Psaumes 99 - Ma Zhiklè

¹ Ndo nzi pèc pècèk, bai; ndohi herkeda ta gudzai. Nengaʼa a nzi a géɗ chérubimhai; herkeda a gudzai.

² Ndo nzi pèc pècèk mbiaʼa te Sion, a zhè, a fena ndohi herkeda tèlèba.

³ Sèi ta slébèrdè nzlembaɗ ngaya mbiaʼa, mwuɗitpa, nkezlaʼa!

⁴ Bai, wuɗi na zhè, kita ambaha. Ka, man ka vi ma kita. Ma kita a ngi-zuraʼa ka gu te Jacob.

⁵ Va-nzala Ndo nzi pèc pècèk, Zhiklè nga, va-kalahai a deɓ skwi nfi sak nengaʼa! Zhiklè nkezlaʼa!

⁶ Moise a Aaron te va ndohi mvi skwi a nengaʼa, Samuel te va ndohi man ta tsi ri a nzlembaɗ nengaʼa. Ta tsu ri a Ndo nzi pèc pècèk, a nengaʼa a mʼmbedka taa ma.

⁷ A ngaɗa ta te va vanai. A tengaʼa ta ɓüro ma nkwèr nengaʼa, ta dzodzor ma kita man a va ta.

⁸ Ndo nzi pèc pècèk, Zhiklè nga, ka mbeɗka ta a ma. Ka Zhiklè man kra pra ta malai, aman sèi man ta pela mali ta.

⁹ Va-nzala Ndo nzi pèc pècèk, Zhiklè nga, va-kalahai a deɓ sak nengaʼa a sam za nengaʼa nkezlaʼa! Aman Ndo nzi pèc pècèk, Zhiklè nga, nengaʼa nkezlaʼa.