Psaumes 73 - Ma Zhiklè

Ɗèlèwèr mamakaraʼa

¹ Dimèsh Asaph. A vava, Bi Zhiklè amba a sam ndohi Israel, amba a sam ndohi man ndav ta mpana.

² Ndul ndul ma i woy a i fèd ga; njèkè kètè a i kèlèhai,

³ te man i gu srak a géɗ ndohi man ta fi va, a i rka ara man ndohi ambaɓihiaʼa ta wèl va.

⁴ A vava, skwi mwuɗitpa a ga ta azɓai, va tengaʼa amba, daɓaraʼa.

⁵ Ta kèlè a matakwan ara ndohi ngiɗè azɓai, skwa a dza ta ara ndohi ngiɗè azɓai.

⁶ Ta fu nfi va a skwi daʼai ta. Ngi wuɗai nara dawar a va tengaʼa.

⁷ Shèwa te dai, a ta gi skwi ara ndav ta man a woyaʼa.

⁸ Ta rka skwi tèlèba ara skwi ambalai, ta gèɗè ma ambaɓiaʼa a ta cèkèlma te nfi va.

⁹ Ngèɗè tengaʼa a dè a géɗèʼa, ngèɗè tengaʼa a ndèshede va a géɗ herkeda.

¹⁰ Gar haha ndohi ta hi a verzi ta ara nhèyè iyam,

¹¹ a ta gaɗa: Zhiklè a sunko tema? Zhiklè te géɗèʼa a sen mè?

¹² Na haha, ndohi ambaɓihiaʼa ta gi arsa, ta nza genè pèc pècèk, a ta ɓicè skwi mèshèlè ta.

¹³ Ko man i lizhè ndav ga ɓai, ko man i pana ri ga a i ga mali ɓai, skwi ambali genè!

¹⁴ Skwa a dzayè pèc pècèk, a prèk a prèk i ngècè ndzoan.

¹⁵ Ndul ndul ma a i gèɗè ma ara tengaʼa. Aman ar haha ar i ngwode ta ndohi te verzi ngaya.

¹⁶ A i huro, i woy a i shin verziaʼa; aman wuɗitpa a sam di ga,

¹⁷ ha i do a gi Zhiklè, a sam nengaʼa nkezlaʼa, a i war ndikè-ma tengaʼa.

¹⁸ A vava ka pe ta a sam man a slafaɗama ta sak, a kalde ta a hai.

¹⁹ A nasa nasa ta te ri nlèyè. Ta zi ta, a ta ndev ta a skwi mwuɗitpa.

²⁰ Ara nshunè a sam ndo man a piɗèkwa, ka Bi Zhiklè, aman ka slambaɗa, ka kwol ta, ka woya nrka ta ɓai.

²¹ Aman skwi haha a dzay a ndav dekedekaʼa, a pedi kwa deɓ ga.

²² Iyè ara ndo nrzla man a sun maya ɓai, iyè ara skwi dak a sam ngaya.

²³ Aman anai i nzi a sam ngaya pèc pècèk, ka gsyè te ri mandai.

²⁴ Ka dyè ara man ka huro, te deɓaʼa ka cyè a sam nʼnjèlè.

²⁵ Ngiɗè a zhè man i ngots te zhiklè te géɗèʼa dè? Sèi ka man i ngotso. Aman i ngats ka genè, i jhèɗè skwi tʼherkeda azɓai.

²⁶ Ko va ga a ndav ga ta hohoy ta, ka Bi Zhiklè, sam ga ngedeng-gedengaʼa, a skwi man i ngotso a mèdèp.

²⁷ Na haha, ndohi man ta hi ta auda a sam ngaya, ta zi ta. Tengaʼa man ta jèke ka, ka gedas ta tèlèba.

²⁸ Aman na haha mwuffè ga, aman i nzi ndul ndul a Bi Zhiklè. I pi ndav ga a Bai, Zhiklè, a i njè ta skwi man a gia tèlèba a ndohai.