Psaumes 77 - Ma Zhiklè

¹ Njè ma Asaph.

² I woy a i bèhè a Bi Zhiklè a wuɗai, i bèhè a Bi Zhiklè a wuɗai, da tsena ma ga!

³ A pats matakwan ga i hos Bai, Zhiklè. A vaɗ tèlèba i pelaha ri ga, i jèkeda ɓai. Ndav ga a bidè azɓai.

⁴ I her Bi Zhiklè, a i sakat ga. I her gèɗ, ndav ga a mbeɗè.

⁵ I tara nzhun ɓai, a pay a dai; ndav ga a mènèhi azɓai, iyè amba a ngèɗ ɓai.

⁶ I hér pats zlèzlèa, i hér mvi nte deɓa halakai.

⁷ A vaɗ i hérèʼa, a dimèsh a hakay a gèɗ. I hérèʼa gèɗ ga a wuzhè skwi tèlèba.

⁸ Bai, Zhiklè, a kwèl ndo a mèdèp dè? Ndo a sia te va azɓi dè?

⁹ Pombi nengaʼa a ndev na dè? A njèkeda nlèɓèslè nengaʼa a mèdèp dè?

¹⁰ Nsi ndo te va mpea na a gèɗ a Zhiklè dè? Man ɓai, te ndzoan nengaʼa man a njèkeda nsi ndo te va dè?

¹¹ I gaɗa: Na haha skwi man a laydyè, a gèɗ man ri mandi Zhiklè te géɗèʼa a nʼngwod na.

¹² I woy a i hér skwi man Bi Zhiklè a gau, i hér nrkedi nengaʼa tʼhinkaɗ na.

¹³ I woy a i hér skwi man ka gia tèlèba, a i gèɗè ma mizlinè ngaya mbiaʼa.

¹⁴ Bi Zhiklè, civèɗ ngaya nkezlaʼa. Zhiklè mbiaʼa ara Bi Zhiklè wa?

¹⁵ Ka Zhiklè man ka gi nrkedai. Ka ngreda wuɗi ngaya a sam ndohi herkeda.

¹⁶ Ka pre ta ndohi ngaya auda, wudahi Jacob, a Joseph, a ri ngaya man wuɗi na zhè.

¹⁷ Bi Zhiklè, iyam a nrka ka, iyam a nrka ka, a ngudzau; ko woyamhi mbibi-hiaʼa tʼhwaɗaʼa ta gudzau.

¹⁸ Vani a ndzurvko iyam a hai, iyam a ntsu te giɗfèk, a ndidiyam ngaya a mhu tʼhwaɗ giɗfèk.

¹⁹ Ntsi iyam ngaya kuratsatsaʼa a ntsena tʼherkeda, ndidiyam ngaya a nhela herkeda, herkeda a ngudzau, a ngeda va.

²⁰ Civèɗ ngaya a mbeza a ndev iyam mbiaʼa, sam man ka beza a pa te va woyam mbiaʼa, aman ndo a nʼngatsa sam sak ngaya ɓai.

²¹ Ka de ta ndohi ngaya a ka pe ta a ri a nda Moise a Aaron, a ta lè ta ara rèwè skwai.