Psaumes 96 - Ma Zhiklè

¹ Va-sla na dimèsh mɓuaʼa a Ndo nzi pèc pècèk! Herkeda tèlèba va-sla na dimèsh a Ndo nzi pèc pècèk!

² Va-sla na dimèsh a Ndo nzi pèc pècèk, vo-slubordo nzlembaɗ nengaʼa, va-nju ma mʼmbel ndo nengaʼa a pats a vaɗ!

³ Va-njè ta nʼnjèl nengaʼa a ndohi nte deɓa, a nrkedi nengaʼa a ndohi herkeda tèlèba!

⁴ Aman Ndo nzi pèc pècèk mbiaʼa, amba aman nga shida na gèɗ kumba. Nengaʼa wuɗitpa, a fena zhiklèhi ngiɗè tèlèba.

⁵ Aman Zhiklè ndohi nte deɓa, vri amɓalai; sèi Ndo nzi pèc pècèk a ngau giɗfèk.

⁶ Nslébèrdè a nʼnjèlè a sam di nengaʼa. Wuɗibai a nʼnjèl-bai a sam nengaʼa nkezlaʼa.

⁷ Kinè, verzi ndohi herkeda, va-nzala Ndo nzi pèc pècèk, vo-slubordo wuɗi nengaʼa!

⁸ Vo-slubordo nzlembaɗ Ndo nzi pèc pècèk, va-va na skwai, vo-washkè a gi nengaʼa!

⁹ Va-kalahai a deɓ sak Ndo nzi pèc pècèk, va-dzazla va kinè a skwi nkezlaʼa! Herkeda tèlèba, va-gudzau a sam nengaʼa!

¹⁰ Va-gaɗa ta ndohi nte deɓa: Ndo nzi pèc pècèk, bai! Herkeda nʼngaʼa gedeng-gedengaʼa, a da giɗè va azɓai. Nengaʼa a gi kita zuraʼa a ndohi herkeda.

¹¹ Giɗfèk da gu langlangaʼa, herkeda da wuffa a gèɗ nengaʼa, iyam mbiaʼa da hubata, da tsu ganga, a skwi nte pa tèlèba!

¹² Dak da wuffa, a skwi te pa tèlèba, wof nhayaʼa da hazlawa

¹³ a sam Ndo nzi pèc pècèk; aman a shkè, a shkè a ngi kita herkeda. Nengaʼa a da gi kita herkeda zuraʼa, a gi kita ndohi herkeda a ma nengaʼa nzuraʼa.