Psaumes 89 - Ma Zhiklè

¹ Dimèsh Ethan, ndo Ezrach.

² I woy a i sli dimèsh a géɗ pombi Ndo nzi pèc pècèk a mèdèp, a i njè nlèɓèslè ngaya a ma ma a sam verzi wud wuda.

³ I gaɗa: Pombi nʼngaʼa te zhiklè a mèdèp, nlèɓèslè te verziaʼa.

⁴ Ka gaɗa: Nga derzla ma nga a ndo ga man i ngots-koɗauda, i mbaɗa na David, ɓèl ga:

⁵ I gi aman verzi ngaya a zhè pèc pècèk, a i til sam nʼnzi bi ngaya a mèdèp.

⁶ Ndo nzi pèc pècèk, giɗfèk do slubordo nrkedi ngaya, mpi ndohi nkezlaʼa do slubordo nlèɓèslè ngaya!

⁷ Te giɗfèk ngar Zhiklè wa? Te va golahi Zhiklè, ngar Ndo nzi pèc pècèk, wa?

⁸ Ndohi nkezlaʼa ta gi zlau Zhiklè, zlau nengaʼa a dza ta. Zhiklè mbiaʼa, wuɗitpa a sam ndohi tèlèba man ta tèuda a pa.

⁹ Ndo nzi pèc pècèk, Zhiklè bi mbiaʼa, ntar ka wa? Ka, wuɗi ngaya a zhè, Ndo nzi pèc pècèk, nlèɓèslè ngaya a zhè a sam ngaya.

¹⁰ Ka fena iyam man a gi tskuɗuf-tskuɗufaʼa; man a grè va, ka mandahai.

¹¹ Ka mbatsaha Egypte a sak ara nckon-do, ka dzar ta mayamhi ngaya a wuɗi ngaya.

¹² Gidfèk a ngaya; herkeda ba a ngaya. Sam herkeda, a skwi nte pa, ka ngau.

¹³ Ka gu te man a géɗèʼa, ka gu te man a dukwaɗ. Thabor a Hermon ta wuffè a géɗ nzlembaɗ ngaya.

¹⁴ Ri ngaya, wuɗi na zhè ara ri ngul ndo. Wudi ri ngaya a zhè, ri mandi ngaya nzlatseda.

¹⁵ Kita a ngi-zuraʼa nte verzi sam nʼnzi bi ngaya. Pombai a nlèɓèslè ta zhè a sam di ngaya.

¹⁶ Mwuffè a sam ndohai man ta nzal ka, man ta dè a sam man ka helaʼa, Ndo nzi pèc pècèk,

¹⁷ man ta wuffè a géɗ nzlembaɗ ngaya pèc pècèk, a ta sli dimèsh a géɗ ngi-zuraʼa ngaya.

¹⁸ Aman ka, wuɗi ta, man ta jégèr va a géɗèʼa, a géɗ pombi ngaya, drom tengaʼa nzlatseda.

¹⁹ Halau, Ndo nzi pèc pècèk, gambar nga; Zhiklè Israel nkezlaʼa, bi nga.

²⁰ Te va nasa ka gaɗa ta ɓèlèlihi ngaya te nshunè, a ka gaɗa: I pada na gèɗ a ngul ndo, te va ndohai i ngotskoɗauda staɗ a i gaʼa a mbiaʼa.

²¹ I ngots David, ɓèl ga, i faɗa na mbar nkezlaʼa a geɗ.

²² Ri ga da ɓüro pèc pècèk, ri ga da nzalaʼa.

²³ Ndo mayam da kala na a va ɓai, nderkèzhè ndo da ga na matakwan ɓai.

²⁴ I woy a i mbatsaha ta ndohi mayamhi nengaʼa a sam di na, a i bazl ta ndohi man ta gi shèwa a nengaʼa.

²⁵ Nlèɓèslè ga a pombi ga ta da zhè a nda nengaʼa, wuɗi nengaʼa a zhè, a géɗ nzlembaɗ ga.

