Psaumes 83 - Ma Zhiklè

¹ Dimèsh. Psaume Asaph.

² Bi Zhiklè, ka nza ngay tètè ɓai! Ka nza ngay ɓislè ɓai, goɗo, Zhiklè.

³ Na haha, mayamhi ngaya ta hèzlèwè, a tengaʼa man ta gi shèwa a ka, ta gre gèɗ.

⁴ Ta vhè ma a géɗ ndohi ngaya, ta slambaɗa ta va a ndohi man ka war ta.

⁵ Ta gaɗa: Nga-gudossokoya, da gu a kokwar-bi asaɓai, da slefu nzlembaɗ Israel asaɓai!

⁶ Halau, ta cèmma a ndav staɗ, ta derzlè ma a gédè a ka:

⁷ ndohi gi Edom, a ndohi Ismael, a Moab, a Hagaren,

⁸ Guebal, Ammon, a Amalek, ndohi Philistie a ndohi Tyr.

⁹ Ko ndohi Assyrie ba ta humda va a tengaʼa, a ta takaha ta ndohi Lot.

¹⁰ Ga ta skwi lèmèlèmè ara a sam ndohi Madian, a Sisera, a Jabin a ma woyam Kison!

¹¹ A ta bazl ta te En-Dor, a ta nde ta a ndaderda herkeda.

¹² Ndohi mbibihiaʼa, ga ta ara Oreb a Zeeb, wud bihi tengaʼa tèlèba ara Zébach a Tsal-munna,

¹³ te man ta gaɗa: Ngo-dumokoya, ngo-cokoy kokwar Bi Zhiklè!

¹⁴ Zhiklè ga, nde ta, ara koskosi man ndombozlor a heldama,

¹⁵ ara vogwa man a ndi wof nhayaʼa! Ara nèʼèn vogwa man a ndi za!

¹⁶ Hau a verzi tengaʼa arsa te va ndombozlor, pra ta zlau a va a kozlar ngaya!

¹⁷ Pa ta hori a dai, a ta hèsh nzlembaɗ ngaya, Ndo nzi pèc pècèk!

¹⁸ Sèi ta ngècè hori a dai a ta gi zlau a mè-dèp, gèɗ ta ndzakaɓa a ta gedas ta!

¹⁹ Te deɓaʼa ta da suna, ka staɗgenè, ka Zhiklè te géɗèʼa, a géɗ herkeda tèlèba.