Psaumes 91 - Ma Zhiklè

¹ Ndo man a nzi a sam man Zhiklè te géɗèʼa a nghedaʼa a hwaɗaʼa, ndo man a nzi a mèzhèɓ Zhiklè Bi wuɗai,

² a slaha a ngaɗa na Ndo nzi pèc pècèk: ka sam ga nlèaʼa, gi ga te za, Zhiklè ga man i pi ndav a ka.

³ Aman nengaʼa a mbelka ka auda te ri ɓalai ndo wèrrè, te ri mʼmetsai, te ri gidiɓèr man a gedas ka.

⁴ A nghede ka a hwaɗ kelpasl nengaʼa, a ka nzi a hwaɗ ri nengaʼa ara man a sam nlèaʼa. Pombi nengaʼa nara slarba a gambar.

⁵ Zlau a da dza ka a vaɗ hendzalalaʼa azɓai, a ka gi zlau sulom man ta foko ka ma a ngwi a pats, azɓai,

⁶ a ka gi zlau gidiɓèr man a wucè a va ndo a vaɗ, a matakwan man a zhüvè a va ndo a gèɗ pats, azɓai.

⁷ Ko ndohi dumbok dumbok ta kèlèhi a tsagi ngaya, a ndohi gozhèm kula te civèɗ ri mandi ngaya, a lama ka azɓai.

⁸ Ka da rkaʼa, a di ngaya, a ka rka ara man ndohi ambaɓihiaʼa ta ngècè kita.

⁹ Aman Ndo nzi pèc pècèk, nengaʼa sam ngaya nlèaʼa, Zhiklè te géɗèʼa, sam man ka nghéɗè va a pa.

¹⁰ Ka da zli gèɗ a skwi ambaɓiaʼa azɓai, a matakwan a hérdè va a gi ngaya azɓai, ko kèshkata.

¹¹ Aman Zhiklè a da gaɗa ta golahi nengaʼa aman ta ɓir ka a civèɗ ngaya tèlèba.

¹² Ta da humbat ka te ri tengaʼa, aman kwa a tsama ka sak azɓai.

¹³ Ka da mbatsa ta a gèɗ a marizhèlèhai a zhüzhok a kokoya a skwi nara kedam, a ka kérɗe ta tʼhwaɗ sak ngaya.

¹⁴ Te man a gso va a iyè, i woy a i mbelkaɗauda; i da ɓerèʼa, a gèɗ man a sun nzlembaɗ ga.

¹⁵ A bahayè, a i da mbeɗa na a ma, i da zhè a sam na te matakwan, i da ckoɗauda a i feda a sam man ta slébèrdèʼa.

¹⁶ I da va na nshèffè man a dè a ma ma, ha a ngeza na, a i ngra na skwi mʼmbel ndo ga.