²⁶ I da gaɗa na, aman a kwèr iyam mbiaʼa, a i va na woyamhai a ri a nengaʼa.

²⁷ A da bahayè: Ka bab ga, Zhiklè ga, za skwi mbelyè!

²⁸ I woy a i gaʼa a tsuvo-maʼa, a bai a géɗ bihi herkeda.

²⁹ I woy a pombi ga a nza a géɗ nengaʼa pèc pècèk, a nderzlè-ma ga da nza zuraʼa a sam na.

³⁰ I woy a ndohi verzi nengaʼa ta nzi a mèdèp, a sam nʼnzi bi nengaʼa, ha giɗfèk a ndev na.

³¹ Aman wudahi nengaʼa tajèkeda ma kita ga, a ta jejèr ma man i gaɗa ta azɓai,

³² aman ta derɗe ma man i senda ta, a ta jèjèr ma nkwèr ga azɓai,

³³ i da ga ta ndzoan a géɗ mali ta a mènèwèd, a i tse ta a géɗ mphömè ta.

³⁴ Aman i woy a i cèma na pombi ga auda a gèɗ azɓai, i jèkè nlèɓèslè a géɗ nengaʼa azɓai.

³⁵ I woy a i dérɗè nderzlè-ma ga azɓai, i ngwèdè ma man i goɗ te ma ga azɓai.

³⁶ I mbaɗa sak staɗ a nshèffè ga nkezlaʼa, te deɓaʼa klèng. I cèkèlma a sam David azɓai.

³⁷ Ndohi nte verzi nengaʼa ta da zhè pèc pècèk, sam nʼnzi bi nengaʼa a da nzi a sam ga ara pats

³⁸ a kia, man ta zi auda a giɗfèk azɓai, man ta gi malwuɗi nlèɓèslèa te giɗfèk.

³⁹ Aman anai ka gi ndav a géɗ ndo man ka fada na mbar a gèɗ, a ka kwolaʼa, ka kaldaussa.

⁴⁰ Nderzlè-ma a ɓèl ngaya ambaha ka ɓai, ka mbatsaha mpèɗè gèɗ bi nengaʼa a sak.

⁴¹ Ka mbeɗa zlazlar nengaʼa; gi ngurè ba ka ndedaussa.

⁴² Ta tèlèba man ta bizhè a civèɗèa, ta gi metsar skwi nengaʼa; nengaʼa skwi ngwoshè nslamagihi na.

⁴³ Ka zlatsede ta ri a ndohi shèwa nengaʼa a vata, ka gu a mayamhi nengaʼa ta wuffè tèlèba.

⁴⁴ Halau, ka kalda na tsakwal nengaʼa a deɓa, ka takaha te var ɓai.

⁴⁵ Ka gedassa nʼnjèl nengaʼa, ka kalda sam nʼnzi bi nengaʼa.

⁴⁶ Ka herdaha mvi gol nengaʼa, ka pa na hori a dai.

⁴⁷ Ndo nzi pèc pècèk, ka nghede va ngaya, a ndzoan ngaya holholaʼa ara vo-gwa, a nzi ta ahngwa?

⁴⁸ Ndo nzi pèc pècèk, huro: Nshèffè mè? Ndohi herkeda tèlèba man ka ge ta, ta skwi ambalai.

⁴⁹ Ndo man a nzi a nshèffè, man a da metsi azɓai, wa? Ndo man a mbelko nshèffè nengaʼa auda te ri wuɗi mʼmetsi, wa?

⁵⁰ Bai, Zhiklè, pombi man ka ngreda auda te va nasa, man ka mbaɗa na David te nlèɓèslè ngaya, na tema?

⁵¹ Bai, Zhiklè, hur hori ɓèl ngaya, ngwoshè ndohi herkeda man a dzay te ndav,

⁵² ndohi mayamhi ngaya man ta derɗyè, Ndo nzi pèc pècèk, tengaʼa man ta tsi derngasl a verzi ndo man ka bada na mbar a gèɗ.

⁵³ Ngo-slubordokoy Ndo nzi pèc pècèk a mèdèp! Amen, Amen!