Psaumes 74 - Ma Zhiklè

¹ Dimèsh Asaph. Bi Zhiklè, ka kwol nga a mèdèp èhèmè, a ka gi ndav a géɗ rèwè tambakhi ngaya èhèmè?

² Hur mpi ndohi ngaya, man ka ngats ta halaʼa, man ka sumka ta a deɓa a ta gi a ndohi nʼndi gi ngaya, za Sion, man ka nza a pa.

³ Caha sak a ko do a sam man dikai a mèdèp. Ndo mayam a ngedassa skwi a sam nkezlaʼa klèng.

⁴ Ndohi man ta gi shèwa a ka, ta hèzlèwè te gi ngaya nkezlaʼa, a ta zlatseda skwi malwuɗi tengaʼa a pa.

⁵ Ta ara ndo dzana man a zlatsa na gèɗ a wofhi nhayaʼa,

⁶ a ta bazla a ta gedassa wof mpataʼa tèlèba a dzana a gaɗa züdo.

⁷ Ta fa na vogwa a sam ngaya nkezlaʼa. Sam nʼnzi nzlembaɗ ngaya ta derdda hai.

⁸ Ta huro: Ngo-gudossokoy tèlèba! A ta fa na vogwa a sam gi Zhiklè te kokwar tèlèba.

⁹ Nga rka nrkedi asaɓai, a mèdèp, ndo nhadka ma Zhiklè ba asaɓai. Ndo man a suna, gar a da nzi tèkè tèkè, a te va nga ɓai.

¹⁰ Bi Zhiklè, ndo shèwa ngaya a da jèkè nlivè nga a ngèmè? Ndo mayam da durdo nzlembaɗ ngaya a mèdèp dè?

¹¹ Ka mendko ri mandi ngaya a deɓa èhèmè? Ka peda ri ngaya a ndav èhèmè?

¹² Bi Zhiklè, bi ga daga halaʼa, nengaʼa man a preka ta ndohi auda tʼherkeda.

¹³ Ka ngela iyam mbiaʼa a wuɗi ngaya, ka batsama ta gèɗ a skwi iyam mbiaʼa tʼhwaɗ iyam,

¹⁴ ka tsede ta gèɗ skwihi man ta ara kedam, a ka va ta a skwi dak hai a ta ndiaʼa.

¹⁵ Ka winè nlèlè iyam a wurrihai, ka gwora woyam mbiaʼa.

¹⁶ Pats a ngaya; vaɗ ba a ngaya; ka vau skwi nhél sam a ka vau pats.

¹⁷ Ka gau kuma herkeda tèlèba; ngwar a via, ka ngau.

¹⁸ Hur skwi sa, Ndo nzi pèc pècèk; aman ndo mayam a liv ka, aman ndohi nrzlaʼa ta derɗe nzlembaɗ ngaya.

¹⁹ Nshèffè ndo ngaya nara nkudhom, ka da va na a skwi dak ɓai! Nshèffè ndohi ngaya ntawassaʼa da pca ka a gèɗ a mèdèp bail

²⁰ Hur nderzlè-ma nga! Kokwar nʼndha a ruva a ndohi shèwa.

²¹ Mbelaw ndo da shkè a deɓa a hori a di ɓai! Ndo ntawassaʼa a mbelaw ndo sèi ta slébèrdè nzlembaɗ ngaya!

²² Bi Zhiklè, slambaɗa, gu var ngaya! Hur ara man ndohi ambaɓihiaʼa ta derd ka pèc pècèk!

²³ Nhèzlèwè ndohi mayamhi ngaya, a nrubi ndohi man ta ga ka shèwa a ma ma, da pca ka a gèɗ bai!