Psaumes 80 - Ma Zhiklè

¹ Man a Asaph. Psaume.

² Ka ndo mɓer Israel, fu zlembaɗ! Ka man ka de ta ndohi Joseph ara rèwè tambakhai, – ka man ka nza a géɗ chèrubimhai, – gudko ta va a dai

³ a ndohi Ephraim a Benjamin a Manassé! Sala wuɗi ngul ngaya, a ka shkè a ka takaha nga!

⁴ Bi Zhiklè, til nga zaʼa, di ngaya da hela nga sam dzayaʼa, a nga mbel nga!

⁵ Bi Zhiklè bi mbiaʼa, ndohi ngaya ta tsi ri a ka, a ka gi ndav genè, a ndikè ta ahngwa!

⁶ Ka ga nga kuɗa a va movar, ka ga nga kuɗa a vata a nga siaʼa ara iyam,

⁷ ka ge nga a skwi man nslamagihi nga ta verslè a géɗèʼa, a ndohi mayamhi nga ta ngwossaha nga.

⁸ Bi Zhiklè bi mbiaʼa, til nga zaʼa, di ngaya da hela nga sam dzayaʼa, a nga mbel nga!

⁹ Te kokwar Egypte ka ptsko wof barassa man a iyè; ka dzam ta ndohi kokwar a ka ngeda pa.

¹⁰ Ka bezla na sam a ma na, a nengaʼa a tsi zluzlor, a tsi rai, a ndha a gèɗ herkeda.

¹¹ A pa na mèzhèɓ a di a zahai, rihi nengaʼa a fena ri wof tsna Zhiklè.

¹² A tsi rai, ha ndè a ma iyam mbiaʼa, ri nengaʼa a ndikè a mawoyam.

¹³ Kazli-na zlazlar nengaʼa èhèmè, a ko wawa man a bizhè a pa a pèrèʼa.

¹⁴ Mari wadala a ndiaʼa, skwi dakhai ta dè a pa.

¹⁵ Bi Zhiklè bi mbiaʼa, til nga zaʼa, di ngaya da hela nga sam dzayaʼa, a nga mbel nga! Paka di a hi te giɗfèk, wor wof barassa haha,

¹⁶ ɓüro, nengaʼa man ri mandi ngaya a nʼngeda pa.

¹⁷ Ta fa na vogwa ara man ta fi vogwa a koskosai; ma ngaya da gedas ta!

¹⁸ Ri ngaya da takaha ndo nte civèɗ ri mandi ngaya, ndo man ka nzalaʼa te di man a wuɗi ngaya.

¹⁹ Ciɗ nga, a nga woy a nga da tsi rai a nzlembaɗ ngaya, a nga da jèke ka te deɓaʼa asaɓai.

²⁰ Ndo nzi pèc pècèk, Bi Zhiklè bi mbiaʼa, til nga zaʼa, di ngaya da hela nga sam dzayaʼa, a nga mbel nga.