Psaumes 90 - Ma Zhiklè

Ɗèlèwèr mafadaʼa

¹ Nisi ri Moise, ndo Zhiklè. Bai, Zhiklè, kasam nganlèaʼa pèc pècèk, zlèzlèa, a ndè a ma ma a sam wud wuda.

² Aman za az di ɓai, a herkeda a skwi herkeda az di ɓai, te nhinkaɗ na ka Zhiklè ka zhè, pèc pècèk a ma ma ba a mèdèp.

³ Ka menda ndo a deɓa a va mberfenèk, a ka gaɗa ta: Vo-washkè a deɓa, wud ndohai!

⁴ Mvi dumbok dumbok, a sam di ngaya ara pats staɗ genè, man a nʼndev na adatsa, ara nʼngwèdè nzhun staɗ.

⁵ Ka nge ta, a mvi a mvai, ta ara kuza man a fcè.

⁶ A prèk a wurzhè, a pai, a dakwaɗ a ɓüt na, a ngwor na ma.

⁷ Nga zi nga tsam-tsam a sam ndzoan ngaya; aman ka gi ndav a gèɗ nga, nga bazl nga a nasa nasa.

⁸ Ka feda mali nga a sam di ngaya, skwi man nga ngheda tʼhwaɗaʼa, ka feda a sam di ngaya nhelaʼa.

⁹ Halau, pats nshèffè nga tèlèba ta ndev ta a sam ndzoan ngaya, mvi nshèffè nga a dè na ara ndo man a mèndè nshèffè na a hai.

¹⁰ Nga nzi a nshèffè nga mvi 70; aman nga hala kumba, a gi mvi 80; nga nzakada a mizlinè a matakwan. Nshèffè nga a ndev tsam-tsam, a hi ara diak man a hai.

¹¹ A hér wuɗi ndzoan ngaya wa? Nsun verzi ngi-ndav ngaya wa?

¹² Senda nga, a nga ngrè pats nshèffè nga, a nga ngècè maya te gèɗ.

¹³ Ndo nzi pèc pècèk, ngwodko gèɗ a deɓa a sam nga! Ɓèlèlihi ngaya ta da se ka te va a ngèmè?

¹⁴ Va nga pombi ngaya a nciɗ sam a nciɗ sam, a nga wuffè a nga gi langlangaʼa a pats nshèffè nga tèlèba.

¹⁵ Pa nga mwuffè a ma zaʼa, te di pats man ka manda nga gèɗ a hai, ngur mvi lèmèlèmè ara man nga su matakwan.

¹⁶ Ngreda ta skwi man ka giaʼa a ɓèlèlihi ngaya, ngreda ta nʼnjèl ngaya a wudahi ngaya!

¹⁷ Pombi Ndo nzi pèc pècèk, Zhiklè nga, da zhè a gèɗ nga! Da gau aman mizlinè ri nga a grè a ma ma. Halau, gau a mizlinè ri nga a grè a ma ma!