Psaumes 78 - Ma Zhiklè

¹ Dimèsh Asaph. Ndohi ga, va-tsena skwi man i slebda kinè! Va-fu zlembaɗ a ma ga!

² I woy a i win ma ga, a i gaɗa kinè a ma tsaval, a i njè kinè ngèlègèɗ ma nzlèzlèa,

³ man nga tsenaʼa, a nga suna, man bababhi nga ta njè nga.

⁴ Ta nghedaha a sam wudahi tengaʼa ɓai, ta njè ta a ndohi te verzi tengaʼa, skwi nʼnzalaʼa man Ndo nzi pèc pècèk a gau, a wuɗi nengaʼa, a nrkedi nengaʼa.

⁵ Ara man a gu skwi malwuɗi te Jacob, a mva ta ma kita a Israel, a ngaɗa ta babhi nga, aman ta ngra ta a wudahi tengaʼa,

⁶ a wudahi tengaʼa ta suna, a wudahi man ta ye di ɓai, a ta da slèmbèɗè a ta da njè ta wudahi tengaʼa zaʼa;

⁷ a tengaʼa ba ta pi ndav ta a Bi Zhiklè, a skwi man Zhiklè a gau da pca ta a gèɗ ɓai, a ta jèjèr ma nkwèr nengaʼa,

⁸ a ta gi azɓai ara babhi tengaʼa man ta gu mèdègèɗ a ta tsena gèɗ ɓai, verzi ndohi man ta mana ndav ta ɓai, man mèzhèɓ tengaʼa nlèɓèslèa a sam Zhiklè ɓai.

⁹ Ndohi Ephraim, ndohi godoma, ta men ta a deɓa a pats var.

¹⁰ Ta dzadzara nderzlè-ma Bi Zhiklè ɓai, ta woy a ta jèjèr ma kita nengaʼa ɓai.

¹¹ Skwi man Zhiklè a gau, nrkedi nengaʼa man a ngra ta, mpca ta a gèɗ.

¹² A ngau nrkedi a sam di babhi ta, te kokwar Egypte, te dak Tsoan.

¹³ A nʼngela woyam mbiaʼa, a mbezde ta te ndevaʼa, a nzlatseda iyam a hai ara zlazlar.

¹⁴ A pats a de ta a vanai, a vaɗ a nèʼèn vogwa.

¹⁵ A ncizla za tʼhèshèkèɗ, a nruɓa samaʼa a iyam mbiaʼa.

¹⁶ A ngau aman iyam a hakaɗauda te za, a iyam a hakaɗahai ara woyam.

¹⁷ Ko ar haha ta gu mali a sam na genè, ta sala gèɗ ta tʼhèshèkèɗ, a sam Zhiklè te géɗèʼa.

¹⁸ Ta poko na gèɗ auda a Zhiklè a skwi man ta hur te ndav ta, a ta dzhoɗo skwi nʼndi man a jènaha ta.

¹⁹ A ta ngrè Zhiklè, a ta gaɗa: Zhiklè a slaha a ntila nga skwi nʼndai tʼhèshèkèɗ dè?

²⁰ Na haha, a ncizla za, a iyam a nhakaɗauda ara woyamhi ta hai. A slaha a nva nga movar a vaʼa, a zluèɗ a ndohi na ɗè?

²¹ Gar haha, aman Ndo nzi pèc pècèk a tsenaʼa, a ngu ndav: vogwa a mvatsa te ndev ndohi Jacob, ndzoan a mshkè a gèɗ Israel,

²² te man ta ca Bi Zhiklè a ndav ɓai, ta pu ndav a skwi ntakaha ta a sam na ɓai.

²³ A nengaʼa a ngaɗa ta vanihai, a mwinè ntamagi giɗfèk,

²⁴ a manna a mshkèhai a gèɗ tengaʼa, ara iyam, a ta ngots skwi nʼndai, a mvoko ta dau te zhiklè.

²⁵ Ndohi ta ndau movar man a shkè te Zhiklè. Zhiklè a nzlinda ta skwi nʼndai man a ndev ɓai.

²⁶ A mbaha na kozlar te civèɗ mvèng pats, a wuɗi nengaʼa, kozlar te tsagi a nʼngakaɗa.

²⁷ A zluèɗ a mshkèhai a gèɗ tengaʼa ara lokotor, ɗiakihai ta zhè ara wyak nte woyam.

²⁸ Zhiklè a mwushedeka ta hi a ndev tengaʼa, a ta tèuda gi tengaʼa a pa.

²⁹ A ta ndau a ta ngeza, a mva ta skwi man ta tétékèʼa.

³⁰ Aman a ngeza ta di ɓai, skwi nʼndi te ma tenga dai,

³¹ Bi Zhiklè a ngu ndav a gèɗ tengaʼa, a mbazl ta mbibihiaʼa te va tengaʼa, a mbazl ta golahi Israel.

³² Ko ar haha ta gu mali zaʼa, a ta co nrkedi nengaʼa a ndav ɓai.

³³ Gar haha a ndev ta pats nshèffè tengaʼa ara kozlar ambalai, a mvihi tengaʼa ta kala a deɓa a zlau mbiaʼa.

³⁴ Aman a mbazl ta, ta hos Zhiklè zaʼa; ta menkaɗa deɓa a ta hos Zhiklè.

³⁵ Ta huro: Bi Zhiklè, sam nga ngedeng-gedengaʼa. Zhiklè te géɗèʼa, ndo nsumka nga a deɓa.

