Psaumes 72 - Ma Zhiklè

¹ Man a Salomon. Zhiklè, va na kita ngaya a ri a bai, a ngi-zura ngaya a ri a kra bai,

² a da ga ta kita a ndohi nengaʼa a ngi-zuraʼa, a helka ta mbelaw ndohi ngaya auda te kita.

³ Zahi ta da ckoɗi gumi a hi a géɗ herkeda, a ngègèɗhai ta da ckoɗi ngi-zuraʼa a hai.

⁴ Bai a da helka ta mbelaw ndohai auda te kita, a da takaha ta ndohi ntawassaʼa, a mbatsaha ta ndo nʼnga ta matakwan.

⁵ Nshèffè na a nzi dai ara pats, ara kia man a vèngè a zhè genè, a ndè a verzi wud wuda.

⁶ Nara iyam man a gi a sam ndaʼa; aman iyam a gai, a hi a géɗ herkeda.

⁷ A pats man nengaʼa a zhè, ngi-zuraʼa a giɗè auda, gumi mbiaʼa a zhè, ara kia man a kèlè auda a giɗfèk azɓai.

⁸ A da gi bai, a hinè te woyam mbiaʼa staɗ a ndè a woyam mbiaʼa ngiɗè, a hinè te woyam Euphrate, a ndè a verzi herkeda.

⁹ Ndohi ngi shèwa sèi ta kèlèhai a deɓ sak nengaʼa, a ndohi mayam nengaʼa sèi ta bhöm mberfenèk.

¹⁰ Bihi Tarsis, a bihi tʼherkeda te ndev iyam, sèi ta vi skwi mbalai. Bihi Séba a Saba sèi ta hulko skwai a ta va na.

¹¹ Bihi kokwar tèlèba sèi ta gurɓahai a sam nengaʼa, ndohi herkeda tèlèba sèi ta gi mizlinè nengaʼa.

¹² Aman nengaʼa a mbela ndo ntawassaʼa man a kuɗai, mbelaw ndo, a ndo man ndo ntakaha azɓai.

¹³ Mbelaw ndohai a ndohi ntawassaʼa ta sia te va, a mbel nshèffè ndohi ntawassaʼa.

¹⁴ A sumka ta nshèffè ta a deɓa te ri ndohi wuɗai, te ri skwi man a ga ta matakwan. Nshèffè tengaʼa, gani a pa kumba a sam di na.

¹⁵ Da nza a nshèffè, da ngots guro te Séba! Da da tsu rai a géɗ nengaʼa pèc pècèk, da da pshè na ma, a hinè a prèk ha ndè ma dakwaɗ.

¹⁶ Dau da ndev te kokwar ɓai! A géɗ za ba, skwi da gu a pa, lèmèlèmè ara man a gi te Liban! Kokwarhi mbibihiaʼa ta da dai lèmèlèmè ara kuza a gèɗ herkeda.

¹⁷ Nzlembaɗ nengaʼa da nzau a mèdèp, da gra a mbiaʼa a ma ma, ara pats man a zi auda a giɗfèk azɓai. Verzi ndohi herkeda tèlèba, da pshè ta ma ndohi kokwar a nzlembaɗ nengaʼa. Ndohi kokwar tèlèba, do slubordo nengaʼa!

¹⁸ Ngo-slubordokoy Ndo nzi pèc pècèk, Bi Zhiklè, Zhiklè Israel, man a gi nrkedai, nengaʼa staɗgenè.

¹⁹ Ngo-slubordokoy nzlembaɗ nengaʼa nʼnzalaʼa a mèdèp, nʼnjèl nengaʼa da ndha herkeda tèlèba. Amen, Amen.

²⁰ Ntsi ri David, kra Isai, klèng.