Romans 10 - Ma Zhiklè

¹ Dalahimam ga, i woya a ndav ga, a i tsi ri a Zhiklè a géɗ Israel, aman ta mbel ta.

² Aman ma malwuɗi ga a géɗ tengaʼa: ta woy Zhiklè, a ta gi gazawa a géɗèʼa, aman gazawa nzura ka ɓai.

³ Aman ta rka ngi-zuraʼa Zhiklè ɓai, a ta woy a ta zlècèdè ngi-zuraʼa tengaʼa a ri ta. Ar haha ta manda gèɗ ta a hi ɓai a sam ngi-zuraʼa Zhiklè.

⁴ Te Kristi ma kita a nʼndev na; ko wawa man a cè nengaʼa a ndav, nʼngaʼa a ndo nzuraʼa.

⁵ Moise a mwindo ma ngi-zuraʼa man a zhè te ma kita Zhiklè aranta: Ndo man a gi skwi haha, a di a nzi a nshèffè a vna.

⁶ Aman ngi-zuraʼa te ncè-a-ndav a gèɗè ar haha: Ka goɗ te ndav ngay ɓai: ndè zhiklè wa? – ara man a woya a ncko Kristi a hai;

⁷ ndè vèvèɗ wa? – ara man a woya a ncko Kristi auda te ndev ndohi mʼmetsaʼa.

⁸ Aman a gaɗ kè? Ma a zhè ndul ndul, na zhè te ma ngaya, te ndav ngaya. Na haha ma ncè-a-ndav man nga njèʼa.

⁹ Aman ka ngreda a ma ngaya, Yèsu nengaʼa Bai, a ka cè a ndav ngaya, Zhiklè a nslambaɗda te ndev ndohi mʼmetsaʼa, ka da mbél ngaya.

¹⁰ Aman ndo man a cè a ndav a vava, a ngècè ngi-zuraʼa; a ndo man a ngrédèʼa a ma na, a mbel na. Ara man ɗèlèwèr Zhiklè a gaɗa:

¹¹ Ndo man a cè a ndav na, a ngècè hori a di azɓai.

¹² A haha tsaɗ tsaɗ azɓai, ko ndohi Juif, ko ndohi man Juif ka ɓai. A géɗ tengaʼa tèlèba Bi staɗgenè, ndo mèshèlè a géɗ ndohi tèlèba man ta baha na a nzlembaɗ na.

¹³ Aman ko wawa man a baha na nzlembaɗ Bi Zhiklè, a da mbel na.

¹⁴ Aman ta da bèhè nzlembaɗ ngè, man ta ca a ndav ɓai. Ta da cè a ndav wa, man ta tsena ma nengaʼa di ɓai? Ta cinè mè, man ndo a nslebda ta ɓai?

¹⁵ Aman ta slaha ta njè ɗè, aman ndo a zlinde ta ɓai? Ara man ɗèlèwèr Zhiklè a gaɗa: Sak tengaʼa mbikaɓai, man ta njè ma mbelaʼa.

¹⁶ Aman tèlèba ta fa na gèɗ a ma mbelaʼa ɓai. Aman Esaie a gaɗa: Bai, a nco njè-ma nga a ndav wa?

¹⁷ Gar haha ncè-a-ndav a shkè te njè-ma, njè-ma a shkè te ma Kristi.

¹⁸ Aman i gaɗa: Ta tsena ɓi ɗè? Halau, ma tengaʼa nslhaʼa, a nzlazlama tʼherkeda tèlèba, ha ndè a verzi herkeda.

¹⁹ Aman i gaɗa: Israel a sun ɓi ɗè? Nshèlèkuraʼa Moise a gaɗa: I da poko kine gèɗ auda a srak a géɗ ndohi man ndohi ga ka ɓai, a i gi man kin gi ndav a géɗ ndohi man maya ta azɓai.

²⁰ Aman Esaie a ngu zlau ɓai, man a gaɗa: Ndohi man ta woy iyè ɓai, ta ngatsyè, a i gudoko ta va a tengaʼa man ta dzhaɗyè ɓai.

²¹ Aman a ngaɗa na Israel: I Pelaha ri ga pèc pècèk daga prèk, ha dákwaɗ, a sam ndohi man ta tsena gèɗ ɓai, a ta menday ma a deɓa.