Psaumes 85 - Ma Zhiklè

¹ Psaume ndohi Koré.

² Ndo nzi pèc pècèk, ka gu amba a sam kokwar ngaya, ka helka ta ndohi Jacob a deɓa.

³ Ka pra ta malai a ndòhi ngaya, ka fa na kwa a gèɗ a mali tengaʼa tèlèba.

⁴ Ndzoan ngaya tèlèba ka menda a deɓa, ka jèkeda ngi-ndav man ka gu a vata.

⁵ Zhiklè, ndo mʼmbel nga, til nga zaʼa, ndav da dza ka a géɗ nga ani asaɓai!

⁶ Ka woy a ka gi ndav a géɗ nga a mèdèp dè? A ndzoan ngaya a dè a ma ma a verzi wud wuda nga dè?

⁷ Ka woy a ka va na wuɗi a nshèffè nga za dè? A ndohi ngaya ta wuffè a géɗ ngaya.

⁸ Ndo nzi pèc pècèk, ngra nga pombi ngaya, va nga skwi mbel ndo ngaya!

⁹ I woy a i tsena skwi man Ndo nzi pèc pècèk Zhiklè a gaɗayè. A mpasla ta ri gumi ahai andohi na, a ɓèlèlihi na, a tengaʼa man ta ngwodko ndav ta a sam na.

¹⁰ A vava, skwi mbel ndo Zhìklè a zhè ndul ndul a sam tengaʼa man ta gi zlauaʼa. Nʼnjèl Zhiklè da zhè te kokwar nga!

¹¹ Pombai a nlèbèslè ta zli gèɗ; ngi-zuraʼa a gumai ta humdè va.

¹² Nlèbèslè a fee tʼherkeda, a ngi-zuraʼa a gudko gèɗ a hai te géɗèʼa.

¹³ Ndo nzi pèc pècèk a vi pombai, a herkeda nga agi skwai.

¹⁴ Ngi-zuraʼa a dè a ma nengaʼa, a gumai a jèjè-rèʼa te deɓa.