³⁶ Ta woy a ta ngwoda a ma ta, a ta tsokol ma a sam nengaʼa a nèʼèn ta,

³⁷ a ndav tengaʼa ngso va a nengaʼa ɓai, a ta nza lèɓèslèa te nderzlè-ma nengaʼa ɓai.

³⁸ A nengaʼa te pombi na, a géɗ man ndo a sia te va, a mpra ta maii la, a ngedas ta ɓai. Sak kumba a njèkeda ngi ndav, a mva na civèɗ a ndzoan nengaʼa bai.

³⁹ A géɗ man a huro: tengaʼa ndo; nshèffè ta a dè na ara kozlar man a shkè a deɓa asaɓai.

⁴⁰ Ta slambaɗa na vasak kumba tʼhèshèkèɗ, ta gu a civèɗ heshèkèɗ, a ndav nengaʼa a kuɗai.

⁴¹ A ta jkeda Zhiklè gene, a ta poko na gèɗ auda genè, a ta ɗawarama na ndav a Zhiklè Israel nkezlaʼa.

⁴² Ta hur wuɗi nengaʼa ɓai, ta hur pats man a sumka ta a deɓa te ri mayamhi tengaʼa ɓai,

⁴³ ta hur nrkedi te kokwar Tsoan ɓai, man a nʼngreda skwi nengaʼa auda te kokwar Egypte;

⁴⁴ man a nʼngwoda woyamhi tengaʼa a pombaz, a ta slaha ta si iyam te nlèlè ɓai;

⁴⁵ man a mproko ta dzuwi a va aman a nje ta, a kudof man a gedas ta;

⁴⁶ man a mva ta dau tengaʼa a ri a skwi nʼnda dau, a dzarai a ngedassa skwi man ta gau;

⁴⁷ a vandzal man a gedassa gi lak ta, a halala man a bazla wof,

⁴⁸ a vandzal man a ngso skwi ndzham tengaʼa, a ntsi iyam a bazla rèwè ɓokhi tengaʼa.

⁴⁹ A ndav nengaʼa worworaʼa a mproko ta ndzoan a shèwa a matakwan a va, nhèyè golahi Zhiklè man ta gedassa skwai.

⁵⁰ A mva na civèɗ a ndzoan nengaʼa a ngsedahi ɓai, a mɓera nshèffè tengaʼa te ri mʼmetsi ɓai, a mpe ta à ma gidiɓèr.

⁵¹ A mbazla tsuvomhi te kokwar Egypte, tsuvom wuɗi ndohi Cham.

⁵² Te deɓaʼa a mbaha ta ndohi na auda ara tambakihai, a nlè ta tʼhèshèkèɗ ara rèwè,

⁵³ a nde ta zuraʼa a ta ga zlau ɓai, a iyam a mpizlè mayamhi tengaʼa a pa.

⁵⁴ A nde ta a sam kokwar nengaʼa nkezlaʼa, a der za man a duma a ri na.

⁵⁵ A ndzam ta kokwar bihi te pa, a nliva skwi nʼndi gi ndohi na a teɓa, a ndohi te verzi Israel ta nza te gi ta.

⁵⁶ Aman ta sassaya ndav ta, a ta poko na gèɗ auda a Bi Zhiklè, Zhiklè te géɗèʼa, a ta dzadzara ma kita nengaʼa ɓai.

⁵⁷ Lèmèlèmè ara bababhi ta, ta lèɓèslè ɓai. Ta men la a deɓa, a ta gu ara sulom man a ngwoda ta va a gèɗ.

⁵⁸ A maya mbèh skwi tengaʼa ta gu a ndav a ndza na, a vrihi tengaʼa ta poko na gèɗ ndav auda a Bi Zhiklè.

⁵⁹ Bi Zhiklè a ntsenaʼa, a ngu ndav, a nkwola Israel tèlèba.

⁶⁰ A nkwola gi te Silo, gi maslaka man a nʼnza a pa te ndev ndohai.

⁶¹ A njèkeda koti nderzlè-ma, a nʼnjèl nengaʼa, a ri a ndo mayam.

⁶² A mpe ta ndohi nengaʼa a ma tsakwal, a ngu ndav a géɗ ndohi nʼndi gi nengaʼa.

⁶³ Vogwa a nʼndeda golahi tengaʼa a ma, a ta tsima dalahi tengaʼa a ganzavar asaɓai.

⁶⁴ Ndohi mvi skwi a Zhiklè tengaʼa tabazl ta a tsakwal, a ngwozi mazihi tengaʼa ta slaha ta kuɗ ta ɓai.

⁶⁵ Te deɓaʼa Bai, Zhiklè, a nslambada ara ndo man a pidèkwe na a nzhunè, ara ngul ndo man zom a mwoslaʼa.

⁶⁶ A nzukde ta mayamhi nengaʼa, a ndzam ta, a mphomde ta a mèdèp.

⁶⁷ A nkwola gi Joseph, a mpar ta ndohi te verzi Ephraim asaɓai;

⁶⁸ aman a mpar ta ndohi Juda, za Sion, man a woya a ndav na.

⁶⁹ A nrom sam nengaʼa nkezlaʼa a géɗèʼa, a nɗizlèʼa ara herkeda man a zhè a mèdèp.

⁷⁰ A nʼngotsko David, ɓèl nengaʼa, auda, a mbaha na a sam rèwè skwai,

⁷¹ a nckoɗa a sam mam tambakihai, aman a wèr ndohi Jacob, ndohi na, a Israel, ndohi nʼndi gi na.

⁷² A nengaʼa a nwar ta a ndav nlèɓèsièa, a lè ta a maya nzuraʼa.