Psaumes 7 - Ma Zhiklè

¹ Dimèsh David, man a sla na Ndo nzi pèc pècèk a géɗ Cush, ndo Benjamin.

² Ka Ndo nzi pèc pècèk, Zhiklè ga, ka sam ga nlèaʼa.

³ Takahayè te ri ndohi ngay matakwan, pryè auda, man ɓai i bregwèdè auda te ri ndo ambaɓiaʼa azɓai, a cizlyè ara marizhèlè.

⁴ Ndo nzi pèc pècèk, Zhiklè ga: man i ngwoda rai, man mali a lizhèmay ri ga,

⁵ man i gau skwi man ambaɓai a sam ndo man nga nza a vna a gumai, man i ga na wuɗai a ndo mayam ga,

⁶ ndo mayam da jeky ɓai, da gsiyè, da tseday gèɗ, a nshèffè ga da ze na.

⁷ Ndo nzi pèc pècèk, slambaɗa, te ndzoan ngaya, slambaɗka na va a shèwa mayamhi ga, Zhiklè ga, slambaɗa, ka man ka til kita.

⁸ Ndohi herkeda mɓicaʼa da tèude ka a pa; nza a géɗ sam nʼnzi bi ngaya a ngi kita.

⁹ Ndo nzi pèc pècèk a gi kita ndohi herkeda. Ndo nzi pèc pècèk, bozl kita a géɗ ngi-zura ga, a géɗ man i ga skwa ɓai.

¹⁰ Ndeva shèwa ndohi ambabihiaʼa, nzala ndo nzuraʼa! Ka, ka wèr ndo kala hwada ba, Zhiklè nzuraʼa.

¹¹ Zhiklè a fay gambar a dai, a mbel ta ndohi man ndav ta zuraʼa.

¹² Zhiklè ndo kita nzuraʼa, man a güvè ndo pèc pècèk.

¹³ A vava ndo ambaɓiaʼa a tèsl tsakwal nengaʼa zaʼa, a lètè lèkèɗ nengaʼa zaʼa, a livèʼa.

¹⁴ Aman a til skwi nkéɗ ndo a géɗ va na, a viɗè sulom nengaʼa a dèrè a pa.

¹⁵ Nana, a her malai, skwi nzura ka ɓai, te ndav na, a ckoɗi ncèkèlma auda.

¹⁶ A kèl vèvèɗ mbiaʼa, a dè kèlè a pa.

¹⁷ Mali na a ngwoda na va a gèɗ, shèwa nengaʼa a menkaɗa deɓa a gèɗ na.

¹⁸ I woy a i shid gèɗ a Ndo nzi pèc pècèk, a gèɗ ngi-zuraʼa nengaʼa. I woy a i slébèrdè nzlembaɗ Zhiklè te géɗèʼa.