, man a skwi wali ka ɓai a sam tengaʼa man ta kalahai. Aman pombi Zhiklè a sam ngaya, sèi ka nzi te pombi nengaʼa. Man ɓai, ta da ngel ka lèmèlèmè.

²³ Te deɓaʼa, aman ndohi Juif ta da co a ndav, ta da kal ta a sam man ta ngel ta a pa. Zhiklè a slaha a nkal ta a pa zaʼa.

²⁴ Aman ta ngel ka te wof tʼhèshèkèɗ, man te nhinkaɗ na skwi hèshèkèɗ, a ta kal ka a wof nte gi lak, holholʼa ri wofhi géɗagèɗ, ta da kal ta a wof nte gi lak tengaʼa zaʼa.

Ntil Israel zaʼa

²⁵ Dalahimam ga, i woya aman kin sun skwi man nʼnghedaʼa, a kin dzodzor maya man kin ngotso a ri kinè ɓai: Reta Israel nʼngaʼa a mandazlai, ha pats man ndohi nte deɓa ta shkè a pa tèlèba.

²⁶ Te deɓaʼa Israel tèlèba a da mbel na, ara man ɗèlèwèr Zhiklè a gaɗa: Ndo mʼmbel ndo a di a shkè te Sion, man a gedassa skwi man a woy Zhiklè ɓai te Jacob.

²⁷ Na haha nderzlè-ma ga a nda tengaʼa, aman a di i cè mali tengaʼa auda.

²⁸ A sam mizlinè ma mbelaʼa, ndohi Juif ara mayamhi Zhiklè a géɗ kinè. Aman a géɗ pombi Zhiklè man a par ta, ta mandala, a géɗ bababhi ta.

²⁹ Aman Zhiklè a minè a deɓa azɓai a sam pombi nengaʼa man a baha ta.

³⁰ Lèmèlèmè ara kinè halaʼa kin fa na gèɗ a Zhiklè ɓai, aman antanta a sam man tengaʼa ta fi gèɗ azɓai, kin si Zhiklè te va,

³¹ lèmèlèmè tengaʼa ba man ta fu gèɗ a Zhiklè ɓai, ta da si Zhiklè te va, ara man kin si Zhiklè te va antanta.

³² A sam Zhiklè tèlèba ndohi mèdègèɗ, aman tèlèba a ta da sia te va.

³³ A vava, mèshèlè Zhiklè, a maya a skwi man Zhiklè a suna, a ndiv ɓai. Verzi kita nengaʼa, ndo a shinè azɓai, mbèslè gèɗ nengaʼa, ndo a shinè azɓai.

³⁴ Nsun skwi man Bi Zhiklè a hérè, wa? Ndo nsenda na wa?

³⁵ Mva na skwi nshèlèkuraʼa, man a pilèʼa a deɓaʼa, wa?

³⁶ Aman te nengaʼa, a géɗ nengaʼa, a sam nengaʼa, skwi tèlèba a zhè. Nʼnjèlè a nengaʼa a mèdèp! Amen.