Psaumes 87 - Ma Zhiklè

¹ Psaume ndohi Koré. Dimèsh. Skwi man Ndo nzi pèc pècèk a mpau a gèɗ za nkezlaʼa, a woya kumba.

² A woy ntamagi kokwar Sion, a fena gi Jacob ngiɗè tèlèba.

³ Ka kokwar Bi Zhiklè, ta slefi skwi mbelaʼa tsaɗ tsaɗ a gèɗ ngaya.

⁴ I nger ta Egypte a Babylone a Philistie a Tyr a Ethiopie a va gwoli ga: ta yau zana te pa, ta yau zana te pa.

⁵ Aman Sion, ta baha na ‘mam nga’. Ndohi tèlèba ta ye ta te pa. Zhiklè nte géɗèʼa a ri na a nɗizlaʼa.

⁶ Ndo nzi pèc pècèk a mwinde ta ndohi herkeda a ɗèlèwèr: ta yau zana a haha, ta yau zana a haha.

⁷ Ta tèlèba ta gècè a ta sli dimèsh: Nrkedi tèlè a tsoko gèɗ auda te ka!