Psaumes 81 - Ma Zhiklè

¹ Man a Asaph.

² Va-wuffa na Bi Zhiklè, Zhiklè wuɗi nga! Va-sla na dimèsh a Zhiklè Jacob!

³ Va-fau dimèsh, va-tsu ganga, va-tsu ganzavar a tèzlèzlèu.

⁴ A mvèng kia va-tsu tolom, aman ki nʼndha te gai, ngo-gokoy ngolala nga!

⁵ Nasa di tsuf ndohi, Israel; ma kita Zhiklè Jacob a gaɗa ta arsa.

⁶ Zhiklè a ngau malwuɗi haha te Joseph, aman a njèkeda kokwar Egypte. A ntse-na ngèɗè ngiɗè man a sun bai, man a gaɗa:

⁷ I cèma ka skwi nʼnzalaʼa auda a daʼai, i cèma ka duzlak auda a gèɗ.

⁸ Te va matakwan ngaya ka boho, a i ndzavka kà auda. I mbeɗa ka a ma te va ntsi iyam. I jkede ka a ma iyam Meriba.

⁹ Ndohi ga, va-fu zlembaɗ, i woy a i ngatsa kinè maya! Israel, aman agassa ka woy a ka tsena ma ga!

¹⁰ I woy Zhiklè ngiɗè a sam ngaya bai! Ka tsu ri a zhiklè ndohi nte deɓa bai!

¹¹ Iyè Ndo nzi pèc pècèk, i Zhiklè ngaya, man i cka ka auda te kokwar Egypte. Winè ma ngaya twèng! I vra ka a ka ngezaʼa.

¹² Aman ndohi ga ta tsena ma ga bai, Israel a nfa gèɗ a ma ga bai.

¹³ A i jèke ta a ri a ndav tengaʼa nsassa-yaʼa, a ta dzodzor civèɗ ara man ndav ta a woyaʼa.

¹⁴ Aman agassa ndohi ga ta tsena ma ga! A woy Israel da dzodzor civèɗ ga!

¹⁵ Ar i ga ta mayamhi tengaʼa a ɓèlè tsam-tsam, a ri ga a tse ta ndohi nʼnga ta matakwan,

¹⁶ a ndohi man ta gi shèwa tengaʼa ta gi huyokokoʼa a sam ta, ma-nam tengaʼa a zhè a mèdèp.

¹⁷ Ar i woy a i va ta dau ma gai a skwi nʼndhi, a vong-wom te za a ngeza ta.