Psaumes 94 - Ma Zhiklè

¹ Ndo nzi pèc pècèk, ka Zhiklè man ta pela ka gèɗ. Zhiklè mpil gèɗ, gudko nga va a dai!

² Ka ndo kita herkeda, slambaɗa, pel ta ndohi nfi va a skwi ambaɓiaʼa!

³ Ndo nzi pèc pècèk, ndohi ambaɓihiaʼa ta zhè, mwuffè tengaʼa a ndikè ta ahngwa? Ta wuffè nʼnzi tèkè?

⁴ Ndohi malihai ta dérɗè ndo, ndohi man ta gi skwi man ambaɓai, ta gre gèɗ.

⁵ Ndo nzi pèc pècèk, ta mbatsaha ta ndohi ngaya, ta ga ta matakwan a ndohi nʼndi gi ngaya.

⁶ Ta keɗa ngwoz mazai, a ndo mbrok, ta zlama ta daʼai a wud dikai,

⁷ a ta gaɗa: Ndo nzi pèc pècèk a nrka ɓai, Zhiklè Jacob a sun ɓai.

⁸ Kin ndohi nrzlaʼa te ndev ndohai, va-suna! Kin madaɗauhai, kin da ngècè maya a ngèmè?

⁹ Nengaʼa man a gau zlembaɗ, zlembaɗ na azɓi dè? Nengaʼa man a gau dai, di na azɓi dè?

¹⁰ Nengaʼa man a ngatsa ta maya a ndohi herkeda, a ga ta ndzoan azɓi dè? Nengaʼa a senda ta skwiandohai.

¹¹ Ndo nzi pèc pècèk a sun skwi man ndo a hérèʼa, a suna, nara kozlar genè.

¹² Ndo nzi pèc pècèk, mwuffè a sam ndo man ka ngatsa na maya, man ka slebda na ma kita ngaya,

¹³ a ka gi aman a nzai na a pats matakwan, aman ta ri vèvèɗ a hai a ndo ambaɓiaʼa.

¹⁴ Aman Ndo nzi pèc pècèk a da kwol ta ndohi nengaʼa azɓai, a da jèkeda skwi nʼndi gi nengaʼa azɓai.

¹⁵ A da va na kita a ri ndo nzuraʼa zaʼa. Ko wawa man ndav nengaʼa nzuraʼa, ta da jèjèrèʼa.

¹⁶ Nda gèɗè a gèɗ ga a sam ndohi ambaɓihia wa? Nda gi var a géɗ ga a ndohi malihi wa?

¹⁷ Aman agassa Ndo nzi pèc pècèk a ntakahay ɓai, ar ani nshèffè ga klèng, i mets ga ma.

¹⁸ Aman i gaɗa: Sak ga a slèfèɗè! Pombi ngaya, Ndo nzi pèc pècèk, a ngakay auda.

¹⁹ Aman nhér gèɗ zlau te ndav ga a gwo-ryè a hai, ma man ka bidyè a vna, a men-day mèzhèɓ a ndav.

²⁰ Ka mbi a ngi kita a ndohi ambaɓihiaʼa dè? Tengaʼa man ta dérɗè ma kita.

²¹ Ta vhè ma a géɗ nshèffè ndo nzuraʼa, a ta fa na mali a gèɗ a ndo man mali na azɓai.

²² Aman Ndo nzi pèc pècèk, gi ga ndakmaʼa. Zhiklè ga, sam man i nghédè va a pa.

²³ Nengaʼa a da pela ta ara mali ta, shèwa tengaʼa a da gedas ta. Ndo nzi pèc pècèk, Zhiklè nga, a da gedas ta.