Psaumes 88 - Ma Zhiklè

¹ Dimèsh. Psaume ndohi Koré. Dimèsh Héman, ndo Ezrach.

² Ndo nzi pèc pècèk, Zhiklè mʼmbelyè, a pats i dzhaɗ ka, ko a vaɗ i kuɗi a sam ngaya.

³ Da tsena ntsi ri ga, fu zlembaɗ a kuɗ ga!

⁴ Ndav ga a nʼngeza a matakwan, nshèffè ga a civèɗ mʼmetsai.

⁵ Ta ngryè a va ndohi vèvèɗ ma, i gaʼa a ndo man wuɗi na azɓai.

⁶ Sèi i nzi te ndev ndohi mʼmetsaʼa, te vèvèɗ ara ndohi man ta bazl ta, man ka her ta asaɓai, man ka takaha ta asaɓai.

⁷ Ka fiyè a vèvèɗ, a ruva, a hwaɗ iyam.

⁸ Ndzoan ngaya a nzalay a gèɗ, iyam ngaya a mbizhèmay gèɗ a pa.

⁹ Ka gu a mandalahi ga ta jèkyè, ka gu aman i ndara ta. I dzawaʼa, a i slaha a i shkè auda bai,

¹⁰ matakwan a pay a dai. Ndo nzi pèc pècèk, i baha ka pèc pècèk. I pelaha ri ga a sam ngaya.

¹¹ Ka da gi nrkedi a sam ndohi mʼmetsaʼa dè? Ndo vèvèɗ a da slèmbèɗè a nslebarde ka dè?

¹² Ta njè ma pombi ngaya te gi dzavi dè? Ta njè nlèbèslè ngaya te vèvèɗ dè?

¹³ Ta sun nrkedi ngaya te va ruva dè? Ta sun skwi mʼmbel ndo ngaya te vèvèɗ man skwi a pca ta a gèɗ dè?

¹⁴ Ndo nzi pèc pècèk, gar haha i baha ka, a prèk a prèk i tsi ri a ka.

¹⁵ Ndo nzi pèc pècèk, ka kwolyè èhèmè? Ka, woy a ka rkayè ɓai èhèmè;

¹⁶ Te gol ga, i mbelawa, i hezakaʼa, ka pay zlau a gèɗ, a zlau a keɗyè.

¹⁷ Ka gi ndav holholaʼa a géɗ ga, skwihi ngaya man ka pray zlau a va a vna ta gedassyè.

¹⁸ Ta mbizhèmyè a pa ára iyam pèc pècèk, ta ngalyè a pa tèlèba.

¹⁹ Ka gu, a mandál ga a masli ga ta jèkyè a to do dra, mandal ga antanta, sèi ruva.