Psaumes 9 - Ma Zhiklè

¹ Psaume David.

² Ndo nzi pèc pècèk, i woy a i shida ka gèɗ a ndav ga tèlè, a i ngreda nrkedi ngaya auda tèlè.

³ I wuffè a gèɗ ngaya, a i gi langlangaʼa. I sli dimèsh a gèɗ nzlembaɗ ngaya, ka Zhiklè te géɗèʼa.

⁴ Mayamhi ga ta hi ta, skwa a tsama ta sak, a ta bazl ta a sam di ngaya.

⁵ Ka nzay a deɓa a sam kita, ka gu kita, ka ndo kita nzuraʼa.

⁶ Ka ga ta ndzoan a ndohi nte deɓa, ka gedas ta ndohi ambaɓihiaʼa. Ka gedassa nzlembaɗ tengaʼa a mèdèp.

⁷ Ndohi mayamhai, ta gedas ta a mèdèp; kokwarhi man ka mɓedaʼa, ndo a her ta asaɓai.

⁸ Aman Ndo nzi pèc pècèk a nzi a gèɗ sam nʼnzi bai a mèdèp. A ntil a sam nʼnzi bi nengaʼa a ngi kita.

⁹ A gi kita ndohi a gèɗ herkeda a di na zuraʼa.

¹⁰ Gar haha Ndo nzi pèc pècèk hwaɗ zlazlar ndo man ta ga na matakwan, hwaɗ zlazlar a pats mwuɗitpa.

¹¹ Gar haha ko wawa man a sun nzlembaɗ ngaya, a pi ndav a ka. Aman tengaʼa man ta woy ka, ka Ndo nzi pèc pècèk ka kwol ta azɓai.

¹² Va-sla na dimèsh a Ndo nzi pèc pècèk, man a nzi a sam nʼnzi bai te Sion. Va-njè ta ndohi herkeda skwi man a gau.

¹³ Aman nengaʼa a hér ndo man a keɗa ndo, a jhèɗè pil gèɗ; kuɗ ndohi te matakwan a pca na a gèɗ azɓai.

¹⁴ Ndo nzi pèc pècèk, i da se ka te va! Na haha i gi mbelawa a sam ndohi man ta gi shèwa a iyè. Ka ckay a deɓa a ntama-gi mʼmetsai,

¹⁵ aman i da njè ma man i slèbèrdè ka a vna tèlè, a i wuffè a ntamagi kokwar Sion, a gèɗ man ka mbelyè.

¹⁶ Ndohi nte deɓa ta kal ta a vèvèɗ man ta raʼa, ta kal ta a gadda man ta pedahai a metsar.

¹⁷ Ndo nzi pèc pècèk a ngrédè va nengaʼa auda, a gi kita, a gshè ndo ambaɓiaʼa a gèɗ skwi man a gau.

¹⁸ Ndohi ambaɓihiaʼa sèi ta dè a sam mʼmetsai, ndohi nte deɓa tèlèba man Zhiklè a pca ta a gèɗ.

¹⁹ Aman ndo ntawassaʼa a pca na a gèɗ a mèdèp azɓai. Skwi man mbelawhi ta zhèrè dai, a zi a mèdèp azɓai.

²⁰ Ndo nzi pèc pècèk, slambaɗa, ndo da fa ka va a gèɗ ɓai, a ndohi nte deɓa da ngots kita a sam ngaya!

²¹ Ndo nzi pèc pècèk, pa ta zlau a gèɗ! Ndohi nte deɓa da suna, ta ndohi ambali genè.