Psaumes 79 - Ma Zhiklè

¹ Psaume Asaph. Bi Zhiklè, ndohi nte deɓa ta kala na va a kokwar ngaya, ta lizhè gi ngaya nkezlaʼa, a ta ndeda Jérusalem a kwazlazlam.

² Ta va ta nckondo ndohi mizlinè ngaya a ɗiakihai tʼhwaɗ giɗfèk a ta ndiaʼa, a ta va ta nckondo ɓèlèlihi ngaya a skwi dakhai a ta ndiaʼa.

³ Pombaz tengaʼa mbaɗa tʼhai ara iyam a tsagi Jérusalem tèlèba, ndo a nre ta ɓai.

⁴ Ndohi a tsagi nga ta derd nga, ta liv nga, ta ngwossaha nga, ta tèlèba man nslamagihi nga.

⁵ Ndo nzi pèc pècèk, ngi ndav ngaya a nzi ta ahngwa? Srak ngaya holholaʼa haha a da ndikè ta ahngwa?

⁶ Kalda ta ndzoan ngaya a gèɗ a ndohi herkeda man ta sen ka ɓai, a gèɗ a kokwar bihai, man ta tsi ri a nzlembaɗ ngaya azɓai.

⁷ Aman ta ndeda Jacob a ma, a ta duma gi nengaʼa.

⁸ Ka fa nga mali babhi nga a gèɗ ɓai, nga da se ka te va tsam-tsam, aman wuɗi nga azɓai holholaʼa.

⁹ Zhiklè, ndo mʼmbel nga, takaha nga, a gèɗ nʼnjèl nzlembaɗ ngaya, preka nga auda, pra nga mali nga, a géɗ nzlembaɗ ngaya!

¹⁰ Zhiklè tengaʼa tema?—ndohi herkeda da goɗ; arsa èhèmè? Ngra ta ndohi herkeda skwi mpil gèɗ pombaz ɓèlèlihi ngaya, a sam di nga.

¹¹ Nkuɗi ndohi ɓèlè da tsenaha ka! Preka ta ndohai man ta zhuwaʼa a ma dzavai, auda a wuɗi ri ngaya!

¹² A nslamagihi nga, menda ta ngwoshè man ta ngwossaha ka, Bai, Zhiklè, a deɓa a gi sak tsaraɗ.

¹³ Aman nga, ndohi ngaya, nga te va tambakihi ngaya, nga woya a nga shi-da ka gèɗ a mèdèp, a nga minè géɗèʼa, ha nda na ma a sam wud wuda.